16 muertos en Serbia. Equí ¿cuántos necesitamos?

 

Novi Sad ye una ciudá serbia de la rexón de Voivodina. Al entamu de la guerra na vieya Yugoslavia’l so nome sonaba abondo porque alló atopábase l’esfuerciu loxísticu serbiu pal atacu a l’asediada ciudá croata de Vukovar. Yera 1992 y, demientres el conflictu, la ciudá, enllena de refuxaos, derivó haza una contestación franca al gobiernu del carniceru Milosevic. Nun tornaríemos a oyer falar d’ella hasta los bombardeos de la OTAN, demientres el conflictu del Kósovo -otru exemplu de la ductilidá de les normes de drechu internacional- que la dexaron casi aisllada y ensin puentes.

La tranquilidá que reviciaba dende entoncenes saltó pelos aires cuando’l 1 de pallares de 2024 la marquesina d’hormigón de la estación ferroviaria esbarrumbóse de sópito llevándose per delantre la vida de 16 persones. Y la tranquilidá aparente del gobiernu del señor Vucic, populista/nacionalista d’esquierdes, pues la obra alxudicarase a una empresa china de profesionalidá duldosa y pente medies alcuerdos escuros que rezumaben corrupción gubernamental, desapaeció. Los estudiantes de la ciudá echáronse a la cai, y siguieronlos los del restu del país; derivando na creación d’un partíu políticu, La Llista d’Estudiantes, que tien acabao colos 14 años de dominiu absolutu d’Alexander Vucic.

Güei equí, n’España, tenemos de trepar con otru accidente mortal nes ferrovíes nacionales, na provincia de Toledo nesta ocasión, con munchos muertos cuando esto escribo, y dempués del asocedío n’Adamur nun va un añu y aínda esperando les  esplicadures pertinentes sobro les responsabilidaes d’aquel accidente. Muertos que se amiesten a los que la DANA se llevó per delantre va malapenes dos años, y que tampocu cuenta pel momentu con responsables direutos, ni tampocu esplicadura sobro les carencies de l’aición del gobiernu enantes, demientres y dempués d’aquella catástrofe.

En tiempos tamién recientes, tantu qu’aínda tamos trepando coles afeutaciones direutes del sucesu per parte de los ceutíes, sofrimos, ensin reacción gubernamental aparente, la invasión, afortunadamente ensin armes, d’una ciudá española, ensin qu’ello sunpuxera una sola dimisión, como tampocu la hebo tres aquel apagón, tamién güérfanu d’esplicadura, y que podemos calificar d’históricu pola so dimensión nacional y pola so condición d’únicu na nuesa memoria.

 Comparen vustedes too esto colo asocedío en Novi Sad, en Serbia, y les repercusiones posteriores naquel país, y traten de comprender cómo ye posible que les encuestes sigan dando más de cien diputaos al partíu principal del gobiernu, el del doctor Sánchez. Yo intentolo, y la mío única conclusión vienme d’aquel vieyu slogan “Spain is different”, pero en malo, en deficiente. Ye lo qu’hai.

Raúl Suevos

A 28 díes vencíos d’ochobre de 2026

Torna en castellán en repdiv.blogspot.com 

Los tatuaxes d'Ásia

 

N’esi supercontinente, Ásia, son delles cultures les que faen usu del tatuaxe como mediu d’espresión cultural, anque, posiblemente, los más nomaos, si bien pertenecen a Oceanía, son los maoríes, pobladores ancestrales de lo qu’anguaño ye Nueva Zelanda, y que, ente otros medios, dieron fama a les sos elaboraes figures sobro el so pelleyu gracies a la notoriedá de los All Black, l’equipu nacional de rugby, con mayoría de xugadores aboríxenes nes sos files.

Vienme tamién a la tiesta los tatuaxes abigarraos que los yakuza, esa mafia xaponesa que de xacíu vemos nel cine, llucen; anque siempres per baxo’l pescuezu y ensin llegar a les manes. Paeciera qu’esos mensaxes, que supongo qu’ellos sedrán a descifrar, queden pa la intimidá colectiva de los baños, au se supón que s’aconceyen y tomen les sos decisiones. Too ello dicho dende la duldosa cultura que’l cine mos ofrez.

Equí, en casa, teníemos la cultura de los “lexías”, los caballeros lexonarios, que va un par de xeneraciones yeren los únicos que taben a salvo del xuiciu negativu del personal en xeneral. Dempués yá entamamos a ver dalgunes “cosines” en xente que pasara pel “trullu”, y que llucíen en manes y antebrazos dalgunos tatuaxes pequeños que implicaben pertenencia o esperiencia, lo que servía pa que’l personal del común se sollertara y, nel so casu, mantuviera una distancia prudencial col tatuáu.

