Güeyando’l medalleru de la Olimpiada de París atópome con una
Ucrania allugada per detrás d’España, con dos oros menos y doce medalles en
total. Quiciabes pocu pa lo qu’esi gran país solía algamar nesi magnu eventu
deportivu, pero nun debemos escaecer que son yá más de dos años los que lleva
espereciendo una invasión del so territoriu cruel ya inxustificada a cuenta de
la Rusia de Putin.
Un ataque que se tien llevao per delantre la vida de munchos
de los so deportistes, cayíos nos frentes de batalla o baxo’l pesu de la ruleta
mortal de los bombardeos indiscriminaos de les ciudaes ucranianes. Magar too
eso, ehí tán los atletes ucranianos, llideraos, por aquello del record, por una
Yaroslava Mahuchikh estratosférica, que s’elevó ingrávida percima de los dos metros
y diez centímetros. Un güelpe de moral, ensin dulda, pa Ucrania.
Pero l’oru auténticu de los ucranianos atópase na so patria, nel
so territoriu, nos bienes materiales y artísticos destruyíos o robaos polos
invasores rusos, y nes munches vides y cuerpos mutilaos que van quedando pel
camín. Na consecución d’esi oru, el de la llibertá d’Ucrania, ye no que trabaya
esa nación lliderada por un presidente Zelensky, que lo ye tres eleiciones llibres
y llimpies, nun debemos escaecelo.
Estos díes, esa gueta del oru de los Nibelungos, la so llibertá,
toma un caris nuevu cola operación ofensiva que les fuercies armáes d’Ucrania
tán desendolcando nel noroeste, adentrándose en territoriu rusu per primer vegada, pa sorpresa del mundiu enteru, especialmente del Kremlin y la so
dirixencia, y avanzando haza Kursk, una ciudá de más de 400 mil habitantes que
nel pasáu perteneció al Rus de Kiev, paradoxes de la historia, anque más recien,
II Guerra Mundial, fue escenariu de la mayor batalla de carros de combate que
se conoza. Agora, otra vegada, paez ser oxetivu militar.
La operación sobro Kursk, que de nuevo garra por sorpresa a los rusos, ye
de valumbu inciertu pel momente, anque fálase de seis brigaes, ente seis mil y
doce mil elementos, escoyíes ente les meyores a costa de desprotexer ciertes
árees nel este, y los so oxetivos estratéxicos podrían dir dende’l global
d’amosar a los so aliaos occidentales la so capacidá, al más simple de poner
n’evidencia que l’ogru del Kremlin nin siquier ye a protexer a los so ciudadanos,
ensin escaecer el más plausible d’obligar a Moscú a camudar el dispositivu xeneral
en tol frente.
Demientres la borrina de la guerra nun mos de visibilidá yo otorgo-yos
la medalla d’oru a los ucranianos.
Raúl Suevos
A 11 díes vencíos d’agostu de 2024
No comments:
Post a Comment