La OTAN en Turquía, averao a Atenes

 

Llevamos dellos díes falando del cume añal de la OTAN, nesta ocasión n’Ankara, nel altiplanu anatoliu, esto ye, abondo lloñe del Mar Exéu, el que fuera’l tarrén de confrontación, va munchos sieglos, de les grandes potencies de la dómina, Esparta y Atenes, pero que, quiciabes, convenga recordar.

El mundiu griegu, que non l’helénicu, viénose abaxo tres la guerra del Peloponesu, aquella que s’anició porque un de los contendientes cayó no que dende entoncenes se conoz como la Trampa de Tucídides, l’autor de la historia d’esi conflictu, y él mesmu un de los protagonistes políticos en cuantu qu’opositor de Pericles na mesmesima Atenes.

Tres les pernomáes guerres escontra los perses, recuerden les Termópiles, Maratón o Salamina, el mundiu griegu organizóse en dos ligues de ciudaes, la una de calter marítimu, liderada por Atenes, y con nidios designios imperialistes, dalgo que manifestaba col poder de la so flota y el sometimientu de los sos asociaos, que debíen aportar oru pa la construcción de l’Acrópolis y el so tesoru, y homes coles sos trirremes pa nutrir l’exercitu ateniense. Con consecuencies tarrecibles pa los desobedientes, como-yos asocedió a los de Melos, que por pretender caltenese neutral sufrió la execución de tolos varones y la esclavitú de muyeres y neños.

La lliga del Peloponesu, liderada per Esparta, yera más agraria, y nun tenía munchos barcos, pero sí guerrieros, hoplitas, colos que demientres la llarga guerra afaró les tierres de los otros. Yera, magar que tuvieren reis, tan democrática o participativa como l’Ateniense, pues les grandes decisiones tomábense n’asambleya de ciudadanos. Y temíen el crecimientu escomanáu ya imperial de l’Atenes de Pericles, d’ehí, tres munches deliberaciones, la declaración de la guerra. La trampa.

Cuando too acabó, tres casi treint’años, cola derrota d’Atenes, dambos contendientes taben esgotaos, y pasaron a depender de los persas, en quienes, a la fin, se sofitara Esparta; y namái un tal Filipu, y el fiu Alexandru algamaron a desequilibrar la situación años dempués.

Agora, nun mundiu más grande que’l d’entós, vivimos tamién en dos ligues, y la nuesa entama a paecese demasiao a la de Delos, la qu’Atenes lideraba, anque pa la nuesa desgracia, en llugar de Pericles, que mos dexó aquel maraviosu discursu fúnebre y la definición de democracia, tenemos a un ogru naranxáu que lleva camín d’arruinar la lliga y al so propiu país, y que, n’Ankara, probablemente, va damos otru exemplu de cómo él interpreta les rellaciones internacionales, particularmente colos sos socios. Esperemos nun acabar como Melos.

Raúl Suevos

A 7 díes de xunetu de 2026

Torna en castellán en repdiv.blogspot.com 

¿Amburará Paris?

 

El branu de 2006 garróme finando los mios dos años de destín profesional na capital d’Alsacia, Estrasburgu; una rexón que recibe millones de turistes tolos años polos atractivos induldables, n’árees y dominios estremaos, qu’atesora. La ciudá ye, ensin dulda, el sacaliñu principal de la rexón, y, nella, la coñocía como la Gran Islla, el so barriu antiguu arrodiau per grandes canales, cola so descomanada catedral gótica, ye’l faru qu’atrae milenta d’insectos amarutaos de turistes.

Nesi panal de miel, con forma d’almendra, atopamos la Plaza Kleber, cuadrangular, con edificios bien guapos, de factura medieval los vieyos y prusiana los modernos, y, dominándola, la estatua d’aquel xeneral alsacianu al que Napoleón dexó abandonáu n’Exiptu, cuando los fíos de la Gran Bretaña acabaron coles madures, dexándo-y namái les dures. Ye lo qu’hai.

Xunto a esta plaza tenemos la de l’Homme de Fer, muncho más moderna, y au se crucen les dos llínees del entoncenes modernísimu tranvía de la ciudá. Y dominando les dos, dende’l so puntu de fricción, la Torre Valentin, un edificiu de catorce pisos -yo vivía nel octavu- de estilu brutalista y que ruempe col clasicismu de tol cascu históricu, anque aporta a los sos habitantes unes vistes esplendides sobro la Selva Negra y los Vosgos, y tamién sobro lo qu’asocede a los sos pies. 

