El quesu, potenciardor de la líbido

Préstame muncho’l quesu, sobremanera’l gamonéu, pero n’ocasiones preparo un mouse o crema a base de Cabrales, la Peral y Azul de fueyes que fai furor nes comides familiares. Esi ye’l casu en Navidá y Nuechevieya, y pa ello averéme a los grandes almacenes, los de tola vida, p’aperiame colo necesario.

Facia un día pa combate épicu de los Tercios en Flandes, una borrina trupa, temperatura de cero grados y sensación de menos tres. Una masacre meteorológica qu’invitaba a tomar un fervidín –vinu blancu con zucre fervíu al vapor de la cafetera- y lleer el periódicu del día, en llugar d’analayar peles cais, por otra parte abondo atarraquitaes.

Nos almacenes comprobé que yera l’únicu en llevar la mazcara puesta, magar l’alarma d’estos díes con gripe y covid, y lo atestao del llugar. Ye lo qu’hai. Yá na zona de quesos y viendo que’l mío turnu daba pa un ratu, llantemé nuna esquina y dispúnxeme a güeyar, y, de camín, a lleer nel teléfonu una recien y aplaudida tribuna de Javier Cercas, que me presta y anima hasta que remata finalmente con una declaración de la so intención de votar en blancu nel futuri. Pues sí que tamos bien.

Delantre mío, una pareya bien afiatada, superaos la setentena dambos, carguen abondosamente’l carru con amueses variaes del plantel de quesos nacional, tres lo que abandonen la zona. Yo sigo a lo mío, pensando yá na tarde que m’espera colos mio tres quesos, la sidra, l’aceite, la música de rock que pongo na cocina pa estornar a la muyer, y les prebes sucesives del asuntu, amén de culines de sidra. Un bon plan.

Yá na zona de caxes decátome que delantre mio tengo a la pareya d’enantes, que chuchurien ente ellos mientes alluguen les so compres na cinta. El paisanu fala pero, al tiempu, llanza güeyaes rápides y furtives a manzorga, a la otra caxa, ya, intrigáu, tamién yo me pongo a controlar, pa topame con un traseru –fondoschiena-y dicen n’Italia, muncho más finos ellos- espectacular, que la so propietaria, embuchada nunos pantalones de puntu peraxustaos, conxuntaos con un tamién apretáu top, afánase en llantar les so compres nuna bolsa. Atrevencia tremenda col fríu que fae. Habrá aportao en coche, pienso.

Delantre, la dama, decatándose de la libido desatada de la so pareya, solmena-y una coldada al tiempu que tira d’él pa la salida. A min, que namái tengo qu’allugar los tres quesos humildosos, dáme aínda tiempu pa ver que la cara que preside’l cuerpu pertenez a una morena guapa de piel escura y pelu azabache, ensin dulda exemplar sobeyosu de la raza hispanoamericana.

Yá na cai torno a topar la pareya nel semáforu, con ella xesticulando enraxonada y él en silenciu aspru. A lo menos va caminar caliente na nublina, pienso.

Raúl Suevos

A 29 díes vencíos d’avientu de 2023

Torna en castellán en repdiv.blogspot.com

Milán navidiegu

 

Ta Milán impresionante, como siempres, y especialmente nestes feches navidiegues. Ye toa ella una lluminaria, y dicen que ye la que más rellume dende’l balcón estraordinariu de la Estación orbital. Ye como una obligación pa la ciudá, muncho más allá que los leds de ricu nuevu del alcalde Caballero. Una devoción al llume que vien de la so vitola de capital económica d’Italia dende va yá muncho tiempu; enantes del Risorximientu inclusive.

A min, que la visita me toca pela parte familiar, pídeme’l cuerpu averame a les siempres concurríes, casi tumultuoses, galeríes de Vittorio Emmanuele, pegadines a la Piazza del Duomo, y que, pa estes feches, llanten nel cruce de les mesmes un abetu navidiegu descomanáu, cada añu más llamativu, y cabría djcir que suntuosu.

Los años caberos fo la conocida firma Swarovski la responsable d’afatar, o diseñar si prefieren, los ornamentos del navidiegu abetu. Y fo un ésitu enorme en cuantu a públicu, a comentarios, ya, induldablemente, en cuantu a proyección publicitaria de la firma, dalgo que llevó esti añu a dar un saltu cualitativu, o debiera dicise crematísticu, a la operación de rellaciones públiques.

