Gastronomía, paisaxe y paisanaxe

 

A fuercia d’oyelo y dicilo acabemos por convencenos qu’aquel eslogan, afortunada creación d’un publicista, zarraba una verdá fondamental, anque la parte gastronómica, ensin dulda curiosa, implique más consumu calóricu del que la mayoría de los modernos urbanites necesita; sicasí, ye induldable que’l paisaxe asturianu, nos sos valles, costes y montañes, tres la milenaria aición de la mano del home tien llograo un conxuntu qu’impresiona, pola so belleza, a quien mos visita per primera vegada.

Nos tiempos caberos, dalgunes aiciones per parte del llexislador paez que se empobinen a resaltar l’aspeutu natural de la rexón –ehí tenemos el poder creciente de los parques nacionales y la menacia recien del llobu- col riesgu de que los últimos llabradores y ganaderos tiren la toalla y dexen el mediu rural como un érmu deshabitáu. Ye lo que hai, dirán dalgunos; pero ensin paisanaxe num me presta’l paisaxe, digo yo.

A mim, por razones profesionales, tocóme vivir en dellos países y estudiar idiomas estremaos. Ye daqué que fice con placer pues ello permitíame comunicame direutamente cola mio redolada, y asina descubrí que l’alemán ye tarreciblemente difícil, o que l’árabe ye una llingua meraviosa a la que’l castellán-y debe milenta pallabres. Les llingues, toes, son la primer y más importante espresión del home como ser social, y cada vegada qu’una d’elles desapaez con ella se va una parte importante de la bayura cultural de la humanidá.

Cuando pude, decidí dedica-y tiempu a la llingua de la mio tierra, l’asturianu. Conté pa ello cola meraviosa ayuda d’una institución singular y exemplar, l’Academia de la Llingua, que realiza cursos d’asturianu na so see braniega de Cangas de Narcea dende va yá abondo d’años; y anque en casa los güelos, en Marentes, Ibias, lo que se falaba yera la fala, también nomao eonaviego, tevi que centrame por cuestiones alministratives nel asturianu normalizao de l’Academia, llingua especialmente musical y gratificante pa quienes mos averamos a ella con amor, l’amor que toa espresión cultural requier.

Va unos pocos díes aprobóse nel Congresu una moción impulsada pol filoetarra Bildu, y sofitada polos grupos d’esquierda, pa facer cooficiales l’asturianu y l’aragonés, lo que desendolcó los esperados comentarios d’un y d’otru signu na rexón; comentarios qu’anuncien futures esfriegues polítiques que mos distraigan d’asuntos más importantes como son la vieyera imparable del Principao, la falta d’espectatives pa la mocedá, por citar dalgunos. Nun va ser la cooficialidá, por mui “amable” qu’ésta seya, la qu’igüe la escayencia d’Asturies.

Asturies cuenta con una Llei d’Usu de la Llingua asturiana que nunca se desendolcó en fondu y forma, y el gobiernu del Principáu pue articular midies pa que la Llingua creza dientro d’esi marcu llegal ensin recurrir a una cooficialidá que supondría romper la concordia anguaño esistente na rexón, separtándomos en dos bandos –daqué cuasi inherente a los políticos modernos- y camudando un bien cultural, la Llingua, nun preséu políticu susceptible de ser arrefundiao escontra la otra parte.

Tarrezome que lo curioso del paisanaxe asturianu corre peligru si nun facemos bien les coses. ¿Quiciabes un referéndum mos sacaría de duldes?

https://abellugunelcamin.blogspot.com/2019/08/cangas-de-narcea-el-shangri-la-de-los.html

Raúl Suevos

A 28 díes vencíos de marzu de 2021

Torna en castellán en repdiv.blogspot.com

L'otru debate nacional

 

Nestos tiempos de covid too se convierte nun sinvivir. tábemos tan tranquilos –ye una manera de dicilo- esperando a ver si la cuarta folada del bichu mos atacaría enantes o depués de Selmana Santa cuando saltó la llebre murciana y tres ella se llanzaron tolos podencos de la política ¿o yeren galgos? Tanto da. Aquello dio pa una cadena de acontecimientos políticos que, lo que ye güei, puen acabar cola torna a Vallecas del vicepresidente del gobiernu –a lo menos pa facer campaña- y de paso col entamu de la desapaición del partíu naranxa.

