De Tamerlán a Putin

 

Ridley Scott ye un artista de la dirección cinematográfica, y tamién de la manipulación histórica en beneficio los resultaos populares de los sos trabayos. Vímoslo en Gladiator, y tamién nel Reinu de los Cielos. Alló montaba una pirámide de tiestes cortaes tres la batalla los Cuernos de Katyn, au pola nefasta dirección los cruzaos foron masacraos por Solimán el Magníficu. El responsable, Guy de lusiñán, acabaría plácidamente como reI de Chipre.

El casu ye que les pirámides de tiestes, col tiempu calaveres, yeren una especialidá de Timur Han, Tamerlán, Timur el coxu. Un gran psicópata asesín y guerreru que llegó a formar un imperiu, con capital en Samarcanda, qu’a la so muerte esbarrumbose, y hasta onde aportó una embaxada del rei de Castilla al entamu’l S. XIV, liderada por Ruy González de Clavijo, quien escribiría una crónica, “Embaxada a Tamerlán”, con tantu éxitu na so dómina como “El Milione” de Marco Polo.

Les pirámides, na so primer fase, de descomposición, producíen dalgo paecío a fuegos demientres la nueche, lo qu’empavorecía a los viaxeros, que dempués contabenlo, y más tarde, yá calaveres, refulxíen pola lluz de la luna, lo que tamién acoxonaba al personal. El resultáu, y funcionaba, yera la terror d’aquellos que s’enfrentaben a Timur, lo que facilitaba descomanadamente les sos victories.

Nel mundiu anguaño tenemos a Vladimir Putin, que lleva camín de dexar el so país como Iván el Tarrecible, va yá dellos sieglos, pero que, tocantes Ucrania, tres cuatro años de guerra, pretende derrotar pente medies la terror sobro los sos habitantes, a los que nun corta les tiestes, pero caza como animales na zona de Dnipro y Odesa con drones de guía personal, y con misiles balísticos en tol país. Unos misiles que nun busquen oxetivos militares o económicos, como los ucranianos faen colos sos drones nel territoriu rusu, sinon que gueten blancos civiles n’horario civil, como son los centros comerciales, les ilesies, los hospitales, escueles, y too aquello que, na so mente enfermiza, pueda llegar a torar l’arroxu y resistencia del pueblu ucranianu. Enquivocase.

Too-y sal al revés a Putin. Estratéxicamente va yá tiempu que lo d’Ucrania amosóse como’l gran erru históricu del exaxente del KGB, y agora, faltos del suministru de los yanquis, qu’anden curtios ellos de los sos propios misiles, son los franceses y los británicos lo que tienen entamao a suplir estes carencies, mientes la industria ucraniana entaina a atopar les sos soluciones. Con too, nun dexa de ser llamativa la poca atención que los medios de comunicación presten a esa sangría de civiles, en contraste con lo que pasa en Palestina. Ye lo qu’hai.

Raúl Suevos

A 23 díes vencíos d’agostu de 2026

Torna en castellán en repdiv.blogspot.com 

Ensayando nel aire

 

Garróme tornando pa casa, y quedéme tan ablucáu que perdí la oportunidá de sacar el teléfonu y grabalo. Falo del A400, l’avión d’Airbus que va participar el domingu nel “nuesu” festival aéreu, y sorayo lo de nuesu porque, anque seyamos una ciudá marítima, la realidá de los 300 mil espectadores que ca añu algama l’eventu, conviertenlu en dalgo mui de casa, como la Selmana Negra, l’afortunadamente recuperada Feria taurina, o la Soledá/Remedios de Cimavilla.

El casu ye que l’A400, un aparatu impresionante, por tamaño y capacidaes, ye capaz, visto lo d’esta mañana, de maniobrar casi como’l vieyu Hercules, al tiempu que tresporta muncho más qu’aquel, y a muncha más distancia, otorgando-y al nuesu Exércitu una capacidá de proyeición enantes inesistente, ya imprescindible pa los tiempos anguaño.

Cuando acaba les sos evoluciones sobro l’arenal de San Lorenzo nun puedo evitar pensar, con gulisma, nes munches peticiones de compra que l’actual situación xeopolítica tien promovíu al aparatu, y claro, los puestos de trabayu d’alta cualificación que, na zona de Sevilla, au s’ensamblen los aviones, suponen pa güei y los años vinientes.

