El Muséu Goya

 

Va yá munchos años, creyo qu’alló pel 1998, tocóme participar nunes maniobres internacionales nel sur de Francia; un exerciciu de la serie EOLO, nel que participaben España, Francia, Portugal ya Italia, y que yá diera llugar a la creación d’EUROFOR, la Fuerza Operativa Rápida Europea, con see en Florencia, y de la que yo formaba parte.

Demientres aquella estancia, rellativamente llarga, hebo un día de descansu, y un grupín de collacios, lideráu per un que taba puestu nel asuntu, nos empobinámonos a Castres, una ciudá bien guapa, 40.000 habitantes, d’aquella parte del país tan mediterránea, onde s’atopaba, y aínda güei lo fae, l’únicu muséu francés dedicáu por entero a la figura del nuesu universal Goya.

Alcuérdome que les colecciones entusiasmáronmos, tantu como l’almiración al atopar un muséu de tales característiques en casa del nuesu vecín. Anque güei, pasáu tantu tiempo nun taría en condiciones de deci-yos en qué consisten, más alló de la parte dedicada a los grabaos, importante, y, sobremanera, el retratu al óleu de Francisco del Mazo, d’un paeciu ablucante a un entoncenes mozu emerxente direutor de cine español de nome Almodovar. Curiosidaes.

Vien esto a cuentu porque güei visité’l recién inauguráu Muséu Goya de Zaragoza, pa dar plsmu en dalgunos aspeutos, pero operación fallida nel so conxuntu, y voi desplicame. No positivo, el so allugamientu, averao la plaza de les catedrales, y la recuperación d’un palacio renacentista aragonés que, namái pel so patiu, yá merez la pena la visita, a añeder, induldablemente, la esposición completa y permanente de los grabaos -yo güei dediquéme esclusivamente a los Desastres de la guerra- que se presenta de forma prestosa y educativa. A esto, y particularmente nesta inaugural, amiestase la esposición temporal, con obres aportaes de tolos requexos del mundiu, con especial aporte d’El Prado, que resulta impresionante, cola marquesa de Chinchón como abanderada del restu de la amuesa. Pero hai otros aspeutos.

Na exposición permanente, y falamos de Goya, y de Zaragoza, échense en falta los munchos fondos con que cuenta’l Muséu de Zaragoza, que la so ausencia, una vegada más, dános cuenta de la incapacidá que les instituciones amuesen pa llevar a cabu proyeutos d’autentica dimensión mundial, como sedría’l casu; y ye que, digo yo, a naide se-y ocurre que poner toes eses obres, o simplemente les más importantes, nun llugar, que de la so titularidá nun me toca a min falar, pa d’esta forma multiplicar los efeutos d’atracción y beneficiar a la ciudá, y a la par, facilitar el reviciar del visitante. Paez que non, y ye lo qu’hai.

Raúl Suevos

A 12 díes vencíos de pallares de 2026

Torna en castellán en repdiv.blogspot.com 

El votu del acólitu

 

Entama oficialmente una campaña eleutoral ñueva, anque de fechu escomencipió’l mesmu día que’l presidente del gobiernu anunció la disolución de les Cortes; y yá tamos en plena llucha, afortunadamente incruenta, pa garrar cualquier votu despistáu metanes el tráficú desaforáu de la gran ciudá, o nel desconsuelu de los campos quemaos d’esti branu pasáu. Toos son bonos y toos son necesarios.

A min, per edá, y voi dicir tamién por formación, pues sicasí dediqué-y dellos años a la llicenciatura en Ciencies Polítiques, l’asuntu ésti de la campaña como que nun m’emociona. Soi de la opinión que, a la fin d’una llexislatura, el votante adultu, nel sentíu de formáu, non d’edá, debería tener yá una idea abondo nidia d’a quién votar, inclusive, más importante aínda, d’a quién nun votar. Desgraciadamente, n’España a lo menos, el gruesu de los grupos votantes fánlo por una motivación abondo probe, la que correspuende a esi tan oyío, y dolorosu por lo que d’analfabetismu políticu representa, “na mío familia siempres tenemos votao asina”.

 Ye España, quiciabes, el país européu nel que menos atención se presta a los programes eleutorales, supuestamente contenedores de los compromisos alquiríos poles estremaes formaciones. Y daquien va poder dicir qu’ello ye asina pol casi sistemáticu incumplimientu d’esos programes, nun digamos yá de les promeses que dalgunos líderes llancen demientes los sos mítines de campaña. Tarrecible.

A l’actual aportamos tres ocho años de mentires, o incumplimientos de les promeses del xefe del gobiernu; definíos por él como simples cambeos d’opinión; que nun deberíen tener dala repercusión nel ánimu del votante, supongo que va pensar. Y dalgo debe haber, pues les encuestes, les normales, non les del señor Tezanos, emperruñense en caltener cien o más diputaos pal partíu del gobiernu. Oh maravia.