Too un procesu cataclísmicu que debería ser abondo pa responder a les necesidaes d’aforfugu y tensiones que mos costruyimos los españolitos d’a pie pa dir tirando nel nuesu devenir cotidianu. Pero non, nun ye abondo un follón políticu nuevu, puesto que’l contuberniu catalán paez que mos creara callu y nin los meneos del flequillu de Puigdemont, les babayaes de la Rahola o la vuelta de Laporta consiguen descolocanos. Necesitamos daqué más fuerte pa trescalanos.

Equí ye au apaez esi “pijoaparte” modernu, antiguu guardia civil lladrón de multes qu’abandonó’l Cuerpu minutos enantes de ser espulsáu. Un tipu clásicu na España de Rinconete y Cortadillo, la de siempres; un gañán de labia fácil a la caza del braguetazu con Teresa. Una historia vieya que, nesti casu, ponía’l puntu de mira na fia de “la más grande”; un oxetivu fácil a tenor de cómo foron les coses, anque más tarde, depués de dos barrigues, la paloma abandonara al chulapu.

Dende aquella dómina de cortexu, asaltu y refugu munchos años pasaron, y tamién esclusives del trepa convertiu n’especialista de la prensa llamada rosa, nonde tien vendío los pleitos cola so muyer vieya, los discutinios, los líos propios y de la so fia. Tantos años que hasta ésta tien aniciao una carrera bien codalosa na televisión de les coraes. Too paecía baxo control hasta esta selmana, selmana de grandes sorpreses como ya señalamos.

La silente y abandonada madre, enantes tamién esposa, rompió’l so silenciu d’años, y anque dalgunos intuíen, según dicen, a partir de los dictámenes xudiciales, parte del drama ocultu tres los muros de la domus, a la mayoría del país dexólu patidifusu la so intervención, abondosamente anunciada, na cadena de les coraes; au protagonizó un de los programes más vistos de la temporada televisiva.

A min, qué quieren que-yos escriba, el guardia felón, precisamente poro, por selo, predisponme negativamente, anque la intervención veloz ya interesada nel asuntu de dalgunas polítiques de rellumbrón nun creo que-y faga dalu favor a la agora comprendida madre que, en cualquier casu, tá llenando cola so intervención sorpresiva les caxes de la cadena de les coraes, y les propies. Veremos si non tamién les del “pijoaparte”. Y nosotros debatiendo.

Raúl Suevos

A 23 díes vencíos de marzu de 2021

Torna en castellán en repdiv.blogspot.com

Stand by me, Inés

 

Hai dellos cancios tan completos que superen ensin problemes el pasu del tiempu y que, amás, proponense como evocación pa múltiples situaciones. Stand by me, ye un d’esos; compuestu por Ben King, foi versionáu en munches ocasiones, la más conocida quiciabes seya la d’Otis Reading pero, esta mañana demientres conducía, la que me trescaló foi la del gran Ray Charles que siempres algama a dar un matiz especial a les sos interpretaciones.

El canciu, puru Rithm and Blues fala d’amor, d’un amor que da a quien lo siente poderes sobrehumanos pues col sofitu de la persona amada pue sobreponese a les hores más escures de la nueche, a los cataclismos más destructivos, a la cayida de los cielos sobro les nueses tiestes, al argayu de les montañes nel mar. Ye un amor que ye a facenos superar el fin de los tiempos.

