D'Estocolmu a Bonos Aires, de alquiler

 

Los mocinos de la mío xeneración, coincidiendo col mayu parisinu del 68, teníemos un mitu, Suecia; pero nun creyan vustedes que l’asuntu venía pel llau de les sueques, que tamién, yera pol conxuntu, que mos aportaba nes páxines d’un llibru qu’entoncenes facia furor, “Suecia, infiernu y paraísu”, del italianu Enrico Altavilla, del que mos quedábemos, obviamente, con la parte paradisíaca.

Aquella socialdemocracia paecía la solución pal home modernu, tamién el del futuru, el d’anguaño, pa entendenos. Pero la realidá siempres s’impon sobro los que venden duros a cuatro pesetes. Tamién alló, en Suecia, au, nel desendolcu d’esi estáu benefactor, llanzaronse a promover lleis, tamién a construyir, que facilitaran l’accesu a un alquiler facederu a la población.

Güei aquello ye un infiernu onde les esperes p’acceder a un alquiler, según les zones, pueden llegar a los veinte años, y yá nun son tan baratos, nin muncho menos. Amás, el sistema traxo la concentración por races o relixones, esto ye, los vieyos guetos. Anguaño ellí tán empantanaos nuna maraña de lleis y normes qu’imposibiliten atopar una solución si non se faen cambeos fonderos.

De l’Arxentina nun tengo dalu llibro adolescente, más alló del “Martin gaucho”, que nun vien a cuentu, creyo, como tampocu Facundo Cabral, que los sos cancios y vida m’encantaben -aínda recuerdo’l so recital nel Xovellanos- y que termino atropelláu, él y el so caballu, por un camión nel arcén d’una carretera pampeña.

Ellí, dende Hipolito Irigoyen p’acá, que dexó’l poder en 1930 pente medies guelpe militar, del que yá formaba parte un tal Xuan Domingo Perón que venía de tomar notes na Roma fascista en cuantu agregáu militar arxentín, nun tienen esfrutáu más qu’infiernu, tantu si na Casa Rosada había uniforme militar o traxe de raya diplomática, o bién falda femenina. Ye lo qu’hai.

Agora, escoyíu por ellos, tienen a Xavier Milei, un economista d’idees radicales que, aprovechando que los “chés” tán al cabu de too, tres tantos años de ruina d’un de los países más ricos del mundiu, quien tien puesto pates arriba la economía nacional, con métodos radicales que la macroeconomía tien recibíu con alborozu y resultaos sorprendentemente bonos. La microeconomía, la de les families, va más lenta, pero, a lo menos, nun va tan mal como enantes.

No de los alquileres tien tirao pela cai del mediu. Lliberalización total; too s’alcuerda ente arrendatariu y propietariu, hasta la moneda de pagu, y, de xacíu, la duración del contratu. L’estáu namái entra p’asegurar la propiedá, esto ye, los desahucios, llegáu’l casu. Y los resultaos paecen tener sío inmediatos. Los precios tienen baxao, non esaxeradamente, y la oferta tiénse casi doblao.

Nin Estocolmu nin Bonos Aires, lo nueso ye otra cosa.

Raúl Suevos

A 3 díes vencíos d’ochobre de 2026

Torna en castellán en repdiv.blogspot.com 

La xestión del desengañu

 

Güei tráyemos la prensa la noticia de que, una vegada más, el enllaz Lloreda-Veriña, que debiera alliviar el tráficu de camiones per La Calzada, torna a la llínea de salida. Esta ocasión, paez ser, un informe d’impactu ambiental ye’l responsable, pero, como siempres, los paganos son los vecinos d’esi barriu, nel que pasé unos cuantos años de la mío infancia, que na mío opinión merecen un Premio Princesa d’Asturies pol exemplu de civismu, y xestión de la frustración, que lleven dando demientres tantos años.

Ye de suponer que la nuesa alcaldesa, con tol drechu, fará usu d’esta enésima tomadura de pelu a la ciudá, que se xune a les del metrotren, la intermodal, Cabueñes, etc. pa cuando llegue la campaña eleutoral del añu viniente. Y Tampocu me diba sosprender si, como vien asocediendo dende que’l nuesu actual sistema políticu ta vixente, el partíu de los cien años d’honradez -qu’escarniu nel momentu actual- torna a ser mayoritariamente votáu. Ye lo qu’hai.

Nes mesmes páxines cuentenmos que somos, Asturies, la penúltima rexón en crecimientu n’España, namái superamos a Cantabria. Pero en cambiu somos campeones nacionales n’absentismu llaboral. Asuntos menores dambos mientes nun mos suban el preciu de la botella sidra, pero dalgún, nun sé quién, debiera tomar nota ya intentar poner remediu ¿Haza ónde vamos?

Lo del decaimientu del proyeutu d’enllaz de Veriña llega cuando se vota nel Congresu esos decretos contradictorios de nome Maricarmen. Una tirita que pretende tallar la sangría d’una ferida que requier sutura con dellos puntos, pero asina ye la política moderna, tan dependiente de los asocedíos puntuales que pueden dar un guelpe d’aíre qu’hinche les veles de la nave p’asina poder siguir alantre per un tiempu.

La realidá ue que Maricarmen y Ceuta van ser, a día de güei, los temes que lideren la campaña eleutoral venidera; vivienda y emigración en términos fondamentales y duraderos, y, en dambos casos, el gobiernu actual, nel poder demientres los ocho años caberos, pocu o nada se tien fecho tocantes l’asuntu, pero asina ye la política moderna, na qu’un escandalu tapa l’anterior, como asocediiera col apagón, o Adamuz, inclusive cola corrupción, a nivel partíu o familiar, que namái’l pundonor de los xueces, y el ritmu sosegáu de l’apisonadora xudicial pueden facer que siga llamando l’atención del votante.

Tiempos convulsos nes sociedaes occidentales, nun sólo n’España, que paecen pasar per un periodu d’intranquilidá que quiciabes seya precursor de dalgo. Quién sabe.

Raúl Suevos

A 2 díes vencíos d’ochobre de 2026

Torna en castellán en repdiv.blogspot.com