Rotura o transición

 

Siempres me dio gulisma Davos, non pola xente importante qu’ellí s’aconceyen tolos hibiernos pa esplicanos per onde van les coses del mundu, sinon poles maravioses pistes d’esquí de les que dispón. La mío realidá dexóme siempres nes fasteres del Brañilín, que tampocu ta nada mal. El casu ye que, un añu más, esi aconceyamientu de poderosos tevo llugar la selmana pasada y yá los sos ecos, inclusive los escabarrios del ogru naranxáu, tiénense estenao metanes la nube de noticies que cotidianamente mos asalta.

Pero esti añu hebo una intervención que, el tiempu valo dicir, tien base pa pasar a la historia. Foi la del señor Carney, primer ministru de Canada que sostituyó al guapu Justin Trudeau -del que casi naide s’alcuerda yá- y que, dende’ so aportar tien tenío que trepar na vanguardia, por aquello de la cercanía, coles turniáes de Trump. Y ente avanzos y retrocesos, como suel asoceder col home de Melania, tien algamao a face-y  frente, y apigurar tres d’él a la mayor parte de la ciudadanía canadiense.

El señor Carney esplicó al mundu que’l momentu ye, posiblemente, un parteaugues na historia d’Occidente, pues atopámonos non n’un momentu de transición, forzáu por Trump, sinon n’un puntu de rotura, puestu que lo que ta’n riesgu ye’l reemplazu de les rellaciones internacionales, basaes en regles, por un orden nuevu fondamentáu na llei del más fuerte. Un mundu nel que les superpotencias, fondamentalmente China y los EEXX, imponen el so poder al restu, y onde los foros creaos pa soliviar y enzancar les tensiones del pasáu, como les NNXX, camúdense en meros escaparates ensin valir real. Un mundu nel que’l respetu polos drechos humanos, el desarrollu sostenible, la solidaridá, la soberanía o la integridá territorial sometense al interés de les potencies.

En contraposición, o como equilibrador d’esti discursu de Carney, tevo’l de la señora Lagarde, directora del Bancu Central Européu, quien apuesta pola transición, y caltien la esperanza, supongo qu’aguardando que pase l’huracán Trump, de que’l vieyu sistema de rellaciones torne a socupar el so puestu lluéu. El tiempo va señalar lo correcto.

Mentanto, na mío cercanía familiar, un adolescente pasa un cursu completu de convivencia con una familia de Minesota. Los sos pais teníen previsto dir a recoyelu, en compañía del so hermanu, al acabar les clases, y, darréu, dos selmanes de viaxe pelos EEXX. Con seguridá más de 15.000 dólares, de los de Trump. Pero pa ellos tien habío una rotura, nun quieren viaxar col pasaporte na boca, y abortaron el viaxe. Ye lo qu’hai.

Raúl Suevos

A 26 díes vencíos de xineru de 2026

Torna en castellán en repdiv.blogspot.com