El blincu, más que saltu, vieno de la mano de Gucci que diseñó un abetu con baules, maletes, maletines y bolsos de la firma pernomada que, dicen, supunxo en conxuntu’l desembolsu d’un millón d’euros. Sí, un millón, ye lo que se comenta. Y too pa nada, o, a lo menos, pa refugu verbal de los milaneses, y visitantes ente los que m’incluyo, que opinen, opinamos, que’l resultáu ye un adefexu qu’atenta a la tradición, y da un saltu más na carrera mercantil na que se tien camudao lo qu’enantes yera familia, tradición y relixón. Ye lo qu’hai, y a min, amás, recuérdame’l nuesu xixonés árbol de sidra.

Lo mercantil va tan lloñe que n’Italia, tamién estos díes, namái se fala del millón d’euros de multa que-y solmenaron a la más famosa de les influencers italianes, Chiara Ferragni, quien l’añu pasáu llanzó una campaña de panettone, supuestamente benéfica, pola que se tendría embolsao esi millón de la multa, y unviao 35 mil modestos euros pa beneficencia. Toa una bullshit, n’inglés pa torgar la mala olor n’asturianu, que menacia l’imperiu publicitariu que la señora montara en redol a la so persona y la del so home, un raperu italianu pernomáu. Coses.

Polo demás, la tarrecible señora Meloni, peor pa dalgunos que’l propiu Duce, paez que lleva bien al país, con meyora en casi tolos parámetros, especialmente nel apreciu de los italianos, según encuestes.   

Feliz Navidá.

Raúl Suevos

A 22 díes vencíos d’avientu de 2023

Torna en castellán en repdiv.blogspot.com

Ucrania, el choque de civilizaciones

 

El títulu de la tribuna remembra un llibro de Samuel Huntington, un cientista políticu norteamericanu, o sociólogu, que dambos, en función del productu, comparten DNA. Una obra que supunxo una conmoción a nivel mundial por cuantu pronosticaba un mundiu en tensión y conflictu constantes, particularmente nes zones fronterices de la cultura islámica, a la que axudicaba un afán universalista y belixerante, y, poro, xeneradora de choques colos sos vecinos.

Nin que dicir tien que a don Samuel partieron-y la cara, dialécticamente falando, en munchos foros internacionales, siendo particularmente duros los apóstoles de lo políticamente correuto, del buenismu; y eso qu’entós entá nun se desendolcara la filosofía “woke”, tamién nomada wokismu. El casu ye que, a tamañu desatín hobessianu, llueu-y salió una respuesta que, asorái-vos, vieno de la mano de la nuesa particular llumbrera política nacional, el señor Zapatero, quien, n’asociación con un paladín de la democracia, entendida ésta a la su manera personal, como ye’l señor Erdogán, presidente turcu que va pasar a la historia como enterrador de Kemal Ataturk, montó –diba escribir creó pero paecióme escesivu- el tingláu conocíu como Alianza de civilizaciones.

El negociu malapenes tien dao de sí, más allá d’unes cuantes axuntances y viaxes a cuenta del presupuestu nacional que foron cubiertes puntualmente pola prensa afín, pero poco más. El choque, una y otra vegada, paez superar en cuantu a aiciones manifiestes a l’alianza, y los terroristes de Hamás, el 7 d’ochobre pasáu, encargáronse de recordámoslo convenientemente. Ye lo qu’hai.

N’Ucrania nun paez dase esi choque, o sí. Dambos contendentes, un invasor y un invadíu, son cristianos ortodoxos, pero, si güeyamos de cierca, guipamos qu’un, magar les sos faltes y contradicciones. Ucrania, lleva años trabayando pa formar parte, como igual, del club de les democracies occidentales, dalgo que’l so perrecien nomamientu como aspirante a l’adhesión a la XE atestigua; l’otru, Rusia, ye una democracia illiberal, axetivu compasivu nesti casu, que tien al gruesu de la so población, cola esceición de Moscú y San Petersburgu, nun estáu d’atrasu social que fae que los sos soldaos, en cuantu tienen oportunidá, roben toa llavadora o frigoríficu que se pon al algame de los sos camiones pa facelos llegar a les sos cases, en munchos casos ensin augua corriente y letrinas nel esterior de les mesmes.

