Yera esti sábadu postreru’l gran día, el del fin de la mázcara de proteición escontra’l covid. El día que diba significar un enantes y un depués na llucha escontra la pandemia; ún más nos finchos que se mos vienen anunciando dende que’l bichu s’instaló nes nueses vides.
Esta frontera nueva nel avance escontra la epidemia venía envuelta nes necesidaes, siempres crecientes y apremiantes, de la política nacional; cada día más cansosa. Tantu ye asina que l’anunciu presidencial llegó de la mano del trescendental –en sentíos estremaos y non concurrentes según los actores políticos- indultu gubernamental a los condergaos pol intentu de guelpe d’estáu en Cataluña. Blancu y negru, yin y yang, ormuz y arhiman, siempres la mesma historia.
La parte correspondiente a la mercadotecnia política ye de suponer que se cocinaría nos fogones del señor Redondo, a quien se -y axudiquen toles salses nel país de nueso dende va dalgún tiempu, pero correspondía-y la parte espositiva a la ministra Darias que, nun sé si mal asesorada o porqu’ella ye asina, ufiertónos una declaración que, na mio opinión, va pasar a la historia de lo que nun se debe facer en comunicación pública. Tan blanca yera la sonrisa nos sos dientes, tan melgueru –na so aceición negativa- sonaba el so notru tiempu dulce y cadenciosu acentu canariu que ún nun podía evitar acordase de la reina bruxa Grimhilde ofreciendo-y la mazana a la bella Blancanieves. Qué horror de comparecencia, Señor.
El casu ye que’l sábadu salí a la cai intrigáu pol efeutu que la entrada en valirr -cabría dicir desvigorizante pues nun anulaba sinon que disminuyía la so amplitú- de la directiva sobro l’emplegu de mázcara tendría sobro’l personal en Xixón y confieso que, dende la mesma puerta, la mio sorpresa foi mayúscula énte la respuesta que la xente daba a la señora Darias.
Pel centru l’usu de la mázcara yera práuticamente total de mou que, pasiante ensin destín nin baramentu, dirixíme al Muru, llugar ampliu –muncho más col ensanchamientu temporal del añu caberu- y siempres bien aireáu au, en plena hora vermutina[i], el xentíu yera vultable. Y ellí, casi lo mesmo, cola salvedá de dalgunos marchadores que, entá asina, llevabenla na moñeca o a mou de barboquexu. Yera como si la comunicación del gobiernu nun esistiere. Hasta una temprana y patética pandilla de despedida de solteru facia amuesa d’un honrosu 50% d’usu que, presumiblemente, diría decayendo col pasu les hores.
¿Sedrá’l pesu de la variante india? ¿Tocaría techu la capacidá d’embullamientu del doctor Sánchez? Son munches las entrugues qu’a unu-y vienen énte la respuesta ciudadana, que los noticiarios dicen que lo fue a nivel nacional, pero, una vegada más por desgracia, paezme que’l gobiernu nun lo ta faciendo bien, y lo que ye peor pa ellos, quiciabes realmente seya una nueva frontera, quién sabe.
Raúl Suevos
A 27 díes vencíos de xunu de 2021
Torna en castellán en repdiv.blogspot.com
[i] Quiciabes seya un neoloxismu, nun lo sé, pero refiérome a les 13.00 h, hora ideal pal vermú en casi toa España.
No comments:
Post a Comment