60 años de Revolución en Cuba

60 años de “Revolución” en Cuba

L’un de xineru de 1959 aportaben los “barbudos”-yera asina como nomaben los guerrilleros que diba unos años combatíen el réxime de Batista dende la Sierra Madre- a la ciudá de L’Habana, capital de Cuba. Fo un españíu de folixa bonal, y nun yera pa menos pos suponía la fin d’una dictadura xavaz ya homicida.

Unos díes más tarde, col aportar de Fidel Castro a la capital, y entá metanes la folixa,celebróse un desfile nel Malecón habaneru con Fidel y los comandantes la Revolución na tiesta la manifestación. Batista fuxera mientres la nueche vieya –cuéntalo muncho bien Coppola nel Padrino- y, dempués de pasar per Dominicana y Portugal, finaría en Marbella en 1973.

Batista algamara’l poder pente medies la Revuelta los sarxentos nel 33 -el yera sarxentu mecanógrafu- más tarde fo presidente tres ganar eleiciones y dempués dictador, yá xeneral autonomáu, con un golpe que baltó’l gobiernu de Prío Socarrás nel 52. Esti periodu caberu carauterizóse pola corrupción política, el crimen organizáu y los asesinatos de disidentes. Un añu más tarde Fidel intenta l’asaltu al cuartel de Moncada en Santiago de Cuba, con resultaos desastrosos.

Dempués de pasar pola cárcel, Fidel, Raúl ya unos pocos allegaos, autoesiliense en México d’u van tornar nel Granma nel mes d’avientu de 1956 pa entamar la llucha escontra’l réxime dende la Sierra Madre y tamién nes ciudaes. Esta llucha, n’inferioridá de condiciones, contó cola fortuna de los elexíos pol destín y tamién cola absoluta ineficacia d’un exercitu desmoralizáu.

Los primeros tiempos de la Revolución foron desafranaos nel cambeu social y na persecución d’enemigos políticos, con fusilamientos de dudosa legalidá incluyíos a cargu del Che Guevara na Fortaleza de la Cabaña. Fidel entá tenía’l sofitu de la mayoría, y los que non, aniciaben a colar pa los USA. Éstos entamaron a llanta-y torgues económiques a les que Fidel retrucó cola nacionalización de les empreses americanes,dempués sedríen toles empreses, toes. Pa entós yá se declarara socialista, dempués de negálo demientres dellos años.

P’Abril del 61 montaron-y los USA una invasión con esilaos cubanos en Bahía Cochinos, que fracasó gracies a la direición del “gallegu” Fernández, fíu de carbayones, ya la indecisión de Kennedy. D’ehí echóse nos brazos de los soviéticos –nun-y quedaba otra- lo que diba conducir a la Crisis de los misiles pa ochobre del 62. Dempués vendríen años de collaboración con Moscú, intervenciones del 

exércitu cubanu n’África a nome los rusos, ya impulsu y sofitu de guerrilles –nel 67 va morir el Che en Bolivia-y revoluciones en toa Iberoámerica ya otres partes del mundu. Años de gloria pa Fidel que, amás, coles perres que llegaben de los rusos podía presumir de sanidá, educación y deportes; d’aquella nun había enguedeyu nel que nun s’enguedeyare.  

Too paecía dir bien, magar el Bloqueu, pero pal 89 va cayer el Muru de Berlín y con él el sistema soviéticu. Les perres que veníen de Moscu yá nun aporten ya’l PIB va cayer un 30%, ye lo que Fidel noma’l Periodu Especial, periodu de fame ya epidemies de ceguera pola falta de vitamines, periodu de fuxíes masives de cubanos p’au seya que yos abran la puerta, cualesquier sitiu ye bonu con tal de nun quedar en Cuba. Sigue’l Bloqueu.

Con Chávez nel poder en Venezuela torna a llucir el sol pa Fidel y les perres anicien a entrar otra vegada nel país lo que-y da un respiru al réxime. Ye 1999 y Cuba entama a unviar mélicos y téunicos pel mundu en llugar del exércitu; a Venezuela tamién militares. Ye lo que llamen “venda de servicios esteriores” nel presupuestu nacional y qu’importa un terciu del mesmu, a costa de dexar de la mano la sanidá ya la educación cubanes. El sistema aguanta, a males penes, pero aguanta.

Pal 2006 Fidel enferma gravemente y tien que retirase del poder, camuda en “soldáu de les idees” 

acordies les sos propies pallabres y Raúl pasa a tomar el mandu qu’anicia con delles midíes cosmetiques, accesu de los cubanos a la telefonía móvil y tamíen permisu pa entrar nos hoteles que hasta entós yeren solo pa estranxeros. El sistema aguanta coles perres de los mélicos, les remeses los emigraos ya’l turismu, pero nun funciona y a Raúl preocupa-y la cayida o desapaición de Chávez que va morir en marzu de 2013 asina que, pal 2011, anciosu él, promulga los “Llineamientos pa l’actualización del modelu económicu”, nome pomposu tres el que s’esconde un paquete de midíes que lliberen el trabayu nuna serie d’actividaes, trabayu autónomu qu’elli nomen “cuentapropistes” y que-y va servir pa reducir la nómina del estáu.

Amás d’esto Raúl va desendolcar una reforma agraria, probe d’oxetivos y amás atrabancada pelos funcionarios del Partíu comunista cubanu, que nun va funcionar.Tamién camuda la llei de la propiedá y d’emigración pa facilitar l’ingresu de capital ya inversores estranxeros, que tampoco funciona. Mentanto, Obama primero abre la mano pensando na so imaxe n’Iberoámerica, pa dempués zarrala desaniciando la llei d’axuste cubanu que-yos dexaba entrar nos USA ya’l programa Parole pa la fuxida de los mélicos cubanos nel estranxeru. Dempués Trump vieno a rematar la xera col endurecimientu de les midíes pa viaxar a Cuba los norteamericanos. En Cuba lesdificultaes pa salir 

alantre pal cubanu d’a pie son cada día mayores y el meyor indicador ye’l númberu creciente de cubanos que, magar Trump, garren cada día les balses pa escapar del país.

Esti añu, yá con un presidente del Conseyu, Díaz Canel, nomáu por Raúl, entamaron con una Reforma Constitucional, gúei aprobada na Asambleya y pendiente de referéndum pal viniente 24 de febreru, que caltien el sistema de partíu únicu ya un sistema eleutoral con votu non llibre, dirixíu, como agora. Esto ye, una reforma cosmética que nun camuda un res.

Ayeri en Santiago de Cuba, con una puesta n’escena muncho estudiada, Raúl leyó un discursu delantre una audiencia de fieles, col mausoléu de José Martí detrás d’él y el de Mariana Grajales –madre de los Maceo y madre de la patria cubana- y el de Fidel a los llaos. El discursu celebraba los ésitos de la Revolución nestos 60 años –ésitos discutibles cuanto menos- y tamién aprovechaba pa pedi-yos a los cubanos q’aforraren nestos tiempos de crisis –Cuba pasa per problemes pa pagar los sos proveedores-, depasu daba-y el so preste al desendolcu de Díaz Canel, ellí presente, lo que valía pa recorda-yos a toos que ye él el que tien la pallabra cabera.

Los aplausos que de xemes en cuando saltaben n’audiencia de fieles nun paecíen mucho explosivos, nin siquier calorosos; el propiu Raúl paecía escosu, como’l réxime, ya güeyando les imaxenes ún nun podía menos que pensar que yá falta poco pa que los cubanos, por fin, puedan algamar la llibertá ensin tener qu’escapar del so país.

Raúl Suevos

A 2 de xineru de 2019