Ye’l choque de Putin pa enzancar que los so conciudadanos se decaten de que n’Ucrania, magar la guerra entamada por Moscú dende 2014, vívese muncho meyor qu’en Rusia. Dalgo que diba acabar con Putin y la cleptocracia que lu sofita. Un choque de civilizaciones.

Raúl Suevos

A 18 díes vencíos d’avientu de 2023

Torna en castellán en repdiv.blogspot.com

De boda n'Habana

 

Nun sé si va salir nes páxines del papel couché, o del corazón, tamién nomáu asina, pero, sicasí, lo cierto ye que va dellos díes hebo n’Habana una boda de les d’enantes, de cuando la xente bien diba de llargu, y n’iviernu, iviernu cubán,  llantábense estoles de visón pa dir a les cenes nes cases postineres del barriu del Vedado.

Güei nel barriu antaño de clas alta nun queda un res, quitando’l Muséu de les artes decoratives, vieya casa de la marquesa de Revilla, propietaria tamién de la Manzana de Gómez, un centru comercial magníficu xunto al Parque Central de principios del sieglu XX, y  demientres dellos años auguriu inmobiliariu decrépitu. Una promesa decadente camudada en gran hotel de cinco estrelles malapenes va cinco años, rexentada pela cadena Kempiski, y agospiu suntuosu de los invitaos d’esta boda pretendidamente lluxosa.

A la marquesa espropiaron-ylo too, allá per mediaos de los sesenta del sieglu pasáu, hasta la cacía de plata, emparedada convenientemente pol caberu en salir, fo requisada, y anguaño exhíbese nel coqueru muséu xunto con fotografíes de visitantes illustres de la casa, como los condes de Barcelona o la duquesa d’Alba. A lo menos la so condición de muséu sálvalu del abandonu inherente a la condición d’habaneru. Ye lo qu’hai.

El bodorriu, del fiu del amu de Vima, una distribuidora alimenticia d’orixe gallegu qu’espliega en casi tolos países caribeños, sedría, cola so exhibición de lluxu casi ilimitáu, una mocada a los cubanos d’a pie, si nun fuera porque yá tienen los carriellos insensibles -y lo que-yos queda hasta que Raúl tenga’l detalle de morise-, pero la realidá ye qu’ellí pocos se tienen enterao.

Boda na catedral, preboda nel hotel Kempiski, el cabaret Tropicana pieslláu pa los invitaos. Tou un espliegue del que namái dalgunos cubanos, los pasiantes ocasionales, y xerifaltes escoyíos del réxime, tuvieron noticia. Una pena si tenemos en cuenta que la firma, Vima, nació y creció na Islla bonita, casi siempres baxo l’amparu de Fidel y dempués de Raúl, si bien na patria, nin siquier la gallega, tengan mui nidio quién ye y cómo algamó tan impresionante desendolcu empresarial.

Lo cierto ye que, tengo l’alcordanza de cuando ellí vivía, la calidá de los sos productos ye ínfima, non apta pa consumidores patrios, y los so precios, comparativamente, resultaben disparataos, pero l’ausencia de competencia camudábalos, nel llendáu mercáu cubán, en refinaos.

L’espliegue lleváu a cabu n’Habana tien sabores snobistes d’última xeneración, y resulta pornográficu metanes la miseria qu’atenacia a la población de la islla.

Raúl Suevos

A 16 díes vencíos d’avientu de 2023

Torna en castellán en repdiv.blogspot.com

Si gana Rusia pierde Europa

 

Llueu van cumplise dos años de la invasión d’Ucrania llevada a cabu poles tropes de Vladimir Putin. Dos años nos que los europeos escubrimos al pueblu ucranianu; a la so intrallable voluntá de vencer; a la so intención inquebrantable de prevalecer como nación con identidá propia y diferenciada de los rusos. Una leición de patriotismu y resiliencia que debería ayudar a fortalecer la propia personalidá de la Xunión.

Tán siendo años esprecetadamente llargos, nos qu’Europa, como conxuntu, supo reaccionar énte lo que s’atalanta, más allá de la imposición de la fuercia percima de la resolución pacífica de conflictos, como un peligru futuru nidiu pa la propia esistencia de la Xunión; dalgo que los países vecinos a Rusia conocen bien y supieron tresmitir al restu d’Europa. Agora, cola cansedá d’unos y los intereses inconfesables d’otros, paez que les coses entamen a camudar.