Yo escuchaba a Ray Charles y nun yera a quitame de la mente a la probe Inés Arrimadas, demientres dellos años heroína pa munchos y agora intentando sobrevivir metanes del fluxu piroplásticu que sal ininterrumpidamente de la boca del volcán cheirientu nel que se tien convertío nos tiempos caberos la política española. Un fluxu que, como’l que nel añu 79 espulsó’l Vesubiu, menacia con llevase per delantre a tolos habitantes de la villa de la moderación, del centru; y nun podía dexar d’entrugame que diba a ser de nós metanes la nueche más escura ensin tener al llau a Inés, ensin Ciudadanos, ensin un partíu gonciu que temple la polarización radical na que se mueven los supuestos dirixentes del país de nueso.

Porque nun mos enguademos, la desapaición del centru supon la muerte de la tercera España y, poro, la torna al bipartidismu radical, nel que los alversarios se camuden n’enemigos a destruyir, y  nel que los alcuerdos d’entrambos estremos colos nacionalistes namái facen qu’afondar la dolencia a costa del plasmu y malestar del restu de la nación. Ye, esa España que desapaez, la mesma que se foi cola cayida de la UCD, la mesma que fizo posible la transición política d’un réxime autoritariu a otru democráticu, permitiéndonos a los españoles protagonizar un periodu de paz y crecimientu que s’estudia anguaño nes facultaes de ciencies polítiques de mediu mundiu, lo que fai entá más patética la situación de desamparu na que güei s’atopa la ciudadanía española.

Asina que nun sé qué va ser de toos nosotros nestos tiempos d’afliximientu si Inés nun aguanta la turniada metanes esta nueche escura.

Raúl Suevos

A 19 díes vencíos de marzu de 2021

Torna en castellán en repdiv.blogspot.com

De consiglieres y spin doctors

 

Sant’Adrea in Percusina ye una aldea pequeñina que s’atopa nel vieyu camín de Florencia a Siena, y que, anguaño, pasa desapercibiu pa los turistes y viaxeros que con toa rapidez s’esmucen pola averada autovía que xune estes dos magnífiques y hestóricas ciudaes de la Toscana italiana. Nel Renacimientu, cuando Florencia allumaba al restu del mundiu y los Medici exemplificaben l’arte de gobernar, esistía una fonda con bodega na que los viaxeros descansaben enantes de siguir viaxe y, quiciabes, contaben al vecín pernomáu que per ellí se dexaba cayer cómo diben les coses pola ciudá de Dante. Nicoló Machiavelli pasó ellí dellos años desterráu por tenese allineao col fraile Girolamo Savonarola demientres el gobiernu republicanu de ésti allumáu dominicu, daqué que los Medici nun escaecieron cuando recuperaron el gobiernu de la ciudá.

La vieya casa del pensador ye güei un pequeñu musein nel que llama l’atención un ventanu dende el que se pue apreciar, de llueñe, la cúpula y el campanile del Duomo florentín. Florencia, tan cabera y tan prohibida pa Machiavelli, debió ser motivu de fondera señardá y tamién, afortunadamente, sacalliñu pa la escritura d’una obra inmortal de la ciencia política, El Principe, -namái comparable al Arte de la prudencia de Baltasar Gracian-, cola que l’escritor pretendía ganase’l favor del señor de la ciudá pa poder tornar a ella. Nella pue alcontrase un compendiu de conseyos pal gobiernu conducente de los reinos y repúbliques del aquel entós y qu’anguaño, dicen, sigue siendo llibru de cabecera non yá de príncipes o gobernantes, sinon de los sos Spin Doctors, que ye l’anglicismu col que se conocen a los conseyeros modernos d’aquellos que tienen la responsabilidá del gobiernu.

Nel país de nueso’l consigliere por excelencia paez ser Ivan Redondo, al que se-y atribuyen toles salses qu’aderecen el menú políticu del nuesu presidente de gobiernu, too paez nacer, d’acordies colos analistes políticos, de la so mente maldadosa, pa dalgunos, o xagaz pa otros. Anque quiciás namái seya maquiavélica. Sia que non, ye esti un puestu que dende los tiempos del míticu Tom Hagen, aquel que bisbisaba a les oreyes del Padrín, paecía tener desapaecío y qu’agora podemos atopar mui bien descrito en Borgen, una serie que retrata’l xuegu partidariu y enllenu de trapaceríes que se desendolca nuna Dinamarca ficticia. Ye como si l’arte de la política se empeñara n’entrar inclusive nel nuesu tiempu de folganza familiar.

