La Cartilla

 

La nuesa traxedia ferroviaria atópase nesti momentu na fase de dixestión de la dimisión -¿fo eso o fo un cese?- del ministru de los tweets incendiarios y les frases ultraxantes, Oscar Puente, en bona hora desapaecíu, anque namái sirva pa consuelu momentaneu de les victimes d’Adamuz y Urda.

A min el desastre garróme n’actividaes cotidianes, interrumpíes pola noticia, y lluéu pensé nel espliegue de medios informativos que s’averaba, como les traxedies de la Dana y Adamuz mos amosaron. Una exhibición de personal que tendría, y tevo como oxetivu, como entoncenes, y como seguramente va asoceder en traxedies futures, a los protagonistes del sucesu; victimes y familiares nun primer momentu pa de siguío pasar a rescatadores de cualquier mena.

Y asina fo. El primer día produxose una llorza de cazadores de cualquier clas de manifestación; cuantu más averao de la zona d’impactu meyor. Una zarracina que pola cantidá y el númberu de programes radiofónicos y televisivos implicaos llegaba a atapurriar el nivel d’obscenidá; informativa nesti casu.  Ente medies les esplicaciones, o suposiciones, sobro los motivos del accidente, servíen pa xustificar unos programes que, na mío modesta opinión, yeren a la información lo que la casquería ye al chuletón.

Metanes esa xungla, el día dempués, navegando pel dial radiofónicu, atopemé con una de les máximes figures del mediu, desplazáu, non a la zona del accidente, sinon al pueblu d’Urda. Ellí, con una delicadura desacostumbrada nestos tiempos, diba entrevistando a protagonistes inesperaos del sucesu; los vecinos implicaos el primer día en toa mena d’aiciones d’ayuda, de mayor o menor fustaxe.

Al traviés d’ellos, contándonos la so vivencia particular, y ensin la pornografía informativa que otros ufierten, yera posible darse cuenta de la dimensión de la traxedia y del dolor y l’espantu de los accidentaos y de la esmolición de los sos familiares. Toa una exhibición de sensibilidá periodística que redime’l mal facer, na mío opinión, d’otros munchos, namái interesaos n’impresionar a l’audiencia, al preciu que seya.

Unos díes dempués pude gueyar una entrevista a un de los guardias civiles de Toledo, aínda impactáu pola vivencia personal del sucesu, que fuera protagonista del rescate de la única superviviente d’un de los vagones, y que, forzáu a dar un porqué de la so actuación, simplemente dixo “vamos onde mos necesiten y facemos lo que podemos”.

Y ye qu’ellos, los guardias civiles, son siempres los primeros en llegar, coles sos manes llimpies y la so voluntá, tratando siempres de “ser un pronosticu feliz pal aflixíu”, como señala l’artículu 6 de la vieya Cartilla del duque d’Ahumada. Ye lo qu’hai.

Raúl Suevos

A 4 díes vencíos de pallares de 2026

Torna en castellán en repdiv.blogspot.com

La Domus Aurea de Trump

 

Soi apasionáu de la historia de Roma, y poro siguidor de documentales sobro’l tema y lector d’artículos tocantes al mesmu. Como’l que güei me traxo unas escavaciones na Ciudá eterna no que, aparentemente, fo’l teatru priváu de Nerón, y onde, ente otros restos, tienen apaecío cachos d’estucu romanu con pintura dorada; y ye qu’a Nerón prestaba-y lo dorao, como la yá pernomada Domus Aurea, lo que d’ella queda, pa ser más esactos, mos lleva dellos años informando.

Nerón fo’l quintu y caberu emperador de la dinastía Claudia, la de la familia de Xulio Cesar, y fo una desgracia según unos, y non tantu según otros. Anque acabó “malamente” pues el Senáu, fartu del so comportamientu y col respaldu de los militares, incluyíos los peliculeros pretorianos responsables de la so seguridá, declarólu “enemigu del pueblu”, lo qu’equivalía a la so execución, dalgo qu’él evitó pente medies suicidiu asistíu.

Nel so llargu imperiu, casi 14 años, dio-y poles grandes obres, particularmente tres la quema de Roma, que dalgunos-y endosen y que lu llevó a tresformar la ciudá a base de formigón y cúpules de toa mena, anque fo la so Casa Dorada, la que más fama caltuvo a lo llargo de los sieglos. Una mansión grandiosa enllena de mármoles y doraos en cantidaes que diben más alló de la estravagancia.