Rusia pierde la guerra nos frentes de batalla gracies al valir insuperable de los homes y muyeres d’Ucrania, pero ta escomencipiando a ganar la guerra pente medies la compra de voluntaes polítiques, como la del populista nacionalista que dirixe Hungría, o los republicanos siguidores de Trump, dispuestos a too con tal de desallugar al presidente Biden de la Casa blanca. Les so operaciones d’información, o sicolóxiques, funcionan muncho meyor que los so medios y unidaes de combate, y amenorguen la voluntá de dalgunos pa siguir sofitando a Ucrania. Nun podemos, nin debemos, baxar la guardia.

La Política d’Apaciguamiento fo una “actitu” política de los países europeos, encabezada pol premier inglés, Neville Chamberlain, na década de los 30 del sieglu pasáu, que, como los fechos posteriores amosaron, namái sirvió pa envalentonar a un Adolph Hitler que, primeramente, nun les tenía toes consigo. La Segunda Guerra Mundial fo’l resultáu que dalgunos anunciaron.

Anguaño atopamonos nun momentu que recuerda al Apaciguamientu. Tenemos a un autócrata lliderando una democracia illiberal en Rusia con intenciones imperialistes pernidies, que la invasión d’Ucrania  punxeron de manifiestu pa los que nun quisieron enterase de l’anexión de Crimea, y que, si nun ye frenáu, tres un periodu de recuperación, va llanzase, ensin dala dulda, a la recuperación del vieyu territoriu soviéticu. Ye lo qu’hai.

Los que n’Europa entamen a falar de soluciones diplomátiques, como nos tiempos de Chamberlain, suponen una quinta columna europea que namái tien como salida la destrucción d’Ucrania y el so pueblu, nun primer pasu, y llueu’l sometimientu de la propia Xunión Europea, que tendrá demostrao la so incapacidá pa dexar de ser un nanu político, lo que la va llevar a perder también la so potencia económica, y ello ensin dexar de ser un viérbene militar.

La victoria d’Ucrania ye la de nueso.   

Raúl Suevos

A 16 díes vencíos d’avientu de 2023

Traducción en castellán en repdiv.blogspot.com

España nun merez un gobiernu que-y mienta

 

Esa afirmación rotunda nun me pertenez. Munchos vanla recordar en boca d’Alfredo Pérez Rubalcaba, al tiempu man drecha d’un Zapatero, secretariu xeneral de los socialistes y aspirante al sillón de presidente de gobiernu nes eleiciones que debíen celebrase tres díes dempués d’esta salida del, mefistofélicu más que maquiavélicu, Rubalcaba.

L’afirmación llapidaria sofitábase en que’l gobiernu Aznar, veinticuatro hores dempués del atentáu d’Atocha, entá axudicaba la responsabilidá a ETA en llugar de al terrorismu islámicu, dalgo que, pa entoncenes, Rubalcaba, que caltenía los sos peones nel Ministeriu del interior, sabía perfeutamente. Tarrecible érru de comunicación institucional en viésperes eleutorales y que diba acabar costando-yos les eleiciones a los populares, y retrasando l’aportar de Rajoy per casi ocho años.

Al día viniente produxose una manifestación multitudinaria na que’l gobierno, más que los terroristes, paecía’l responsable del atentáu, y nes consiguientes eleiciones l’home del talante, Zapatero, faríase col poder, entamando’l fin de la Transición y escomencipiando una sienda de polarización política y social qu’anguaño, col doctor Sánchez al mandu, ye’l caldu nel que los españoles fervimos, yá non a fueu floxu, ca día.

Les mentires de güei nun van bañaes en sangre, o sí, anque sangre vieya, casi seca, y a la que se trata de tapar con un mantu d’escaecimientu. Ye la sangre de los asesinatos ensin resolver que los socios del PSOE pretenden facenos esquecer. Pero’l gruesu son bilurdies en forma de promeses incumplíes, en cascada, con “cambeos d’opinión” sobreveníos pol bien d’España pero que dexen al votante estremecíu énte la realidá de la so propia insignificancia énte’l poder de los gobernantes d’anguaño; énte’l so papu y la so falta de mínima decencia. En cualquier casu mentires son, pero ensin eleiciones a la vista bilurdies impunes.

