El maestru armeru

 

Cuando s’estendió l’usu de les armes de fueu nos exércitos, les averíes frecuentes y problemes estremaos qu’éstes producíen dieron llugar, por necesidá, a l’apaición d’un tipu d’especialista dedicáu esclusivamente al cuidáu de talos artefactos; yera’l maestru armeru, que tien llegao hasta los nuesos díes, anque yá nun se lu denoma d’esta mena.

Como quier que les armes daben abundo problemes yera dalgo mui frecuente unviar, al que sofría’l problema, a ver al maestru armeru, con tanta frecuencia qu’acabo por ser una espresión corriente que, hasta anguaño, s’utiliza pa evitar una respuesta por inconveniente, o simplemente porque nun se tien. Vete a ver al maestru armeru.

Va dellos años atopávame al mandu del Batallón multinacional del Cuartel Xeneral del Eurocuerpu. Demientres unes maniobres d’especial importancia poles implicaciones de puesta a puntu de les tresmisiones, fondamentales cuando de trata de dirixir un Cuerpu d’Exércitu, cumplíanos la responsabilidá de poner en marcha’l Cuartel Xeneral, pa lo que contábemos, ente otros medios, con un grupu de xeneradores que, teóricamente, podía suministrar enerxía a una ciudá de 45 mil habitantes. Pero’l llovíu vieno a complicar la historia.

Aquello nun tiraba. Les caxes interfaz descomanaes, teóricamente estanques, en realidá nun lo yeren. Los xeneradores saltaben y aquella maquinaria de combate grandiosa, ensin enerxía, nun yera a ponese en marcha. Hasta qu’un cabu alemán, Schmitz, responsable d’aquellos elementos, tevo la idea d’abrigar les caxes con bolses de basura. Y voilá, solucionao.

El retrasu fue d’hores, pero un día dempués l’exerciciu siguía ensin rincar, polo que se convocó un aconceyamientu con implicaos y responsables d’árees, a la qu’allegué con ánimu de condergáu. Ellí di cuenta del problema inicial y la so solución, y, cuando paecía que diba ser sometíu al escarniu públicu, el mío superior na estructura, con más información que yo, esplicó que’l retraso, de más d’un día, debíase a la sofisticada y casi imposible maniobra electrónica y dixital que los responsables d’esa área diseñaran, y que trataben de caltener, hasta entoncenes, fuera del conocimientu xeneral.

Yera un casu pa reclamar al maestru armeru, o nesti casu al cabu Schmitz. Los responsables verdaderos callaben, esperando que la nube pasara y fueran otros, nesti casu yo, los que corrierab col gastu de la responsabilidá. Un pocu como’l nuesu gobiernu, que nin na Dana tevo a bien moyase, nin nel apagón tien recibío un chispazu, y agora, col desastre sangrientu d’Adamuz, ta a la gueta d’un maestru armeru que-y resuelva’l problema, o meyor aínda, que cargue cola responsabilidá. Ye lo qu’hai.

Raúl Suevos

A 23 díes vencíos de xineru de 2026

Torna en castellán en repdiv.blogspot.com