El caberu resurdir del consigliere vien de la mano de Miguel Ángel Rodríguez, MAR, que ya fuera chuchuriador d’un mozu Aznar nel so triunfal camín  de Valladolid a Madrid y que, tres dellos años d’ostracismu, como Machiavelli, paez tornar como acompañante Spin Doctor de la resplandiosa estrella madrilana Isabel Díaz Ayuso. Quiciabes lu veamos regresar triunfal a la Piazza della Signoria. Quién sabe.

Raúl Suevos

A 12 díes vencíos de marzu de 2021

Torna en castellán en repdiv.blogspot.com

D'infantes, militares y trampantoxos

 

Güei la gran noticia del día ye’l fechu de que les Infantes se vacunaron nel emiratu de Dubái aprovechando una visita al so pá’l rei Xuan Carlos. Al paecer, si tenemos en cuenta’l tratamientu que la xauría mediática dio al acontecimientu, tamos énte un de los mayores atentaos a la moral y la salú de los españoles, anque a min, que naide m’entrugó, importame un res l’asuntu, puestu que a dengún español-y quitaron la so vacuna y tampocu tán obligaes a dar exemplu dende’l momentu que nun pertenecen a la Familia real. Asina que, ¿de qué tamos falando?

Quiciabes s’esplique dende l’ataque inmediatu y gafientu del nuesu dilixente vicepresidente, al que-y faltó tiempu p’apelar a la necesidá d’implantar una república basándose na mala praxis de la Corona. Nin que dicir tien qu’esti escándalu, que nin siquier ye asuntu, va servir pa sofitar la petición d’una comisión nel Congresu qu’escargate, hast’atopar güesu si ye preciso, nos usos y formes de la institución monárquica. Daqué que, al paecer, preocupanos sobremanera a los españoles, muncho más que, por exemplu, l’aforamientu de los nuesos impecables políticos.

Otru puntu del día tuvo na resolución de la fiscalía madrilana en rellación cola falta de sustanza penal nos chats de los güelos militares del pasáu mes d’avientu; personal retiráu de más de 75 años que desafogaben les sos inquietudes escribiendo, dalgunos, barbaridaes nun chat de calter absolutamente priváu. Un desenllaz, el de la fiscalía, pal que nun facía falta estudiar drechu, namái un pocoñín de sentíu común, y non demasiao, anque, magar too, el sainete dio pa otra crisis na que la señora ministra del ramu se despachó al so gustu, faciendo pensar a más d’unu que tamién a ella, como al so xefe, regalaran-y los títulos. El casu ye que daquella espirica salió otra comisión nel Congresu; sí, esi Congreso, al que tanto-y cuesta poner en marcha comisiones, va a investigar la presencia d’elementos d’estrema drecha nes Fuercies Armaes, a partir daquel chat. Increíble pero cierto.

Y p’acabar el día, Fredom House, una ONG internacional dedicada a la promoción de les llibertaes públiques y la democracia, de reconocíu prestixu mundial, asoleya güei’l so informe anual nel qu’España apaez ente los países nos que prevalecen eses llibertaes. Danos 90 sobro 100 puntos, como a Italia, o a Francia, anque son dos menos que l’añu anterior, nel que yá perdimos otros dos puntos, esto ye, que vamos a peor, precisamente dende qu’esti gobiernu fae como que mos gobierna, y claro, a unu vien-y la idea de que too esto de les infantes, o de los militares, no son más que trampantoxos, esto ye, una ilusión o trampa que mos fae creer que vemos daqué estremao de la realidá, una realidá que vien marcada por una crisis sanitaria na que l’aición gubernamental brilló pola so ausencia o la so deficiente direición.

Raúl Suevos

A 3 díes vencíos de marzu de 2021

Torna en castellán en repdiv.blogspot.com