Tiranu Banderes y los so validores

 

Ye esta novela de don Ramón del Valle-Inclán una obra que convien siempres tener a mano, pues si bien se desarrolla nun país ficticiu, como suelen facer los militares a la hora de plantegar los sos exercicios y maniobres, la realidá que trataba de reflexar atopábase na mayoría de países hispanoamericanos, por nun dicir toos ellos.

Santos Banderas, el protagonista, ye’l dictador de Santa Fe de Tierra Firme, que’l so nome s’inspira, aparente y doblemente, en Colombia y Venezuela, y ye un tiranu odioso y cruel que va acabar cayendo pente medies un movimientu revolucionariu. La so trayectoria vital imaxinaria podría recordar a munchos otros, dende Tacho Somoza a Leónidas Trujillo, ensin escaecer al clásicu Porfirio Díaz, o les ternes ominoses de les Xuntes arxentines. El casu ye que ye tan ampliu’l muestrariu que, na literatura iberoamericana, desarrollóse un xéneru específicu dedicáu a los dictadores.

La situación anguaño déxamos a Raúl Castro y Daniel Ortega, Cuba y Nicaragua, países pequeños que a la so traxedia’l mundiu paez que se tien avezao, y que malapenes merecen una atención pequeña más allá del siguimientu que la prensa “de dreches” yos pueda dedicar, yá que la “progresista” siempres amuesa un silenciu ruidosu sobro lo qu’ellí asocede, como dinosaurios d’aquelles dómines pretérites.

Lo de Venezuela ye diferente, ye un país importante, por población, y, sobremanera, por posibilidaes, dao les so reserves petrolíferes inmenses. Un país con pasáu democráticu –Chávez algamó’l poder pente medies eleiciones llimpies- pero que firme ya inesorablemente empobinóse a lo que güei ye, un aranxal social del que yá se tienen escapao casi ocho millones de ciudadanos, radiaos per tol continente a la gueta de llibertá y sometíos a toles llaceries de los refuxaos.

El robu electoral lleváu a cabu por Maduro, y el so esmazcaramientu pola oposición tien sío tan bultable qu’obligó a tolos gobiernos hispanoamericanos a definise, con especial mención al esquierdista chilenu llideráu por Gabriel Boric, al preciu de la espulsión del so embaxador, pero entá queden tres, los más importantes, Colombia, Brasil y México, qu’acompanguen y ganen tiempu, pidiendo les actes electorales, como fai el doctor Sánchez n’España, aconseyáu pol siniestru Zapatero.

Yá nun queda tiempu qu’otorgar a Maduro, lo qu’ellí asocede ye lo mesmo qu’en Cuba y Nicaragua, tiranos indecentes qu’esclavicen la so ciudadanía, y que’l so oxetivu ye simplemente perpetuase nel poder a costa de lo que seya. Esos tres países, tamién España, deben definise, y los EEXX y la XE yá tarden en poner en pie un sistema de sanciones similar al de la Rusia de Putin. Ye lo qu’hai.   

Raúl Suevos

A 24 díes vencíos d’agostu de 2024

Torna en castellán en repdiv.blogspot.com