De Tamerlán a Putin

 

Ridley Scott ye un artista de la dirección cinematográfica, y tamién de la manipulación histórica en beneficio los resultaos populares de los sos trabayos. Vímoslo en Gladiator, y tamién nel Reinu de los Cielos. Alló montaba una pirámide de tiestes cortaes tres la batalla los Cuernos de Katyn, au pola nefasta dirección los cruzaos foron masacraos por Solimán el Magníficu. El responsable, Guy de lusiñán, acabaría plácidamente como reI de Chipre.

El casu ye que les pirámides de tiestes, col tiempu calaveres, yeren una especialidá de Timur Han, Tamerlán, Timur el coxu. Un gran psicópata asesín y guerreru que llegó a formar un imperiu, con capital en Samarcanda, qu’a la so muerte esbarrumbose, y hasta onde aportó una embaxada del rei de Castilla al entamu’l S. XIV, liderada por Ruy González de Clavijo, quien escribiría una crónica, “Embaxada a Tamerlán”, con tantu éxitu na so dómina como “El Milione” de Marco Polo.

Les pirámides, na so primer fase, de descomposición, producíen dalgo paecío a fuegos demientres la nueche, lo qu’empavorecía a los viaxeros, que dempués contabenlo, y más tarde, yá calaveres, refulxíen pola lluz de la luna, lo que tamién acoxonaba al personal. El resultáu, y funcionaba, yera la terror d’aquellos que s’enfrentaben a Timur, lo que facilitaba descomanadamente les sos victories.

Nel mundiu anguaño tenemos a Vladimir Putin, que lleva camín de dexar el so país como Iván el Tarrecible, va yá dellos sieglos, pero que, tocantes Ucrania, tres cuatro años de guerra, pretende derrotar pente medies la terror sobro los sos habitantes, a los que nun corta les tiestes, pero caza como animales na zona de Dnipro y Odesa con drones de guía personal, y con misiles balísticos en tol país. Unos misiles que nun busquen oxetivos militares o económicos, como los ucranianos faen colos sos drones nel territoriu rusu, sinon que gueten blancos civiles n’horario civil, como son los centros comerciales, les ilesies, los hospitales, escueles, y too aquello que, na so mente enfermiza, pueda llegar a torar l’arroxu y resistencia del pueblu ucranianu. Enquivocase.

Too-y sal al revés a Putin. Estratéxicamente va yá tiempu que lo d’Ucrania amosóse como’l gran erru históricu del exaxente del KGB, y agora, faltos del suministru de los yanquis, qu’anden curtios ellos de los sos propios misiles, son los franceses y los británicos lo que tienen entamao a suplir estes carencies, mientes la industria ucraniana entaina a atopar les sos soluciones. Con too, nun dexa de ser llamativa la poca atención que los medios de comunicación presten a esa sangría de civiles, en contraste con lo que pasa en Palestina. Ye lo qu’hai.

Raúl Suevos

A 23 díes vencíos d’agostu de 2026

Torna en castellán en repdiv.blogspot.com 

Los marielitos de Ceuta

 

Alló pel añu 2012, volaba yo dende Nueva York a L’Habana, aprovechando una d’eses grietes que’l Bloquéu pernomáu, non tan herméticu como dicen, tien tenío siempres. Al mío llau sentóse un xigante d’ébanu que d’entrada daba mieu. Dempués escubrí que yera un cachu pan, de centenu supongo, que llevaba una vida na ciudá de los rascacielos, con esposa y fíos yá nacíos yanquis, pero qu’aportara a aquel requexu aprovechando la ventana de 1980 nel puertu del Mariel.

Aquello entamó cola ocupación de la embaxada del Perú en L’Habana por parte d’unos cientos de cubanos fartucos de Fidel, y l’afirmación, impulsiva y non meditada, del presidente norteamericanu Bill Clinton, en cuantu que diba acoyer a tolos que llegaren, dalgo que’l cuciu Fidel aprovechó pa unviá-y, dende’l puertu de Mariel, a una hora de L’Habana, unos ciento veinte mil cubanos; ente los que metió delincuentes lliberaos de les cárceles pal casu, enfermos psiquiátricos y toa mena de casos particulares; tamién milenta de mozos, lo meyor del país, qu’aprovecharon esa ventana d’oportunidá pa colar de la cárcel na que se camudara Cuba. Ente ellos el mío collaciu d’asientu, que tornaba al país per primer vegada, cargáu de tou tipu de regalos pa la familia, munchos de los cualos sedríen requisaos nel aeropuertu habaneru.

