Ye una cita que me pongo como obligatoria nel calendariu. A
lo menos una corrida de la feria de Begoña en Xixón, y si ye posible dalguna
más. Y ésti añu tocó’l sábadu visitar la plaza perguapa, añexa yá de más de 130
años y con casi 10 mil asientos.
Los mio conocimientos taurinos foron siempres precarios,
magar que dende guaḥe’l mio pá, que nun lance singular
llegó a peracabar un toru que Palomo Linares nun foi a lidiar y hebo que
devolver a corrales, llevábame con él a la plaza tolos años. Dalgo que, por
cierto, nun me produxo traumes infantiles, más allá del fumu de tabacu qu’entoncenes
se consumía en grandes proporciones nos tendíos, a diferencia de lo que güei
asocede.
El casu ye que, como aficionáu de tercera, presto atención a
los detalles más allá de la propia lidia. Por exemplu la redoma de la plaza,
con pieslle de cai ya instalación de terraces, au se concentren grupos y
pandilles d’aficionaos pa comer, ya inclusive tomar el primer cacharru enantes
d’entrar al cosu. Ellí vense miembros de peñes, distinguíos colos sos pañuelos,
y en xeneral xente arreglada, bien vestida, a la manera de enantes. Quiciabes
d’ehí la inquina que la esquierda “progresista” manifiesta-y a la los toros.
Na plaza, ente dellos puros y pertrechaos de vasos de
plásticu con potenciadores de la hermandá y la simpatía, el personal váse
preparando pal entamu, que llega con una “Xixón del alma” a cargu de la Música,
supongo que por aquello de la so condición d’himnu extraoficial de la ciudá,
anque yo prefiriera la Marcha de Granaderos, pa facer xuegu coles bandieres
nacionales qu’adornen la plaza.
Desfilen les cuadrilles y restu de personal, y, tres dexar los
capotes de paséu, entama un ritual d’estiramientos con postures, pa la mayoría
de los asistentes imposibles, que recuerden la pista de calentamientu de la
recién acabada olimpiada, ya incluyen a los picadores na so puerta con exercicios
qu’asemeyen a los llanzadores de xabalina, pero que, supongo, amás de la parte
muscular, traten d’espurrir los traxes perapretaos. Ca cuadrilla, Morante,
Manzanares y Ortega, ocupa la so parte nel caleyu.
Nos tendíos muevense los abanicos, fai churnu, y, puntual, un
orpín impertinente, que va crecer a orbayu, y váse amosar aportunante nel so
vien y va, vien a refrescar a los llidiadores, que xeneralmente cumplen el so
cometíu baxo un sol y temperatura afogadiegos na mayoría de les places d’España.
De les faenes, con dalgún estemporáneo Viva España, y bronca
por un animal feísimu que se vuelve a corrales, apuntar que Manzanares se llevó dos oreyes nel
so primer, la segunda sofitada nel fervor femenín, y Morante, al que’l públicu
apreciaba notoriamente y realizó dos faenes mui guapes, falló con la espada y
ofreció un espectáculo un tantu chuscu col so segundu bichu, de capa canela y
mui curiosu, pero al que debió llega-y noticia nos toriles de los tres pinchazos
apavoriantes que recibiera’l so hermanu de la mano de Morante, y llegáu’l so
momentu nun facía otra qu’escapase del so fin anunciao, llevando al maestru ensin
resuellu corriendo enredor al aniellu, lo que no-y torgó fumase un puru lluéu.
Llegao equí, la suerte cabera, siempres me vienen los animalistas
a la tiesta, esa tiesta nel pasáu formada cola Paideia qu’inventaran los
griegos, y na qu’había cabida pa Perseo y el so Minotauru, y que güei s’enllena
de tiktok y sostancies varies, y que paez condergar al nuesu Uro nacional a la
desapaición, anque en Xixón, ayeri con cuatro quintos d’entrada, pelo baxo,
aínda s’intenta protexer a esti animal, dándo-y una vida y una muerte artística
y gloriosa.
Raúl Suevos
A 18 díes vencíos d’agostu de 2024
No comments:
Post a Comment