Taba esta mañana de sábadu lluminosa pero con una daqué d’airiquín de noroeste que se facía sentir na cara. A la xente nun paecía importa-y, depués de los díes caberos de llovíu’l oxetivu yera tomar l’aire y tantu’l Muru como la sablera de San Lorenzo yeren pastu de pasiantes y perros colos sos amos.
A min, al altor de la Escalerona, siempres se me va la vista a esi preciosu monolitu art decó, col so termómetru y el so reló, tamién col so mástil cola bandera xixonesa, y nun puedo nun dexar de pensar lo bien que lluciría ehí una bandera española, más agora que los carbayones mos tienen pisao la maguera col banderón que llantaron na Escandalera. ¡Qué gulisma¡
El casu ye que, tres esi soliloquiu, salme a manzorga, viniendo del aparcamientu soterráneu del Náuticu, una primorosa familia que, a xulgar polos sos vestíos, dirixese a una boda, que después voi comprobar qu’en San Pedro. Ellos van d’azul, él de traxe y ella, no pude nun dexar de güeyar, con pantalones azules cubiertos por daqué paecío a una falda llarga aparentemente abierta per delantre y un cuerpu de vestíu con espalda descubierta y tirantes. El friu facía que s’intentara cubrir con un chal llivianu a xuegu que duldo que sirviere pa muncho.
Lo meyor de la estampa cumplía-y a la neña, quiciabes tres años, diba de la mano de dambos proxenitores, y yera una maravía. Una rubia con tirabuzones con un vestidín que nun dexaba ver una increíble capa con capucha de color burdeos, a xuegu coles medies de la criatura. Asolutamente encantadora, la neña y la imaxe de familia moza.
Que nun m’enquivoco atestiguenlo les numberoses vueltes de tiesta de los que veníen en dirección contraria, particularmente les muyeres, lo que me dexa la dulda si lo facíen pola madre, de la que nun puedo dicir si l’escote yera similar a la espalda, o si la so belleza correspondía al físicu qu’ensin dulda yera muncho. El casu ye que, llegaos a Ayuntamientu, yo tiré pal muelle y ellos pa San Pedro.
La cosa quedaría en simple lloría pero dexóme con bon ánimu pues venía de lleer que los divorcios n’España van como’l covid, en franca epidemia, y que los nacimientos retroceden, especialmente n’Asturies, au con eses premises la población retrocede y envieya a un ritmu que paez imparable.
Nel espigón de Lequerica, viendo la playa de Poniente enmarcada pel macizu del Aramo coles sos nieves primeres, acordéme de que’l mio amigu Chema vien de ser güelu d’una Allegra, mitá cántabra, mitá catalana, y la mañana fizóse entá más espléndida.
Raúl Suevos
En Xixón a 6 díes vencíos de payares de 2021
Torna en castellán en repdiv.blogspot.com
No comments:
Post a Comment