Los sociólogos, tan estudiaos ellos, nun acaben de dar cola tecla qu’esplique tala situación, y a min vienme guetala nel mundiu de les sectes, del que si non toos, dalgunos partíos políticos, anguaño, sedríen hermanos mayores. Y n’él, nesi mundiu tan particular y peligrosu, al líder débese-y obediencia ciega, idealizase la so figura y perdonense o aceuten los sos erros, autoanúlase’l xuiciu propiu abandonándose al del xefe, y demonízase a los ayenos al grupu, que namái busquen el mal pa él y ellos.

Ye n’esti comportamientu, del que los protagonistes, casi nunca son conscientes, onde quiciabes, la sociología y los sos espertos eleutorales, deben guetar la esplicadura pa que, tres estos ocho años aciagos, el doctor Sánchez cuente con tantu acólitu abducíu. Ye lo qu’hai.

Raúl Suevos

A 12 díes vencíos de pallares de 2026

Torna en castellán en repdiv.blogspot.com 

El Principe

 

Pal turista que visita Florencia hai trés llugares inescusables a visitar nel centru la ciudá, al que cabría amestar el Piazzale Michelangelo, estramuros, na colina de San Miniato al Monte; y son estos, el Duomo, el Ponte Vecchio, y la Piazza della Signoria. Pel camín, davezu invadíu de collacios de turistéu y col tiempu ainante de los viaxes anguaño, casi nunca y a casi nadie-y queda tiempu pa perder unos minutos na plaza interna de los Uffizi, anque dalgunos ellí pasen inclusive hores de cola esperando entrar a la galería pernomada. Y el casu ye qu’alló, nesa plaza, atópase’l muestrariu de grandes figures del Renacimientu querío por Cósimo de Medici, el Grande, el primer gran duque de Toscana, el so constructor.

Si Cósimo fo’l constructor, l’arquitecto foilo’l gran Vasari, pero les hornacines d’aquel patiu quedaronse vacíes hasta metanes el S.XIX, cuando yá la familia de Lorena exercía¡l mandu ducal, y ellí, ente eses grandes figures del Renacimientu, munches d’elles universales, atopámos a Francesco Guiciardini y a Nicoló Macchiavelli, dambos politólogos grandísimos, diríemos anguaño, pero, sobremanera, grandes constructores del Renacimientu na so parte humanística.

Al Machiavelli tengo-y especial apegu, quiciabes pelos trés años que pasé como vecín de la ciudá de Florencia, que me permitieron visitar la so casa en Sant’Andrea en Percusina, u pasó l’afamáu esiliu demientres el cualu escribió la so gran obra, Il Principe, anque non la más importante. Ellí, na so casa familiar, fuera de les muralles de la ciudá, d’onde fuera espulsáu polos Medici tres la cayida de la República y la so recuperación del poder, podía rumiar la so señarda mientes güeyaba allalantrón la cúpula de Santa María del Fiore, la maravia construyida por Bruneleschi. Una estrañedá que lu llevaría a escribir, col oxetivu de recuperar el favor de los Medici, y con ello el regresu a la so querida ciudá, la obra pernomada.

El Principe, casi siempres inxuriáu, con una visión mui parcial, “el fin xustifica los medios”, que torga a los más afondar nuna obra que, equí n’España, daría pie, más d’un sieglo dempués, a Saavedra Fajardo y a Baltasar Gracian, pa escribir sendes obres maestres al rodiu’l mesmu tema, la formación de la estructura moral y política del gobernante, el príncipe. Falamos, en fin, d’una obra que, per vegada primera na historia asienta los principios de la ciencia política; principios que yá apuntara nos sos previos “Discursos sobro la primer década de Tito Livio” onde fala yá del conceutu republicanu y el exércitu nacional.

Nes sos llínees Machiavelli separta la moral de la relixón, defín lo qu’anguaño ye la teoría del realismu políticu, desendolca’l conceutu de la “virtú” del gobernante/príncipe que güei entenderíemos como capacidá téunica o profesional, y finalmente presenta la famosa “razón de estáu”, siempres presente nel gobiernu de les naciones, como resalta’l padre del realismu modernu, Morgentau, y motivu de la so conderga polos energúmenos de la crítica. Amás, y como regalú final, amuesanos, ensin sabelo, lo qu’anguaño conocemos como pesimismu antropológicu y que Hobbes desarrollaría na so Gran Leviatan. Una obra sensacional El Principe.

Y, ¿por qué me vengo güei tan arriba con esti asuntu? Pues porque pasé al pie de la estatua que Zaragoza dedica al so gran rei, Fernando’l Católicu, y que dalgunos dicen foi la inspiración pa esi príncipe imaxinariu del Machiavelli, anque otros, más, suxeren que la so referencia fo’l Duca Valentino, Cesar Borgia, fiu del Papa Alexandru VI, pa min más condotieru que príncipe, y que, casualmente, diba finar malamente los sos díes nun barrancu averáu de Viana, en Navarra. Amás, l’añu viniente, 2027, vanse cumplir cinco sieglos de la desapaición del gran florentín, y a bon seguro vase falar abondo d’él y de la so obra. Ye lo qu’hai.

Raúl Suevos

A 11 de pallares de 2026

Torna en castellán en abellugunelcamin.blogsspot.com