Ente patinetes y silles de playa

 

Los branos de la villa de Jovino davezu vienen marcaos per dalgún acontecimientu o discusión social que queden como un finxu qu’ayuda a recordar la temporada pasaos dellos años. Estos caberos vinieron señalaos pol discutiniu d’ida y vuelta al rodiu la desapaición de la Feria taurina llevada a cabu pola corporación anterior, dalgo que l’actual, de signu políticu estremáu y, polo que se ve, sensibilidá diversa tocantes al asuntu, tiénse encargao de subsanar cola so reposición y, amás, con unos carteles que paecen arrastrar mayor xentío del qu’asistía previamente. Con too y con ello, los antitaurínos van siguir  manifestándose, faciendo usu del so drechu.

Podríemos falar tamién del xentíu, entendíu ésti como l’axuntamientu y movimientu del personal a casi toles hores del día, tamién, en dalgún momentu y zona, de la nueche, como los entornos concertiles, la Fería de muestres, o les nueses playes urbanes, cola sablera de San Lorenzo a la tiesta. Pero ye nos detalles pequeños  au a mín me presta guetar el mensax social o, a lo menos, escubrir haza onde se mueve’l sentimientu y mentalidá de los xixoneses.

Ayeri, mientes guetaba’l Parchís, Muru alantre, casi a l’altor de la Escalerona, un par de neñes llamó la mio atención, pocu más d’un metru, quiciabes diez añinos, dambes vestidines un pocu a la antigua, como pa faceme recordar a la muñequina cola so camisina y el so canesú, si nun fuera porque diben pel carril bici, cauna montada nun patinete que, pola velocidá creyí eléctricu, pero viéndoles emburriar cola piernuca lluéu m’informaron que nun yera asína. En nada perdíles de vista, y, mientes proseguía el mio camín, nun pude menos que pensar que quiciabes nunos años, non munchos, díbales atopar yá crecidines y camuflaes ente munchos centímetros cuadraos de tatuaxes, con a lo menos un brazu en oscuru total, como se puede columbrar en cualquier esquina. Ye la evolución del güei, qu’ensiguida se convierte en mañana, y el pasao mañana va dicir si tien sío bona o non.

Más allá, ya tirando per Cabrales, cruceme con una señora, la güela creyo, acompañada d’una neña d’edá paecía a aquelles del patinete, y la so visión reconfortóme, pues dambas portaben, camín del arenal, la so sillina de playa, de talla adaptada la de la neña, aparentemente, y a mín paecieronme dambes visiones igual de positives, la de la modernidá, suponiendo que los patinetes lo seyan, y la tradición de les muyeres playeres de Xixón, siempres a cuestes con esa silla plegable; quitando que les lleve l’home. Ye lo qu’hai.

Raúl Suevos

A 7 díes vencíos d’agostu de 2025

Torna en castellán en repdiv.blogspot.com