Cola salida d’esa xente, que Brian de Palma retrata maxistralmente en Scarface, con un Al Pacino espectacular y una Michelle Pfeifer perguapa, Fidel pudo cantar llínea, pues desentemangábase d’un montón de dolores de tiesta, pero, a renglón seguíu, cuando les remeses d’esos “gusanos” aniciaron a llegar a la islla, ye posible que glayara ¡Bingo¡ pues esi rublu, el de les remeses esteriores, ye quiciabes el más importante del país dende que los soviéticos, de la mano de Gorbachov, abandonaron la islla bonita.

Si agora mos paramos un momentín a pensar sobro la batalla de guerra híbrida que Marruecos acaba de desendolcar, y gananos, en Ceuta, van ver vustedes múltiples paralelismos, especialmente no de les remeses esteriores, conceuto que la IA me diz que supón el 7.5% del PIB marroquí anguaño, y tamién en cuantu que, ente los recalcitrantes qu’aínda siguen en Ceuta, cabe la posibilidá de qu’haya un númberu importante de los lliberaos de les cárceles marroquís con ocasión de la fiesta del Tronu, tamién que, ente los demás, los mozos contrarios al sistema políticu del país, monarquía constitucional, non parllamentaria, una mayoría fueren futuros xeneradores de problemes, especialmente los rifeños, siempres contrarios al xugu del sultán.

Equí, n’España, casi too s’enfoca dende’l prisma gobiernu/oposición, pero esta invasión, conceutu militar, alloñáu del tradicional problema migratoriu y humanitariu, déxamos nuna posición de precariedá énte los nuesos socios europeos, que ven con preocupación descomanada cómo España se convierte nun panal de rica miel pa la emigración irregular, y puerta falsa, a continuación, pa los sos países. Ye lo qu’hai.

Raúl Suevos

A 20 díes vencíos d’agostu de 2026

Torna en castellán en repdiv.blogspot.com 

Pensamientu grupal nel Kremlin

 

Los sociólogos dan definiciones más o menos ellaboraes pa esi conceutu, el del pensamientu grupal, pero la forma más visual de entendelo ye, quiciabes, la película La Cayía, de 2005, que dalgunos tornen tamién como El fundimientu, na que se retraten los diez díes caberos de Hitler nel so bunker de Berlín, y na que se güeya cómo’l grupu qu’arrodia a un líder, al qu’aportaos a esi puntu se teme como al diañu, anque al entamu fuera idolatráu, nun son a enmenda-y la plana en dala de les decisiones que toma, y, aínda más, nin tan siquier s’atreven a presenta-y la realidá que les informaciones llegaes al centru de poder tán describiendo.

Esi pensamientu grupal suel dase nela rodiada de líderes estraordinariamente fuertes, y a casi toos vustedes vendrá-yos a la tiesta el actual gobiernu yanqui dirixíu per esi ogru naranxáu qu’a toos mos lleva de cabeza. Nela nuesa redolada cabría entrugase hasta qué puntu nel palaciu de la Moncloa nun impera tamién esi pensamientu grupal, pero, sicasí, ye’l señor Putin el que me lleva a meteme nese güertu.

Ellí, nel Kremlin, desendolcase una película que quiciabes namái se xustifique dende esi tipu de pensamientu grupal nel que naide del Estáu mayor s’atreve a dicii-y al xeneral que l’enemigu avanza en tolos frentes, y que les fuercies propies tán casi esgotaes, que la industria y, en xeneral, la economía del país, tán cayendo en picao, y que yá nin siquier les manipulaes encuestes sociolóxiques son a esconder el descensu agudu del apreciu de la ciudadanía pol líder inconmensurable. Ye lo qu’hai.

Los ucranianos nun namái detuvieron la invasión, tienen reinventao’l campu de batalla convencional, qu’agora, en tol mundu, namái necesitamos güeyar pal Llibanu, Iran, o’l Sahel yihadista, desarrollase colos parámetros de la guerra de drones, qu’ellos, los homes y muyeres de Zelensky, tienen llevao a cotes inimaxinables va nmái dellos meses. Y Vladimir paez l’únicu en nun querer enterase.

Dicen que’l sátrapa del Kremlin ta la gueta de chocar con dalgún de los países bálticos, provocando con ello a la OTAN, pa d’esa forma tener xustificación pa una movilización xeneral, el so recursu caberu, anque non una solución, pues, sí o sí, nel fondu él sabe que, al mou moscovita, si dexa’l palaciu del poder, como otros, namaí-y quedaría la cayía dede una ventana alta.

El pensamientu grupal ye lo que tien, que nun tien salida bona, nin en Moscú nin en dala parte.

Raúl Suevos

A 11 días vencíos de xunetu de 2026

Torna en castellán en repdiv.blogspot.com