Y qué quieren, a dos díes de les eleiciones nos EE.XX nun pude resistime a facer la comparanza, seguramente lleváu pola afición desmedía de Donald Trump a llenar de doraos la Casa Blanca, y les sos menacies monumentales pa Washington. Él, tamién vástagu d’una familia adinerada, y como’l emperador siempres nadando na opulencia; influyencies que, nel casu de Nerón, llevaronlu a decisiones insanes que daríen cola so conderga senatorial.

Trump amuesa unes tendencies que delaten la so pulsión imperial, tantu nes sos decisiones, autocrátiques polo xeneral, como na so almiración por personaxes como Putin, Xi o Kim jong-un, a lo qu’habría qu’añader el despreciu haza les normes vixentes, que con él nun van.

Vienen agora estes eleiciones midterm, que pueden llevar a la perda del Congreso, y quiciabes el Senáu pol so partíu, y con ello amontar les posibilidaes d’una destitución na segunda Cámara, ensin que l’asuntu faiga peligrar la so integridá física, al mou pretorianu romanu, y a min nun me tien costao imaxiname una estatua trumpiana cola so toga, la so lira y la so corona de llauréu, como si d’un Nerón modernu se tratara, y ye que l’ogru naranxáu, sacantes na edá, paezse muncho a aquel.

Raúl Suevos

A 1 día vencío de pallares de 2026

Torna en castellán en repdiv.blogspot.com

España nun merez un gobiernu que-y mienta

 

Ye una frase que, con más o menos matices, puése oyer, desgraciadamente, con cierta frecuencia. Pero el que detenta los drechos d’autor, si aínda tuviera vivu, ye Alfredo Pérez Rubalcaba, al que tamién compete la denominación de “gobiernu Frankenstein”, al primer formáu pol doctor Sánchez.

Yera’l señor Rubalcaba un políticu tou tarrén, con fama de dominar los requexos más escuros del estáu, d’ehí aquello de “Rubalcaba, a la que te descuides te la clava”, anque l’aportar del actual xefe de gobiernu supunxo más de lo que podía soportar, y decidió dexar la política y tornar al so puestu de profesor universitariu, onde lu algamaría la muerte de forma repentina y prematura.

La frase del título usóla na víéspera d’unes eleiciones estrañas, pues el xefe de gobiernu saliente, Aznar, dexaba’l cargu voluntariamente tres ocho años n’él. Casu únicu na nuesa historia, y nesos díes dirixía un gobiernu qu’inoraba si’l sustitutu, que les encuestes auguraben sedría Rajoy, caltentendríalos nel so puestu.

Tres díes enantes de les eleiciones llegó l’atentáu terrorista, el más mortal de la nuesa llarga historia de crímenes, y la lóxica y la presión del calendariu llevólos a anunciar una autoría etarra. Pero nun lo yera, y les pistes que se diben produciendo, y a les que Rubalcaba, con tentáculos nel ministeriu d’interior, tenía accesu, apuntaben al terrorismu islámicu, como tuvieron que reconocer poco dempués. Demasiao tarde.

La frase de Rubalcaba resonó como un cañonazu na viéspera eleutoral, y el vuelcu nel votu de mumcha xente tráxomos a un Zapatero d’aciagues consecuencies aínda anguaño, anque seya en forma de collares y memes nes riedes sociales. Ye lo qu’hai.

Visto lo visto, los ocho años de gobiernu sanchista, cabría deducir que lo que los españoles nun aguanten ye la mentira repentina, aquella que queda n’evidencia cuando l’asocedío ta aina acaldáu, o finando, y, sobremanera, si la oposición ye a orquestar una bonna campaña. Nin un res, o malapenes nada, asocede, si’l gobiernu ye amañosu abondo como pa aletargar, adormentar el sucesu ente investigaciones de comisiones nomaes pola alministración, o averiguaciones de sumarios xudiciales, siempres de duración escesiva.

Paiporta, l’apagón, Adamuz, Ceuta, y agora Urda, too un compendiu de degradación fondera de los servicios públicos, nos años que más tienen subío los impuestos y los fondos europeos, pero la opinión pública sigue ensin salir a la cai; déxala si acasu a los black blocs, que representen l’anarquía, y da pa pensar qu’España sí se merez un gobiernu que-y mienta.

