Cuando viaxábemos nel Shangai

 

Tamos en plena batalla informativa al rodiu’l tren, lo cualo paez lóxico dempués de 45+1 muertos en malapenes tres díes, y supongo qu'a caún vienen-y a la tiesta alcordances y esperiencias personales, que nun tienen por qué ser dramátiques, como les d’esta selmana. Y nel mío casu, quiciabes por imperativu de lo que señala’l mío carné d’identidá, tengo unes cuantes al llombu.

Y ye que yo soi un d’aquellos usuarios del Shangai, aquel tren descomanáu, que nun recuerdo yá si se clasificaba como Corréu o como Esprés, pero qu’entamaba’l so periplu diariu en Barcelona, creo qu’a eso de les 15.00 h, y aportaba a La Coruña pasaes veinticuatro hores. Un tren inmensu, enllenu casi siempres, a lo menos nes feches pre y post vacacionales nes que yo viaxaba, y que yera a parar de forma incamentable y misteriosa metanes la nueche y los páramos castellanos, ensin que nada nin naide pareciera perturbar el so descansu, que podía llegar a una hora, enantes de volver a entamar la marcha de la mesma forma sorpresiva. Una aventura.

Yo garrábalu en Zaragoza, na vieya estación del Arrabal, tamién llamada del Norte, en compañía de collacios cadetes de la Xeneral, soldaos de les estremaes unidaes de la plaza, y toa mena de viaxeros, incluyendo families enteres cargaes d’equipaxes. Solíemos llevar reserva, lo que mos prometía un discutiniu acalorao al llegar al departamentu, onde dalgún yera a llantase nel buecu sobro la puerta y pasase’l viaxe durmiendo tranquilamente, mientes el restu matábemos el tiempu xugando y bebiendo de lo que previamente a escote mercaremos. El pasiellu, ente maletas y petates, yera muncho peor.

En León, madrugada entrada, y en Navidá con un friu infernal, dexábemos el Shangai los asturianos, pocos, pa esperar al Corréu que llegaba de Madrid, col que siguíemos ruta, yá abondo machacaos, hasta aportar a Xixón, nel mío casu, a eso de les nueve. Más de 14 hores dempués del entamu del periplu. Nunca pensemos n’un accidente.

Anguaño, tres años de presumir de la mayor y meyor red d’alta velocidá, viaxamos con medrana, y nun lo facemos pol tren, o polos sos conductores, sinon pola direición responsable de la organización, na que’l caltenimientu, culpable aparente de los accidentes caberos, llévamos a duldar del conxuntu del sistema. Y son los maquinistes quienes mos sollerten.

Unos maquinistes, sindicaos al 90% nun sindicatu ensin sovenciones, sofitáu coles sos cuotes, y mayoritariu en RENFE, que mos dicen que van a la fuelga en febreru, pola so seguridá y pola de nueso, actualmente muncho más precaria qu’en tiempos del Shangai. Ye lo qu’hai.

Raúl Suevos

A 22 díes vencíos de xineru de 2026

Torna en castellán en repdiv.blogspot.com