Equí siguimos pendientes del Tallerón y el Taller de Barros, ensin saber cómo, a la fin, va acabar el vodevil d’Indra, especialmente cuando, tres el cambéu na so presidencia, agora con un catalán al frente, paez que ye aquella rexón, ensin dala tradición nel ámbitu de la Defensa, la que s’apareya pa cobrar los réditos de l’avalancha inversora que’l conflictu ucranianu, y Putin, paecen trayer a la industria de defensa europea, y de rebote a la española. Vamos ver.

Pal domingu a la que nun veremos va ser la Princesa Leonor, flamante oficial pilotu del nuesu Exército del Aire ¡sedría un puntazu¡ que’l branu viniente va recibir los despachos de teniente de los tres exércitos; pero sí al Eurofighter, qu’espero mos aforre’l subidón, casi un patatús, que l’añu pasáu mos dio’l F-18, cola so maniobra evasiva provocada por unes gaviotes. Imprevistos del direutu.

Tampocu va venir nunca el FCAS, sigles que cuerrespondíen, escribo en pasáu, al futuru sistema de combate aéreu, esto ye, el sustitutu del Eurofighter, proyeutu nel que participábemos, pero que las vieyes suspicacies ente alemanes y franceses tienen echao abaxo, dexándonos a nós tiraos metanes el camín. Ye lo qu’hai.

Sicasí, paez que, como siempres, el domingo va ser una fiesta, y hasta’l tiempu prepárase a cooperar, con una bona previsión pa la mañana dominical, que va vistir de gala, quiciabes la más importante del branu, la sablera de San Lorenzo.  

Raúl Suevos

A 24 díes vencíos de xunetu de 2026

Torna en castellán en repdiv.blogspot.com 

La movilidá d'Asturies

 

Ye un conceutu ésti, el de la movilidá, que de cutiu mos asalta nes noticies, particularmente nes llocales, dominiu que na ciudá de nueso pertenez al conceyal Barcia, gran xugador de golf, anque esti aspeutu de la so personalidá nada intervenga nel otru. Sicasí, esa cuestión, la movilidá, tien ángulos y estensiones que van muncho más lloñe del perímetru del conceyu xixonés; por casu, y lleváu del mío pasáu profesional, el del campu operacional européu, nel que la Xunión y la OTAN tán enfrascaos en programes qu’abarquen el continente y que busquen facilitar el movimientu al traviés d’él d’eses tropes que, llegada la ocasión, o llegáu Putin, cabría especificar, sedría necesario desplazar dende les bases estremaes nes que les unidaes nacionales acantonen en tiempu de paz, o preguerra que diríen dalgunos. Ye lo qu’hai.

El casu ye que la movilidá, en tolos sos aspeutos, ye verdaderamente importante, tantu pa dir del centru al Nuevu Xixón, como pa dende esti barriu desplazase a Madrid, y neso, la movilidá, siempres tenemos dío coxicando los asturianos. Y siguimos faciéndolo.

Nel mío casu, por profesión, tiéme tocao viaxar y vivir pente mediu mundu, con tresportes de toa mena, pero, les mío alcordances más vieyes algamen a los cinco añinos, cuando vivía en Salinas, u nací, y los viaxes braniegos, cola mío tía güela Xenerosa, qu’hibernaba con nós, hasta Marentes, nel requexu caberu d’Íbias, saliendo de nueche y llegando col tapecer viniente. Cruzando’l puertu del Connio/Couñó/Coño naquel coche de llínea, anterior al ALSA, con asientos nel techu que, si yera necesario, socupaben los varones, y a min preocupabenme pensando en cómo diben tornar la ramasca de los carbayos en llegando al puertu. Historiee de vieyu.

Güei paez que vamos meyor, paez, pero nun va muncho, les obres interminables del Negrón, ensin descuentu na tarifa, y les repentines en Payares, devolvieronmos a los años 60, cuando una nevada fuerte incomunicábanos a espensas de les quitanieves, y agora, cuéntamos LNE, tenemos que trepar con un ministru de tresportes miserable, que mos vacila mientes nun dexa de da-y a la tecla de les riedes sociales, dalgo, al paecer, más políticamente rentable que meter l’anchu européu na ñueva llínea férrea. Y ye que, anque paeza mentira, eso, lo de les riedes, acaba por ser más rentable, en votos, que les polítiques reales, anque en dalgunos casos, sigamos usando infraestructures construyíes por Primo de Rivera, el dictador, aquel col que facíen migues los socialistes…los de enantes.

Mentanto prepárense vustedes pa siguir asistiendo ¿impasibles? a la decadencia d’esta tierra, que una vegada fuera faru.

Raúl Suevos

A 19 díes vencíos de xunetu de 2026

Torna en castellán en repdiv.blogspot.com