Esti xueves pela mañana garré’l camín de Teruel. La cita yera a les ocho la tarde pa dar una conferencia sobro la Revolución cubana, pero tratabase tamién d’aprovechar la oportunidá pa pasiar ya reviciar la Ciudá de los Amantes asina que tomamos ceo l’autovía dende Zaragoza, dempués d’almorzar, col ánimu allegre ya dispuestos a esfrutar la esperiencia.
El viaxe per carretera ye afayadizu, dicen que del ferroviariu meyor nun falar, y ún dáse cuenta que’l tráficu, sobre too de camiones, ye perimportante; tanto que’l carril a mandrecha amuesa pola vibración del coche como polos parches renovaos sobro l’asfaltu que ye una vía d’importancia. Nun ye pa menos, esta autovía tendría de ser una de les grandes exes europees yá que representa la llínea más curtia p’aportar dende’l Llevante español, la gran zona hortofrutícola d’Europa, hasta Paris, Bruxeles y, en xeneral, tol norte del continente. Pero l’autovía, haza’l norte, desaniciase n’Huesca yanque nestos momentos trabayase nel desdoblamientu de la carretera hasta Xaca, entá queda xubir hasta’l túnel del Somport ya, inda peor, l’embudu que supón al otru llau del Pirinéu la ruta francesa hasta Pau.
Nin soi economista nin tampocu funcionariu de les instituciones europees pero dende l’enfoque español nun puedo entender como, cola que ta cayendo nel País Vascu –por más que mos vendan el productu de la paz social- ya en Cataluña coles sos posibles implicaciones pa la llibertá de movimientu en casu de tensiones polítiques, nun se potencia una ruta que, amás de direuta, serviría pa vertebrar el territoriu aragonés que lo que ye güei bascula cuasi per entero al rodiu la capital zaragozana y que, con una exa europea como esta, xeneraría atraición abonda como pa que delles empreses vieren la zona con otros güeyos pa un posible asentamientu.
Yá en Teruel y dempués de la cariñosa acoyida de Miguel, el nuesu convidador,pudimos dedica-y un tiempu a la ciudá, ayalga de l’arquiteutura mudéxar coles sos curioses torres polícromes pero tamién con dellos exemplares del meyor modernismu ya unes forxes en fierru absolutamente espectaculares. Cuasi too ye visitable, torres ya catedral pero tamién el muséu arqueolóxicu provincial, mui bien estructuráu na presentación de la so coleición nun palaciu aragonés renacentista y del que reviciamos especialmente, too ello magar un orbayu que recordaba Asturias si nun fuere pola temperatura xeladora que nun paecía acobardar al personal qu’enllenaba les cais de la ciudá.
La ciudá, que cola iniciativa de “Teruel tamién esiste” alquirió daqué de la notoriedá que per munchu tiempu se-y refugó, tien na so rodiada, según mos esplicaron, una mina histórica entá per afayar que vien de la mano de la “Batalla de Teruel” con toa una ensame de posibilidaes aínda per desendolcar. Ye de suponer ya d’esperar que cola descarbonización radical que’l gobiernu anguaño paez impulsar, y les implicaciones qu’esto va tener pa la provincia, toles opciones van ser dignes de valoración, tamién ésta.
Respeutu a la conferencia poco que dicir, nun me toca a min valorala, pero espero que fuere amena a lo menos ya, poles entrugues al so fin, creyo que puedo pensar que tamién fo interesante. El casu ye que dempués, los organizadores, gasayaronmos con una pequeña degustación de vinu aragonés y xamón de Teruel, ya sobre too una interesante parolada na que se podía atopar un esmolecimientu enorme pol próximu pieslle de la central térmica d’Andorra ya too lo qu’eso traye, especialmente la perda de puestos de trabayu y la desertificación subsiguiente del territoriu. Apuntaben tamién la so murnia énte la falta de dotación nos presupuestos nacionales nuevos pa la recuperación del ferrocarril Bilbao-Llevante, magar les munches promeses feches, una vía férrea, como la de la autovía, que sedría tamién de gran ayuda pa torgar que Teruel se convierta nuna completa reserva biolóxica de la humanidá a disposición de toa mena de visitantes como los que yá vienen a Dinópolis buscando restos de dinosaurios, o como’l fiu de Donald Trump a la busca de trofeos cinexéticos, na que los pocos habitantes sedríen tamién parte del espectáculu. L’ambiente y los sentimientos de toes estes persones yera de franca tristura y descuayu, ya espero que les señales que ellos, y yo tamién, atalanten, seyan enquivocaes y que’l futuru depare más allegríes de les qu’agora paecen refugase a los turolenses.
Al día viniente’l friu, típicu d’estes feches en Teruel, desanimónos lo suficiente como pa tomar el camín de vuelta tres almorzar. A unos pocos kilómetros, a l’altor de Caudé, el día, ensin les nubes baxes de la víspora, permitía contemplar el descomanáu númberu d’aviones nel vieyu aeropuertu militar, agora camudáu n’aparcamientu cosmopolita de grandes aviones comerciales de toes partes del mundu, tamién na éreo-escuela ya incipiente centru de reparaciones aeronáutiques, tou un exemplu de que les comunicaciones, nesti casu aérees, pueden convertise nun nichu a partir del cualu estremaes actividaes económiques, y con elles los puestos de trabayu, pueden desendolcase.
Llegaos equí, quédamos l’alcordanza d’unes persones escelentes, nuna pequeña ciudá cargada d’historia, bayura arquiteutónica y tamién con un panorama social llenu de nubes tormentoses qu’espero que se desfagan enantes de que provoquen un desastre y qu’a min asemeyábaseme tenebrosamente al que tenemos n’Asturies.
Raúl Suevos
A 19 díes vencíos de xineru de 2019
No comments:
Post a Comment