Na mio mocedá asturiana, va yá dellos telediarios, yera
frecuente saber de la desapaición de dalgún conocíu que garrara’l camín d’aquel
paraísu de promeses que representaba Venezuela. Los motivos yeren variaos, un
embarazu sobreveníu, una cita xudicial por asuntos rellacionaos cola
equitación, o simplemente la esperanza de llabrase un futuru más rescamplante del qu’España pudiera brinda-y.
Venezuela prometía un mundiu de colores comparada colos grises de la nuesa
tierra naquel entoncenes.
Depués les coses entamaron a torcese na tierra que güeyara
cabalgar al uvieín José Tomás Boves, y el so sistema políticu, tan exemplar
demientres un tiempu, entró en barrena na dómina de CAP, Carlos Andrés Pérez,
lo que dio pie pa que’l teniente coronel Chávez intentase’l güelpe militar, y
más tarde, tres una amnistía de babayu ¿sona-yos? ganara llimpiamente les eleiciones,
por primer y cabera vegada. Lo que vieno depués ye abondo conocío pa la
mayoría, y les so consecuencies caberes vivenles estos díaes los venezuelanos
d’ellí, y los siete millones y pico de refuxaos que tán fuera del país. Ye lo
qu’hai.
Agora Venezuela atópase otra vegada na cruciada, tres unes
eleiciones presidenciales de ñuevo someties al pucherazu chavista, anque esta
vegada, con una oposición yá sollertada, el mundiu en xeneral tevo accesu a
unes actes celosamente ocultaes por Maduro, pero sacaes de les meses polos
apoderaos de Corina Machado, qu’amuesen la dimensión del robu qu’intenten los
chavistes.
Digo intenten porque esta vegada, énte la evidencia
descomanada namái la caterma habitual, esto ye, Cuba, Nicaragua, Bolivia, Rusia
y China, tienen reconocío a Maduro como vencedor, dexando namái a dalgunos
coimbres, ente los que s’atopa el gobiernu d’España, a la espera de que s’asoleyen
les actes oficiales, eses en poder de la oposición y que Maduro esconde.
Colombia, Chile y México, xueguen la carta de la mediación, al
mio pensar demasiao tarde, y Sánchez, escondío nes so vacaciones, pa torgar la
visión del xuez Peinado supongo, dexa en manes d’Albares el dar la cara
n’asuntu tan escayosu, tanto que hasta los so socios “progresistes”, Sumar y
Podemos, yá escomencipiaron a dar la espalda, coles sos declaraciones, al
entamu insensatamente de sofitu al sátrapa, a la dictadura chavista.
Venezuela
yá aportara a esti puntu porque Chávez, el gran responsable, llaminó tolos poderes
independientes del estáu, eleutoral, xudicial, llexislativu, y tamién la prensa
independiente, de mou que lo que güei vemos namái ye la consecuencia de lo que se
semó demientres dellos años. Un desendolcu social y políticu que convien que dalgunos
observen y traten de comprobar si pue servir de espeyu pa otres situaciones, y
nun señalo a naide.
Raúl Suevos
A 4 díes vencíos d’agostu de 2024
Torna en castellán en repdiv.blogspot.com
No comments:
Post a Comment