Tamos en payares y eso, por fuercia, tien que notase. Los trenes de borrasques qu’enantes entamaben el procesu n’ochobre agora paecen reservase, pero acaben por aportar, y estos díes enfrentamonos cola primer d’auténtica componente norte, lo qu’implica una baxada de temperaturas notable y los primeros puertos zarraos o con cadenes na cordillera, y los Picos d’Europa con su vestidura de gala.
Armáu de valor, ente bastíos y claríaes, aventúrome haza’l Muru de San Lorenzo, au m’atopo con un paséu abandonáu a la so suerte, barríu de xemes en cuando por súbitas tambascaes que ponen en seriu peligru la integridá del mio paragues. Dos moces corredores paecen querer reivindicar l’estatus igualitariu d’estos tiempos, que nel so casu nun ye igual sinon superior pos son los únicos valientes neste momentu embruscáu.
Abaxo, na sablera, un surfista sulitariu atraviesa la amplia y dorada faza a bon trote, como fuyendo de les foles qu’allá al fondu dalgunos camaraes siguen reviciando. Detrás d’él rompen les foles y el Cantábrico ofrezse visiegu, ente verdosu y gris escuru, coronáu por unes nubes cargaes d’augua y entá más amenazantes que’l propiu mar. Too paez invitame a tomar una decisión, y namái hai una posible.
De siempres, o cabría dicir dende mozu, nos tiempos en qu’ainda imperaba l’Oriental a la entrada de la cai Corrida, soi amante de los cafés. Tengo pelegrinao a Venezia pa conocer el caffé Florián, el Pedrocchi de Padova, o’l Torino de Turín, cola so cuidada decoración art decó. Nun viaxe de trabayu a Budapest pude escapame a conocer el pernomáu New York Café, espectacular pero convertíu nuna atracción turística. Y siempres que viaxo busco los cafés, como’l mediáticu Hafa de Tánxer o’l menos conocíu Baba na Medina; pero siempres, nes comparaciones, acaba ganando’l Dindurra, alma perenal de Xixón.
Nacíu como ambigú del teatru Dindurra, güei Xovellanos, nos sos más de cien años foi la reconstrucción llevada a cabu pol gran Manuel del Busto, creador de la Torre blanca d’Uviéu, el Centru asturianu de L’Habana, o’l edificiu del bancu de Xixón, por citar dalgunos, la que-y imprimó’l calter art decó qu’entá güei, tres la remodelación cabera, caltien.
L’amenaza de pieslle, va pocos años, xeneró un movimientu popular qu’“obligó” al consistoriu a declaralu bien cultural, forzando asina a la propiedá a caltener l’usu pa’l que nació. Y ehí sigue tando, colos sos cafés, o los sos vermús, siempres como refuxo ente les turniaes del mal tiempu, o ensin necesidá de coartada. El Dindurra.
Raúl Suevos
En Xixón a 5 díes vencíos de payares de 2021
Torna en castellán en repdiv.blogspot.com
No comments:
Post a Comment