Cuando s’aporta a l’Habana pela mar malapenes s’atalanta la
dimensión de la so bahía estraordinaria. La llámina d’augua enmarcase pela esquierda
col Castiellu del Morru, y a la drecha, la parte final del Malecón sirve de
base a Centru Habana y más allá a l’Habana Vieya. Yá dientro, la bahía pártese
en dos, a la drecha la Ensenada d’Atarés, col promontoriu de Regla faciendo de
parteaugues, cola so bonita y querida ilesia relluciendo al pie del popular
barriu.
En tiempos vieyos, allá pel S.XVII, a la fin de la muralla atopábase’l
Real Arsenal de l’Habana, un de los más importantes de la Corona y responsable
de la construcción de buques famosos de mui llarga vida, gracies, amás de la
bondá de la so construcción, según planes de Jorge Juan, a les maravioses
maderes cubanes, nes que’l fueu enemigu malapenes producía astilles, la
metralla d’aquel entoncenes.
Un de los sos productos más renomaos fo’l Santísima Trinidad
de los Mares, con cuatro pontes artillaos y mayor buque construyíu en toa la historia
de la navegación a vela. Hasta Galdos-y rinde tributu nel so primer episodiu,
Trafalgar, au acabaría funfigáu.
Ellí, al cabu de la muralla, taba instalada la Torre d’arbolar,
un inxeniu, el mayor del mundu na so dómina, col que se llantaben los mástiles
a los navíos, operación mui cazalba ensin el so concursu. Una instalación que
los fios de la Gran Bretaña se encargaron de destruyir con muchu procuru
demientres l’añu d’ocupación de la ciudá en 1762, al tiempu que se llevaron
tola madera qu’ellí atoparon.
Nel so llugar, dende va dellos años, alcuentrase l’embarcaderu
de la Lanchita de Regla, una especie d’autobús naval, mui acabáu yá, que
comunica l’Habana Vieya col barriu del otru llau de la bahía, ensin el cualu
hai que rodiala coles penuries del tresporte habaneru anguaño.
Ellí entamóse’l Maleconazu, con un intentu de secuestru del
barquín pa colar a los EEXX, en plenu periodu especial. Frustráu pola policía,
con tantu de tirotéu, muertos y, posteriormente fusilamientos. Depués vendríen
los 35 mil marielitos, y el aniciu de la lenta agonía del réximen y la propia
Cuba. Un estertor que paez nun tener final y que otra vegada pasa per un
periodu especial, nun declaráu, nel que la fame de nuevu se fai endémica y la
emigración se convierte en canal de vida pa los qu’ellí queden, y pal réximen,
pente medies de les remeses de los espatriaos, casi l’únicu recursu, pues hasta’l
turismu falla. Ye lo qu’hai.
Raúl Suevos
A 8 de mayo de 2023
No comments:
Post a Comment