lleguenme noticies de l’aportar a Cuba, primeramente a L’Habana,
y depués a Varadero, d’un grupu de xentuca qu’al paecer cuenta con gran
seguimientu nesa dimensión de la información pública que conformen les redes
sociales, anguaño un universu con un algame inimaxinable nun va dellos años,
anque, si tornamos la vista atrás, atopamos que Barack Obama encimentó el so triunfu
nes primaries y depués nes eleiciones de la so primer presidencia precisamente
nel usu masivu de, les entoncenes en fase primaria, redes sociales. Esto ye,
que yá casi tamos nel periodu culminante del fenómenu, con dalguna d’elles,
como Facebook, escomencipiando la escayencia.
Esa xente llegada a la otrora Perla del Caribe, y güei cárcel
insular pa desahuciados de la vida decente, pertenecen a la categoría d’influencers,
tiktokers, youtubers, y otres tipoloxíes que’l mio escarsu conocimientu d’esi
mundiu nun algama a conocer y, poro, numberar, pero seguro qu’hai unes cuantes
más. Pero’l so comportamiento, al aceutar esi viaxe, patrocináu por una axencia
de viaxes catalana, y posiblemente por GAESA, la axencia militar cubana que ye
dueña del negociu turísticu isleñu, catalógalos como memos; calificativu que na
so primer aceición la Real Academia, equipara como mentecatu, o lo que ye lo
mesmo, “d’escarsu xuiciu o entendimientu”.
Y ye que, esta xentuca, de la que forma parte una conocía
miembru xixonesa de la farándula nacional, exerciente en munches artes ensin
ser virtuosa en niúna, dalgo por otra parte consustancial col mundiu de les
redes sociales, dedícase a anubrir l’espaciu cibernéticu con tou tipu d’entradilles
contando ya illustrando les mil maravieyes de la so estancia na mayor de les Antilles,
pasando por alto la realidá firiente que los arrodia, anque ensin chisca-yos, y
resalvando, de xacíu, la probiteria de la circunstancia diaria del cubanu d’a
pie. Ye lo qu’hai.
Ellos aloxense en L’Habana en hotel de cinco estrelles, visiten
los Tropicanes y clubs pa turistes adineraos de la ciudá ensin apease de los
haigas vintaxe puestos a la so disposición, retrátense en llugares paradisíacos
acutaos pa ellos, dalgo que repiten en la segunda parte del viaxe en Varadero,
y en dalu casu mos cuenten qu’esos maraviosos hoteles tán construyíos col sudor
de los médicos cubanos únviaos pol gobiernu a trabayar en terceros países con
contratos draconianos, en llugar de meyorar la muy deficiente sanidá del país;
tampocu que’l gobiernu nun tien cuartos pa mercar comida nel esterior porque yá
nin les remeses de los expatriaos lleguen, pues estos prefieren usar les so
perres pa pagar una escapatoria a los so parientes enantes que caltenelos ellí.
El pocu turismu qu’aporta ye rusu, ensin divises fuertes, y
que nun algama pa cubrir eses inversiones tremendes llevaes a cabu pola
dirixencia militar n’hoteles. Y ye que yá namái la Venezuela de Maduro ta
dispuesta a siguir sofitando el réxime, anque ca vegada con unviades menores de
petróleu, si bien nestos díes Raúl Castro lo compense con continxentes de
personal del serviciu d’información pa controlar a la oposición venezuelana,
como yá asocediera en pasaos periodos convulsos d’aquel país.
En Cuba pásase fame, y mórrese por falta de medicamentos. Son
tantos los que tienen fuyío de la isla que nin al Exércitu-y llega’l remplazu
pa cubrir les so necesidaes de personal –dalgo bono tenía que tener la
situación- y mientes, estos memodiáticos, neoloxismu qu’acabo d’inventame amestando
al memu y al mediáticu, dedíquense a “vender” una imaxe del paraísu caribeñu
que nin algama yá a la so mesma privilexada y temporal situación.
Raúl Suevos
A 3 díes vencíos d’agostu de 2024
No comments:
Post a Comment