Nel 2005 la madre de Pagazaurtundúa, socialista asesináu por ETA, escribía-y al anguaño voceru socialista nel Congresu: “Pachi, vas dicor y facer munches más coses que me van xelar el sangre”, y por lo que vamos viendo nestos díes caberos namái tamos na fase entamadora de lo qu’un doctor Sánchez, al frente del gobiernu español más minoritario que tengamos conocío, ta dispuestu a facer con tal de caltenese nel sillón de la presidencia del gobiernu.

Dambos, Rubalcaba y Pilar Ruiz, teníen razón, y les sos pallabres son plenamente vixentes; desgraciadamente, el principiu de bona fe, o el llatín “pacta sunt servanda”, nun paecen tener fuercia, nin siquier moral, na política d’agora, y, llamentablemente, el votante, debiera tomar la so decisión baxo esta premisa. Ye lo qu’hai.

Raúl Suevos

A 15 díes vencíos d’avientu de 2023

Torna en castellán en repdiv.blogspot.com

Lo que pintamos n'Europa

 

Les redes avisénme que’l mio nome apaez en dellos periódicos europeos, dengún español, rellacionáu con otros cientos de roblantes d’una carta abierta al presidente Biden, pidiendo-y que dé’l vistu bonu al emplegu del armamentu USA más allá de les fronteres ucranianes; una midida que podría significar la supervivencia de la propia Ucrania nunos momentos nos que’l bloquéu republicanu nel Congresu de Washington menacia con arronciar l’ayuda norteamericana. Ye lo qu’hai.

El casu ye que yo mesmo maraviyome de la singularidá del mio nome en tan amplia llista europea. Una rellación na qu’apaecen nomes de tolos estamentos de la sociedá europea y de cuasi tolos países de la Xunión. Una llista que, nel mio casu, naz del mio periodu como direutor de comunicación del Eurocuerpu, n’Estrasburgu. Una ciudá, perrica, que cuenta cola segunda see del Parllamentu européud, au s’aconceyen una selmana cada mes del periodu de sesiones; un Conseyu d’Europa, la desconocida, vieya y perimportante institución europea; el Tribunal de drechos humanos européu; y la Farmacopea europea; toa una riestra d’instituciones que lleven apareyao’l que na ciudá esistan más de cuarenta embaxaes de tol mundiu. Un negociu rondu.

Vien esto a cuentu de la importancia que’l gobiernu, y la propia interesada, y-tienen dao al nomamientu de la señora Calviño pa un puestu de dirección nuna institución europea, el Bancu d’inversiones. Un nomamientu que nun tien servío pa poner n’evidencia, a lo menos yo nun lo percibí nos medios de comunicación, la indixencia absoluta que caltien España en cuantu a sees d’instituciones europees, o mundiales, que tamién les hai. La nuesa institución internacional principal, a lo menos pol interés amosáu, paez ser el sol mediterráneu, y esi, según va’l clima, paez tener tamién un percorríu perecederu.

L’Eurocuerpu, la institución a la que pertenecí temporalmente, cuenta con una plantilla de más de 700  persones; toes ellas, quitando los franceses, un 30% más o menos, cuenten con sueldos internacionales, esto ye, bastante apetecibles, que gasten principalmente en vivir na ciudá, pagar los colexos de los fios, viaxar pola redolada, too ello pa contentu del texíu económicu de l’Alsacia. Como facen el restu de miembros de les otres instituciones yá citaes. Un negociu codiciable.

La carta de la que soi firmante, y el nomamientu de la señora Calviño, son, siendo fundamentalmente diversables, amueses iguales de la falta de visión de la aición exterior de nueso a tolos niveles, dalgo de lo que’l gobiernu anguaño nun ye más que heriede y continuador d’una política yá, desgraciadamente, asentada ente nós.

Nun son los puestos, son les sees ¡mazcayos¡

Raúl Suevos

A 13 díes vencíos d’avientu de 2023

Torna en castellán en repdiv.blogspot.com

El quilombu hispanoamericanu

 

Esti domingu 10 d’avientu ye un día de gloria n’Arxentina. Más allá de la personalidá del presidente ñuevu, que va dar, probablemente, p’abrir munches páxines primeres nel futuru, lo que queda y se celebra ye que los arxentinos decidieron dar un volantazu a los destinos de la nación.