Güei too eso tien camudao. El tatuaxe tiénse estendío ente la mocedá de tal forma que convierte en estravagante al que caltien el so pelleyu n’estáu virxinal. Una esplosión social que tien fecho del tatuaxe una importante maquinaria económica, con más centros de tatuaxe en dalgunes ciudaes que sucursales bancaries, y con tatuadores reverenciaos como si de caravaggios o goyas actuales se tratara. Ye lo qu’hai.

Sicasí, l’Ásia del titulu nun ye’l continente sinon la fía de Dário Argento, notoriu direutor de cine italianu de trayectoria perllarga, y ella, la fía, famosa actriz tamién, tantu n’Italia como nos EEXX, y que, nel asuntu que tratamos, los tatuaxes, tien sío una gran usuaria, esto ye, que se pintarrexó mediu cuerpu con ellos, y qu’agora se descuelga col descubrimientu de que foron un pecáu de mocedá, y que los sos pás yá-y lo dixeran; tamién que suponen un peligru en cuantu los materiales que s’introducen na epidermis. Finalmente.

Agora Ásia ta quitándoselos toos, con más padecimientu que cuando se los punxo, y con mayor costu económicu. Too ello nos mesmos centros de tatuaxe, que faen un negocio d’ida y vuelta a costa de los mesmos clientes. Cosas veredes, amigu Sancho.

Raúl Suevos

A 26 díes vencíos d’ochobre de 2026

Torna en castellán en repdiv.blogspot.com 

Yera una vegada en Vitoria

 

Nun suel salir muncho nos noticiarios Vitoria, y ello magar tener alló la see de la presidencia de la rexón autónoma y la so asambleya. Enantes facíalo más de xacíu, pero yera por motivos luctuosos rellacionaos col terrorismu. Ayeri tornó a los informativos gracies a una familia desahuciada del so domiciliu magar tener seis fíos a cargu.

L’enfoque aniciador de los informativos diba col enclín, como nel casu de la difunta Maricarmen, pel aspeutu humanitario y sentimental ¡seis fíos’ supongo que toos menores pela edá aparente de los pás, anque como nel casu de la venerable vieya, que les informaciones posteriores mos amosaron como nun tan digna de veneración, pronto entamaron les suspicacies, escomencipiando pel ayuntamientu de la ciudá, que encabeza’l PSOE-Euskadiko Ezquerra, en coalición col PNV, qu’afirmó que nun teníen drechu a vivienda social por contar con sosidios de tipu diversu por valir de 2450 euros.

Amás d’eses ayudes, imaxinome, tarán sovencionados en parte nel consumu eléctricu, por ser familia vulnerable, ya imaxínome tamién que los atoparemos ente los receptores d’alimentos en dalguna, o varies, de les ONG,s del ramu. El remate del cuadru vieno cuando mos enteramos de qu’esti branu colaron más d’un mes de vacaciones  al so país d’orixe, que nun se cita pero s’intuye, mientes, el propietariu de la vivienda, tres varios años intentando recuperar el so pisu, malvivía d’alquiler nuna habitación, supongo que, como na postguerra, con drechu a cocina, cola so muyer embarazada y un fiu pequeñu. Ye lo qu’hai.

El pater familias desahuciáu en Vitoria, llucía na frente una “zabiba”, uva pasa, esto ye, la mancha escura y callosa qu’eshiben los musulmanes más acérrimos, que nun implica islamismu radical, y tamién una barba recortada, que amuesen los miembros de los Hermanos musulmanes, que nun supón la so pertenencia, pero que, en conxuntu, indícanos que, mui probablemente, los sos fíos, magar la sanidá y la educación que revicien n’España, van ser educaos na fidelidá estricta a Alá, y al so profeta, Mahoma. Ye lo qu’hai.

N’Aragón, la comunidá emigrante más importante ye la rumana, que va amenorgendo porque munchos d’ellos y casi tolos sos fíos alquieren la nacionalidá española. Nunca salen nes noticies, pero los dos años que pasé trabayando en Calatayú, una ciudá espectacular, namái oyí parabienes sobro esta comunidá, xente trabayadora y lleal, de la que nun ye avezao saber de fechos negativos. Pela cueta, col Islam, refractariu a les idees democrátiques, o al espíritu xudéu-cristianu que empapa la construcción europea, asucede al contrario. Atención.

Raúl Suevos

A 24 díes vencíos d’ochobre de 2026

Torna en castellán en repdiv.blogspot.com