Estrasburgu cuenta con una pernumberosa población magrebí, dalgo que yo sabía, pues nel mío batallón, el del Cuartel Xeneral del Eurocuerpu, tenía, tien, el so cuartel nel barriu de Neuhof, banlieu de la ciudá, y ellí, ca Navidá, teníemos que poner a bon recaudu los medios autu pa enzancar les efusives ya incendiaries celebraciones del Fin d’añu, o lo que fuere.

Demientres el Campeonatu del mundu, les victories sucesives de la selección francesa rexuntaben baxo la mío ventana una multitú de mozos qu’acaben enllenando les dos places, trayíos polos tranvíes, pa dempués esparnase pel centru enantes de subir andando haza los sos barrios, con tantu de gallaríu, pero ensin que la cosa llegara a amburar. Y too ello col detalle de l’ausencia de la bandiera francesa, pues toles que se podían güeyar yeren de países del norte d’África. Coses.

Pa la final, escontra Alemaña, selección anfitriona y cordial enemigu históricu de Francia, la situación camudó radicalmente, en cantidá, pues paeciera que nun quedara un alma nos barrios de les afueres, toos aparentaben tar nel centru, y pola radicalidá, pues dende’l final de la derrota aquello convirtióse nun campu de batalla urbanu, nel que la policía paecía llevar les de perder. Na capital fo peor.

El xueves xueguen Francia y Marruecos ¿Amburará Paris?

Raúl Suevos

A 5 díes vencíos de xunetu de 2026

Torna en castellán en repdiv.blogspot.com 

Evaristo San Miguel

 

Xixón ye una ciudá con munches places, de tou tamañu y condición, pero hai dos qu’atesoren esa carauterística que na capital denominen casticismu. Falamos d’esa plaza del Parchís y la coñocía como la Plazuela. La primer tien pasao por varies denominaciones, anque magar ello siempres torna al popular, el Parchís, y caltien casi completa la so fisonomía d’edificios clásicos, toos imponentes, anque a min préstame particularmente la sobriedá racionalista que Manuel del Busto-y dio a la torre blanca, onde, nos díes aciagos de 1937, s’instalara na so curtia vida’l Gobernín.

La segunda, la que güei m’interesa ye la que lleva’l nome d’Evaristo San Miguel, desconocíu militar, decimonónicu y asturiano, pa la mayoría de la población, y de trayectoria mui semeyante a la del xeneral Del Riego -hai quien asegura que foi l’autor de la lletra del himnu- y que, con un periplu vital mui movíu, o aturbolináu, finó los sos díes, al contrariu que’l fiu de Tuña, de forma pacetible.

La plaza, que debería llevar el nome de Manuel del Busto, pola cantidá d’obres suyes qu’aínda-y dan rellumu, cuenta con dellos edificios memorables, como’l d’estilu art decó y fachada d’alegoríes azteques, como l’hotel Moderne; o casi frente a él, el racionalista y art decó, primer construyío n’hormigón armáu en Xixón, ente Menendez Valdés y Capua.

Del xeneral asturianu queda un bustu nel centru xeométricu de la plaza, y, frente a él, pelea pola supervivencia y resiste, el quioscu de Del Busto, fiu nesti casu, d’estilu racionalista y que, tres dellos años zarráu, vivió una curtia esperiencia de bar con terraza, mui esitosa na mío opinión, pero efímera y frustrante pa quienes apreciábemos tomar un cafetín al sol mientes lleíemos la LNE. Ye lo qu’hai.

Cuando pieslló, lleí que la cuota que l’Ayuntamientu-y cobraba facíalo inviable pa la empresa, pero güei enteróme que son varios los intentos posteriores d’axudicación, ca vegada con licitación más baxa, la cabera risible, que queden desiertes; y entrúgome au queden esos empresarios de la hostelería que glayen ca branu por más metros de vía pública nes fiestes pa llantar los sos garitos temporales, pero que nun ven interés en caltener una pieza del urbanismu social de la ciudá, que tamién ye historia de la mesma.

Camuden los usos, y con ellos los nichos económicos, como nel casu de los quioscos, pero a min quédame un puntu de desasosiegu al constatar qu’una parte de la sociedá económica, agora aparentemente puxante, nun atopa incentivu na recuperación de la memoria viva de la villa.

Raúl Suevos

A 27 díes vencíos de xunu de 2026

Torna en castellán en repdiv.blogspot.com