Dicen que l’ambiente en Madrid taba cargáu dende dellos díes,
como agora, pero fo l’apareyamientu d’una carroza a les puertes del palaciu real
lo que desató les alarmes na población que, de forma espontánea, amotinóse pa
torgar el “secuestru” del infante, miembru caberu de la familia real, toa ella
yá en poder de Napoleón en Bayona.
L’españíu popular, amás d’imprevisible, fo contaxosu, y de
secute la ciudá taba convertía nun zafarranchu de combate, col exércitu armando
a la población nel cuartel de Monteleón, nel anguaño barriu de Malasaña, y del
qu’entá se conserva una puerta. Ellí, Daoiz y Velarde, capitanes d’artillería, diben
encabezar la llucha, na que tamién participa una Manuela Malasaña dende entós
emblema madrilanu de la casta de les sos fémines. Dambos capitanes diben cayer
nel fragor del combate, y, xunto a ellos, un mozu teniente Ruiz, del arma d’Infantería,
diba significase con igual valor, anque’l destín quiso que, malferíu, algamara
a salir de la capital pa morrir tiempu depués, perdiendo asina la gloria que da
la muerte en combate, si bien la estatua de la plaza del Rey fai-y honor pa
siempres, y na mio etapa del reximientu Valladolid 65 venerábamos una urna pequeñina
de madera llabrada, con costaos y techu de cristal au, suponíase, taben parte
de los güesos venerables del heroicu teniente. Espero que les reorganizaciones
sucesives del Exércitu nun los tengan estraviao.
Depués d’aquelles xornaes memorables, que Goya fizo inmortales
colos sos pinceles, fo l’alcalde de Móstoles, cola so proclama, el qu’impulsó’l
levantamientu xeneral, dando pie a la Guerra d’Independencia, que n’Asturies
provocaría pal 25 del mesmu mes la criación de la Xunta Suprema y soberana del
Principáu d’Asturies, primera ente les de la nación y, suponse, seme del “Gobernín”
de 1937.
Güei, casi como entós, anque de forma incruenta, comentase la
batalla qu’ayeri tevo llugar en Madrid, na que los políticos, toos, pretendieron
secuestranos el festeyu, patrimoniu, como l’Infante, de tolos españoles; y ye
que la realidá diznos que tamos en plena refriega electoral, y toa batalla ye
bona si contribuye a ganar la guerra, más n’avientu que’n mayy. Ye lo qu’hai.
Aquí n’Asturies, como entós, anque casi cola mesma dificultá
pa los viaxes a la capital, vamos esperar hasta esi 25 de mayu pa la nuesa particular
engarriada, que l’habrá, pos llevamos yá dellos años nos que la progresía, seya
lo qu’eso seya, pretende camudar el día d’Asturies, de la Santina, por esi más
laicu y, pa ellos, más apropiau.
Raúl Suevos
A 3 díes vencíos de mayu de 2023
No comments:
Post a Comment