Cangas de Narcea, el Shangri-La de los bablistes

CANGAS DE NARCEA, EL SHANGRI-LA DE LOS BABLISTES

Recién entráu de los cursos de la Universidá asturiana de Branu, UABRA, impulsaos dende va yá diez años en Cangas de Narcea pola Academia de la Llingua asturiana y la Universidá d’Uviéu, cuéstame recuperar el pulsu de la realidá llingüística del país.Enfótome y esforciome en ser lleal a la llingua tradicional d’Asturies –refúgome a nomala propia pues ello sedría llamar impropia al castellán- magar que la redolada únvia constantemente señales de cuál ye la realidá na que mos desendolcamos. Quiciabes ello se deba a qu’en Cangas, mientres la UABRA, produzse una situación prodixosa d’inmersión llingüística na que los participantes algamamos a confundir realidá y suaños, un Shangri-La llingüísticu que pue ser el responsable de que dalgún de los dirixentes políticos nuevos afirme que la demanda del asturianu ta na cai.  

A min la UABRA remocicame diez años. Solo funciona de manera curtia, pero nótolo; y ello pue ser pol influxu d’esa mocedá bien formada –el gruesu los participantes suelen ser filólogos y enseñantes- que nun atetuya n’invertir quince díes de les sos vacaciones pa siguir formándose na llingua los sos mayores, en dellos casos, y na de la so tierra na mayoría, too ello de la mano d’un cuadru de profesores igualmente acérrimes y de nivel peraltu, como ye’l casu, nel cursu que yo participaba, dende Miguel Rojo, el conocíu autor asturianu, o Carlos Alba, monologuista de sonadía, a los que cito por más vultables, que non más preparaos.

Esti añu notábase un ciertu sentimientu de esperanza ente’l cuadru profesional, que non euforia. L’aportar del gobiernu nuevu, nel que’l partíu que lu sofita vien d’executar una reblincada, cuasi cirquense dada la so trayeutoria, nel so allugamientu al rodiu la cooficialidá, y la entrada como conseyera d’una renomada autora en llingua asturiana y académica de la llingua –el conseyeru d’educación caberu tamién lo yera- xeneren grandes esperances ente los más apasionaos y moderaes espectatives nos más realistes.

Y ye que les cifres nun salen, non yá les d’emplegu de la llingua polos asturianos o la de la demanda educativa de la mesma, nun salen les de diputaos autonómicos pa camudar l’Estatutu d’autonomía, pasu imprescindible pa l’accesu a la cooficialidá que’l nuevu dirixente asturianu llevaba nel so programa cuando algamó la Secretaría xeneral del so partíu. Dicen que’l futuru presidente sospiró fondamente cuando constató que-y faltaba esi diputáu, anque nun saben si de tristura o d’alliviu. 

Bilordios.

El presidente asturianu tien, sicasí, munchos preseos pa impulsar l’asturianu; toos ellos de la mano de la Llei d’Usu, una llei exemplar anque namái seya porque se basa na voluntariedá, entamando del fechú de que la llingua ye, quiciabes, l’elementu más importante de la cultura asturiana, a la que tolos que mos sentimos asturianos deberíemos defender dende’l coral, fuxendo del so emplegu como arma política como asocede en delles rexones españoles.

El presidente asturianu pue imponer ún de los dos telediarios de la TPA n’asturianu lo que nun tien 
por qué sollevantar los ánimos, sacantes los d’aquellos que con intención perversa llantense escontra la Llingua. El control d’audiencies, güei mui desarrolláu, daría tamién una midida adicional sobro esi supuestu interés pola llingua de los güelos de nueso y tala aición nun me paez que suponga un gastu estraordinariu; un recorte pequeñu del númberu d’asesores bastaría.

La especialidá docente n’asturianu ye una demanda que vien de lloñe y que la falta de cooficialidá y, en dellos casos, los tribunales, vienen refugando, dexando con ello a un gran númberu de docentes n’albentestate profesional no que ye, na mio opinión, una vergoña pal país y pa los sos conseyeros d’educación. El presidente asturianu, que se balagoria de la so cercanía col presidente del gobiernu, 

tien equí una oportunidá valoratible p’amosar les sos cartes y, si nun furrularen, dende equí lu afalo a encabezar una manifestación en Madrid, el so partíu tien una llarga tradición, na que sedría siguíu por un ensame d’enseñantes asturianos. La situación ye arrebolante.

D’últimes, arrebol non, vergoña me produz que nos últimos presupuestos aprobaos nel Congresu fueren dos diputaos valencianos los que promovieren una perhumildosa sovención de cien mil euros pa l’Academia de la Llingua asturiana, moción que nun prosperó y que debería dar que pensar a los que anguaño se sienten, y dicen que mos representen, en Madrid.  

En Xixón a 12 d’agostu de 2019

Raúl Suevos

Espublizáu en La Nueva España el 19 d'agostu de 2019

Versión n'español

repdiv.blogspot.com