Raúl Suevos

A 31 díes vencíos d’ochobre de 2026

Torna en castellán en repdiv.blogspot.com

EL DIARIO que marca el SER de EL PAÍS

 

Cabría dicir que la nación ta ablucada énte la magnitú de la catástrofe ferroviaria de la mañana d’ayeri; que la so dimensión total aínda nun se conocía pues, al paecer, un día dempués, siguen guetando desapaecíos baxo y ente los fierros del siniestru. Pero la realidá del sentir popular va más per otru camín, el de l’asunción de la decadencia de los servicios, y el de la falta de direición xeneral al timón de la nave del estáu. Nun hai sorpresa.

Venimos yá de dellos años de fallos del sistema, col resultáu de muertos en cantidá sorprendente, pero, si vustedes lo comprueben, daránse cuenta que tamos énte’l gobiernu más refractariu al usu de la dimisión o’l cese. Nunca pasa un res tres el desastre. Si acasu’l desencadenamientu d’una campaña de comunicación institucional p’aplacar el furor de la opinión pública, o pa descalificar a la oposición política.

Eses campañes tienen como vehículos principales a estremaos medios de comunicación que, con mayor o menor vehemencia y velocidá, y supongo que tamién en proporción a les alxudicaciones de publicidá institucional que reciben, apliquense a tresmitir les consignes o mensaxes del gobiernu, anque, por aquello de l’alternancia política, siempres intenten caltener una apariencia d’independencia, por mui difícil que, nel casu de dalgunos, eso pueda llegar a ser creyíble.

Ayeri, na primer comparecencia del ministru del ramu, el señor Puente, látigu twiteru del gobiernu, al contrario de cuando’l desastre d’Adamur, yá insinuó que tábemos énte un fallu humanu, y malapenes un par d’hores más tarde, nun alarde d’obscenidá informativa, filtrábase la parolada del xestor en Madrid colos dos maquinistes implicaos. Una exhibición de periodismu investigativu va pensar dalgún indixente intelectual, y tamién una manipulación de la opinión pública en plena campaña eleutoral, va opinar la mayoría.

Los tres grandes investigadores periodísticos, nun espliegue que dexa en pañales a Project Syndicate, son, ElDiario.es pa la rama dixital, la Ser, pa la radiofónica, y El País pal soporte en papel. Ye la realidá, van dicir dalgunos, y asina ye, anque, tres esta desvergonzada amuesa d’“independencia” nun tengo mui nidio ónde queda la so credibilidá.

La triste realidá que mos va quedar -aínda nun llegamos a la cifra definitiva- ye la d’una Alta Velocidad que, dende aquel momentu que rescamplaba nel mundiu, atópase agora enfangada n’un pozu fonderu que nun tengo mui claro, cola penuria económica que tenemos per delantre, cómo va poder salir, anque pa ello, aquella vieya campaña del añu 1973, “Papa, ven en tren”, qu’animaba a usar los servicios de RENFE en llugar del coche, muncho más peligrosu, nun va servir. Ye lo qu’hai.   

Raúl Suevos

A  29 díes vencíos d’ochobre de 2026

Torna en castellán en repdiv.blogspot.com 

16 muertos en Serbia. Equí ¿cuántos necesitamos?

 

Novi Sad ye una ciudá serbia de la rexón de Voivodina. Al entamu la guerra na vieya Yugoslavia’l so nome sonaba abondo porque alló atopábase l’esfuerciu loxísticu serbiu pal atacu a l’asediada ciudá croata de Vukovar. Yera 1992 y, demientres el conflictu, la ciudá, enllena de refuxaos, derivó haza una contestación franca al gobiernu del carniceru Milosevic. Nun tornaríemos a oyer falar d’ella hasta los bombardeos de la OTAN, demientres el conflictu del Kósovo -otru exemplu de la ductilidá de les normes de drechu internacional- que la dexaron casi aisllada y ensin puentes.

La tranquilidá que reviciaba dende entoncenes saltó pelos aires cuando’l 1 de pallares de 2024 la marquesina d’hormigón de la estación ferroviaria esbarrumbóse de sópito llevándose per delantre la vida de 16 persones. Y la tranquilidá aparente del gobiernu del señor Vucic, populista/nacionalista d’esquierdes, pues la obra alxudicarase a una empresa china de profesionalidá duldosa y pente medies alcuerdos escuros que rezumaben corrupción gubernamental, desapaeció. Los estudiantes de la ciudá echáronse a la cai, y siguieronlos los del restu del país; derivando na creación d’un partíu políticu, La Llista d’Estudiantes, que tien acabao colos 14 años de dominiu absolutu d’Alexander Vucic.