La pallabra quilombu, mui usada en Chile y Arxentina, tien una aceición como lupanar, prostíbulu, o burdel; y una segunda como caos, desordre o barullu, que también tien ganao una importancia rellativa y usu n’España; y ye esti significáu segundu’l que paez que describe lo asocedío n’Arxentina, au la situación política tien llegao a talu nivel de deterioru que los arxentinos, polo que se ve, decidieron votar, non pa escoyer al señor Milei, que tamién, sinon pa deshacese del Kirchnerismu, o lo que ye lo mesmo, el peronismu na so versión más decadente.  

Un pocu de quilombu tamién podemos atopalu nel sequitu del rei d’España –a ver si lluéu puede poner en lista de revista a la princesa Leonor pa que lu sostituya nestos viaxes- que, quiciabes pol refugu manifestao pol doctor Sánchez, namái tien merecío ser acompañáu por un secretariu d’estáu, tan válidu como un ministru a los efeutos de refrendar los actos del xefe del estáu, pero que tien servío pa avivar la llaparada, nunca apagada, de les renedielles de la política nacional. Ye lo qu’hai.

El quilombu políticu arxentín tiene difícil solución, pero paez obligao da-y un marxe de confianza al presidente ñuevu, que dempués de meses, años inclusive, predicando barbaridaes, agora va tener que dar, intentalo a lo menos, trigo. Y namái tenemos que güeyar al casu italianu, con una Georgia Meloni, de la que s’esperaba poco menos que’l fundimientu del so país, y qu’anguaño, malapenes un añu dempués, rexunta l’almiración d’Europa, y el favor, según encuestes, de la mayoría de los sos conciudadanos.

Arxentina, sicasí, va poder camudar les sos opciones en eleiciones ventures, pues trátase d’una democracia plena y efeutiva, na que l’alternancia nel poder produzse ensin dalu problema, como amuesa la so historia recien. Un espeyu nel que podríen güeyar les so vecines Venezuela, Nicaragua, o Cuba; países nos que, tres l’apariencia d’eleiciones, un paripé realmente, los sos dictadores perpetúense nel poder, a costa de la llibertá de los sos conciudadanos.

El quilombu venezuelanu, ca día más arrequexáu, agora, y dempués d’abandonar demientres dellos años les so xustes reclamaciones, espliega tropes na so frontiera con Guyana y reclama la cuenca del riu Esequibu, nuna fuxida haza alantre que puede acabar baillando un xoropu de sangre.  

Raúl Suevos

A 9 díes vencíos d’avientu de 2023

Torna en castellán en repdiv.blogspot.com

La dependencia israelí de nueso

 

Recién mos dexó Henry Kissinger, un xudíu alemán superviviente del xenocidiu desendolcáu polos esbirros de Hitler na Europa d’entoncenes ente los componentes de la so raza y relixón. Un campeón de la ciencia política que llevó ente les sos manes, direutamente o al traviés de los so escritos, les rellaciones esteriores del so país d’adopción, los Estados Xuníos, l’Imperiu.

Kissinger yera un paladín de la teoría realista nes rellaciones internacionales, nes que los estaos son protagonistes y la so sobrevivencia l’oxetivu a algamar polos so mandatarios. Una teoría que ye la que tien marcao l’aportar del mundiu modernu cuasi ensin esceición.

Nel casu español nun paez muncho nidio que los nuesos gobernantes tengan una ideia muncho clara d’esta teoría, por simples que les sos premises pudieran paecer, y, el nueso presidente de gobiernu anguaño, responsable d’esa política, paez empecináu en procuranos, un día sí y otru tamién, descomanaes dosis d’incertidume y preocupación.

Aínda nun algamamos a recuperanos de la sorpresa del so cambéu de postura, rotundu y sorprendente, tocantes la posición española –antigua potencia responsable- respeuto al conflictu del Sáhara. Un cambéu que tevo como añedío la casi rotura de rellaciones con Arxelia y el deterioru radical de les nueses rellaciones comerciales con aquel país, hasta entós el nuesu proveedor enerxéticu principal. Y ello ensin meyora aparente de les siempre tenses rellaciones con Marruecos.

Agora, y como presidente rotatoriu del Conseyu Européu, tien viaxao a Israel au, coles sos declaraciones, llogró encabronar al gobiernu israelí, mientes aplaudíen los portavoces de Hamás, el grupu terrorista que provocó el conflicto anguaño. Tou un exemplu de lo que nun ye la teoría realista de les rellaciones internacionales.

