Metanes el tiempu revueltu d’estos díes caberos por fin un
pronósticu feliz, no atmosféricu, que mos permite programar una escapada a un
rincón que va tiempu guetabemos; les islles Borromeo, nel llagu Maggiore.
Un llagu, el Maggiore, que nun lo ye, pos siendo grande, el
de Garda aventaxalu nun terciu a lo menos, pero como tolos del norte d’Italia ye
simplemente magníficu, cola particularidá nésti que la so parte norte pertenez
a Suiza, nos sus cantones de fala italiana, y, si la mio alcordanza nun falla,
y si asina fuera tampocu importa muncho, el famosu Hemingway fai colar al so
protagonista del “Adios a les armes” remando nuna chalana metanes la nueche
haza aquel país, esmuciendo d’una Primer Guerra Mundial de la que, magar ser conductor
d’ambulancia voluntariu, yá taba afartu.
El casu ye qu’esti llagu, na so parte italiana, vien siendo
propiedá a lo llargo los sieglos, d’una de les families más riques del país,
superando a los Médicis toscanos en llonxevidá, pos aínda anguaño siguen no
alto de la pirámide social del país, y tamién na económica. Son los Borromeo, pastu
de revistes últimamente pos un de los sos atoños, Beatrice, emparentó pente
medies boda con los Grimaldi de Mónaco, y yá se sabe, eso ye bocato di
cardinale pal papel couché.
Nel llagu, que los sos drechos de pesca creo qu’entá son de
la familia, apreciense tres islles, toes de la so propiedá, y nes que, sieglu
tres sieglu, foron levantando edificaciones –palacios- y xardines; llenando los
primeros d’obres d’arte y los segundos d’especies exótiques trayíes de tol
mundiu. El conxuntu pasa por ser una autentica maraviella, y ciertamente yelo,
anque’l nuesu asoleyáu día resultó poco menos qu’una velea.
Paecía aquello’l desembarcu de Normandía, con docenes de
lanches y tresbordadores, toos ellos cargaos d’ancianos, o más asépticu, over
75, de toles nacionalidaes y llingues, anque me llamó l’atención l’ausencia de
xaponeses, en tala cantidá que’l llargu percorríu pela Isola Bella, la única
que visitamos, montáu en mou Ikea, de forma que’l visitante nun pueda evitar nin
les tiendes, nin la cafetería del palacio, y, finalmente, los munchos restaurantes
que na zona de salida esperen al afamiáu y cansáu turista, resultaba
aforfugante y quitaba les ganes de detenese; si bien, too hai que dicilo, les
munches obres pictóriques nun cuenten con grandes firmes y la so importancia alcuentrase
na so propia disposición recargada nos grandes salones.
Ye realmente’l conxuntu de les islles y los sos xardines na
rodiada d’esti llagu envueltu peles cumes de les primeres estribaciones alpines
lo qu’impresiona, y la presión de los güelos invitamos a dexar la Isola Madre,
au s’atopa la estatua xigante de San Carlos Borromeo, y los xardines
Pallavicino pa otra ocasión na que la presión turística nun seya tanta, anque
visto lo visto ye duldoso que queden feches tranquiles pa talu llugar.
Depués, y yá de nuevo na oriella, tomamos el paséu de la
rivera, una autentica delicia, ésta sí, qu’en mou xardín botánico salpicáu de
playes lacustres lleva hasta la vecina Stresa; una villa turística con una llínea
de grandes hoteles al mou de Dauville, Cannes o Montecarlo que da idea de lo que
fue y aínda sigue siendo esta zona como meta turística, pero qu’a min, sobre
manera, emocioname pol homenaxe que caltien al Alpinu y el mulu de montaña.
Ellí, en Stresa, atopamos una ostería de la que me queda la
alcordanza d’unos raviolini rellenos de crema de patata a les hierbes y cocíos
en caldu d’estofáu de carne, una delicia que encaxa maraviosamente con un
brunellu de Montalcino de preciu asumible, y que coronamos con un tiramisú
confeccionáu con cerveza en llugar de café; sorprendente y riquísimu. Ye lo qu’hai.
Raúl Suevos
A 16 díes vencíos de mayu de 2023
No comments:
Post a Comment