El nome poco va dicir a la
mayoría de llectores. Quiciabes-yos traya suaños persianos, por aquello del
gran rei que 2500 años fa dominara’l mundiu, o pela segunda parte, que paeciera
trayer parentescu del Hamenei bombardiáu la madrugada pasada por yanquis ya
israelites. Pero non, un res d’eso. Falamos d’un californianu.
Un californianu fiu d’un italianu
de Toscana, de Massa Marittima, una villa percuriosa de la provincia de
Grosetto qu’agora atrae muncho turismu pero que, el sieglu pasáu, producía,
como otres partes del país, un gran númberu d’emigrantes. Dalgunos, como’l
padre de Dario, colaron pa les Amériques, au maridó con una moza mui intelixente
d’orixe xudíu.
El resultáu fo un mozu d’intelixencia
estraordinaria y enfotos perenables que lu llevaríen a estudiar delles inxenieríes,
con dedicación especial a la informática; destacando notablemente y siendo
contratáu poles empreses más punteres del sector. Una intelixencia que lu
llevaría a estudiar medicina cuando la so má enfermó de cáncer y, al comprobar
que pocu dempués de la so desapaición la téunica atopaba solución pal so mal,
decidió dedicar los sos esfuercios a desarrollar dalgo qu’ayudara a la ciencia
a dir per delantre de les necesidaes del momentu. Y ehí taba Open AI, y lo que
dempués sedría Chat GPT, no que’l nuesu Dario sedría alma ya impulsor científicu.
Too paecía dir bien, pero al home,
la conciencia, o los escrúpulos, nun-y daben fuelgu tocantes el peligru que la
Intelixencia artificial podía llegar a suponer y, al nun atopar rempuesta a les
sos duldes esistenciales, dexó la empresa pa fundar Anthropic, la firma, y desendolcar
Claude, el software d’intelixencia artificial más potente de los anguaño esistentes
y que, amás, zarra códigos deontolóxicos qu’anteponen la primacía de lo humano
a la intelixencia artificial.
L’ésitu empresarial y científico tien
sío total, pero agora chocó col Pentágono de Donald Trump, que, tres roblar
contratu con él, nun aceuta la torga de negar l’accesu al control indiscrimináu
y xeneral de la ciudadanía norteamericana, y la necesidá del control humanu nes
decisiones d’eliminar otros humanos. Una situación yá plantegada nel cine y la
lliteratura, agora realidá.
El choque tien llevao a un plante
de toles empreses que nos USA trabayen la IA, preocupaes énte la deriva
filosófica que s’escuende tres les decisiones del ogru anaranxáu, que nesta
batalla tien dao un pasu más haza l’autocracia, o’l cesarismu democráticu si vustedes
prefieren. Un plante rotu por un esquirol, que nun tien sorprendío demasiao,
pues tratase d’Elon Musk y el so Grok, mui inferior en calidá a Claude, pero
dispuestu a abrazar l’interés trumpista. Ye lo qu’hai, el futuru yá ta equí.
Raúl Suevos
A 28 díes vencíos de
febreru de 2026
No comments:
Post a Comment