Nun paez fácil atopar beneficios pa España nesti movimientu del doctor Sánchez pero, teniendo en cuenta que namái caltenemos planes de continxencia militar con rellación al nuesu vecín del sur, convien nun dexar de llau lo que supón la industria militar israelí con respeutu a les nueses fuercies armaes, y les de Marruecos.

España cuenta, acordies información pública, con misiles Spike pa helicópteros y cazabombarderos; el sistema Arrow 3 de defensa aérea; los sistemes de vixilancia Hermes 900 y el Heron 1, asina como’l satelital EROS; toos ellos d’importancia fundamental pa la nuesa defensa y necesitaos de mantenimiento permanente y reposición de materiales y repuestos.

Nel casu marroquí atopamonos colos mesmos sistemes d’armes y vixilancia, dalgo que, teniendo en cuenta’l recien reconocimientu del estáu d’Israel per parte marroquí, y la tebia posición énte’l conflictu amosada pel so rei, debería preocupanos si, llegáu’l casu, los planes de continxencia conviertense de sopitu en cruda realidá. Ye lo qu’hai.    

Raúl Suevos

A 5 díes vencíos d’advientu de 2023

Ente Cesarismu democráticu y Democracia illiberal

 

El primer conceutu, el de Cesarismu democráticu, ye un términu políticu desarrolláu pol venezuelanu Vallenilla Lanz nun llibru asoleyáu nel llonxanu 1919. Acordies con él, pártese d’un líder carismáticu qu’algama’l poder, inclusive pente medies d’eleiciones, pa depués perpetuase, por aciu del opacamientu o control de les instituciones democrátiques, el cultu a la personalidá del líder, y l’emplegu de la fuercia si se fae necesario. Teniendo como exemplo rescamplante a Xuan Domingo Perón, y en tiempos más averaos, al inefable comandante Chávez. Dexamos a Fidel Castro de llau por ser un casu paradigmáticu de dictadura militar.

El segundu, esto ye, el de Democracia illiberal, ye muncho más recien, y aportanos de la mano del analista políticu estadounidense Fareed Zakaria que lo diba allumar nun artículo memorable de 2003 nel que-y alxudicaba como carauterístiques les siguientes: L’accesu al poder pente medies eleiciones llimpies pa lluéu acutar l’exerciciu de llibertaes; recortar l’imperiu de la llei mediante’l control del sistema xudicial; la supeditación absoluta del poder llexislativu al executivu, y, finalmente, la medría del control y subordinación de los medios de comunicación pública. Un sistema políticu que tendría como exemplos notorios al turcu Rayip Erdogan, y más cerque al otrora conspicuu Victor Orban d’Hungría.

Vien too esto a cuentu de la noticia de l’anulamientu por parte del Supremu del nomamientu de la señora Valerio como presidente del Conseyu d’estao, por nun ser xurista de prestixu, o tamién l’anulamientu del nomamientu de la señora Delgado como fiscal de la Sala militar del Supremu por evidente desviación de poder; o l’inéditu pronunciamientu negativu del Conseyu Xeneral del poder xudicial en cuantu al propiu nomamientu del Fiscal xeneral  por falta de condiciones morales. Dalgo que nunca enantes asocediera. Tou un rosariu de señales alarmantes pa la nuesa democracia.

Son alvertencies que mos dicen que, enagora, el poder xudicial aínda ta vivu, pero son tantos los peligros que lu acesmen, especialmente coles menacies siniestres que suponen les referencies al “lawfare” nel proyeutu d’amnistía, anglicismu que señala la xudicialización política interesada, que debemos nun perder de vista’l fechu de que l’acabamientu de la independencia xudicial ye direutamente proporcional a la nuesa consolancia como ciudadanos, pa pasar otra vegada a la de súbditos, pero agora d’un secretariu xeneral, non d’un rei. 

El sistema políticu de nueso da un poder cuasi absolutu, demientres la duración de la llexislatura, al presidente del gobiernu, camudándolu cuasi nun autócrata, y, como pudimos ver, los controles y equilibrios que la llei marca, nun siempres son abondo pa caltenemos na sienda constitucional. Ye lo qu’hai.

Raúl Suevos

A 30 díes vencíos de pallares de 2023

Torna en castellán en repdiv.blogspot.com