Güei equí, n’España, tenemos de trepar con otru accidente mortal nes ferrovíes nacionales, na provincia de Toledo nesta ocasión, con munchos muertos cuando esto escribo, y dempués del asocedío n’Adamur nun va un añu y aínda esperando les  esplicadures pertinentes sobro les responsabilidaes d’aquel accidente. Muertos que se amiesten a los que la DANA se llevó per delantre va malapenes dos años, y que tampocu cuenta pel momentu con responsables direutos, ni tampocu esplicadura sobro les carencies de l’aición del gobiernu enantes, demientres y dempués d’aquella catástrofe.

En tiempos tamién recientes, tantu qu’aínda tamos trepando coles afeutaciones direutes del sucesu per parte de los ceutíes, sofrimos, ensin reacción gubernamental aparente, la invasión, afortunadamente ensin armes, d’una ciudá española, ensin qu’ello sunpuxera una sola dimisión, como tampocu la hebo tres aquel apagón, tamién güérfanu d’esplicadura, y que podemos calificar d’históricu pola so dimensión nacional y pola so condición d’únicu na nuesa memoria.

 Comparen vustedes too esto colo asocedío en Novi Sad, en Serbia, y les repercusiones posteriores naquel país, y traten de comprender cómo ye posible que les encuestes sigan dando más de cien diputaos al partíu principal del gobiernu, el del doctor Sánchez. Yo intentolo, y la mío única conclusión vienme d’aquel vieyu slogan “Spain is different”, pero en malo, en deficiente. Ye lo qu’hai.

Raúl Suevos

A 28 díes vencíos d’ochobre de 2026

Torna en castellán en repdiv.blogspot.com 

Los tatuaxes d'Ásia

 

N’esi supercontinente, Ásia, son delles cultures les que faen usu del tatuaxe como mediu d’espresión cultural, anque, posiblemente, los más nomaos, si bien pertenecen a Oceanía, son los maoríes, pobladores ancestrales de lo qu’anguaño ye Nueva Zelanda, y que, ente otros medios, dieron fama a les sos elaboraes figures sobro el so pelleyu gracies a la notoriedá de los All Black, l’equipu nacional de rugby, con mayoría de xugadores aboríxenes nes sos files.

Vienme tamién a la tiesta los tatuaxes abigarraos que los yakuza, esa mafia xaponesa que de xacíu vemos nel cine, llucen; anque siempres per baxo’l pescuezu y ensin llegar a les manes. Paeciera qu’esos mensaxes, que supongo qu’ellos sedrán a descifrar, queden pa la intimidá colectiva de los baños, au se supón que s’aconceyen y tomen les sos decisiones. Too ello dicho dende la duldosa cultura que’l cine mos ofrez.

Equí, en casa, teníemos la cultura de los “lexías”, los caballeros lexonarios, que va un par de xeneraciones yeren los únicos que taben a salvo del xuiciu negativu del personal en xeneral. Dempués yá entamamos a ver dalgunes “cosines” en xente que pasara pel “trullu”, y que llucíen en manes y antebrazos dalgunos tatuaxes pequeños que implicaben pertenencia o esperiencia, lo que servía pa que’l personal del común se sollertara y, nel so casu, mantuviera una distancia prudencial col tatuáu.

Güei too eso tien camudao. El tatuaxe tiénse estendío ente la mocedá de tal forma que convierte en estravagante al que caltien el so pelleyu n’estáu virxinal. Una esplosión social que tien fecho del tatuaxe una importante maquinaria económica, con más centros de tatuaxe en dalgunes ciudaes que sucursales bancaries, y con tatuadores reverenciaos como si de caravaggios o goyas actuales se tratara. Ye lo qu’hai.

Sicasí, l’Ásia del titulu nun ye’l continente sinon la fía de Dário Argento, notoriu direutor de cine italianu de trayectoria perllarga, y ella, la fía, famosa actriz tamién, tantu n’Italia como nos EEXX, y que, nel asuntu que tratamos, los tatuaxes, tien sío una gran usuaria, esto ye, que se pintarrexó mediu cuerpu con ellos, y qu’agora se descuelga col descubrimientu de que foron un pecáu de mocedá, y que los sos pás yá-y lo dixeran; tamién que suponen un peligru en cuantu los materiales que s’introducen na epidermis. Finalmente.

Agora Ásia ta quitándoselos toos, con más padecimientu que cuando se los punxo, y con mayor costu económicu. Too ello nos mesmos centros de tatuaxe, que faen un negocio d’ida y vuelta a costa de los mesmos clientes. Cosas veredes, amigu Sancho.

Raúl Suevos

A 26 díes vencíos d’ochobre de 2026

Torna en castellán en repdiv.blogspot.com