De l'operacional y lo estratéxico

 

Maxino que, nel palaciu de La Moncloa, entá deben tar reallugando muebles y cuadros de les paredes tres el terremotu que provocó esi informe de la policía nacional, malditu informe, qu’esbarató tol rellatu que, penriba de toles evidencies, y cola direición inflexible del presidente del gobiernu, tábase desendolcando dende’l día dempués de la visita del susodichu a la mártir, porque lo qu’ellí asocede ye un martirio, ciudá de Ceuta.

L’informe, ampliu y concenziudu, nun señala nin al rei nin al gobiernu de Marruecos, ente otres coses porque nun ye la so misión, pero, tres dar cuenta detallada d’aiciones y omisiones, indica un designiu “operacional y estratéxicu” nes mesmes; y si tenemos en cuenta lo qu’ellí  asocedió, ye fácil decatase que, no operacional, esto ye, na direición de la operación d’asaltu multitudinariu con fases nidies y definíes, namái podría atopase una capacidá organizativa que correspuende a la Direición Xeneral de Seguridá del gobiernu marroquí. Anque naide lo señale.

Sicasí, la operación, enmarcada nuna guerra híbrida, namái tenía como cometíu reconocer y evaluar les nueses defenses, dalgo que ensin dulda llograron. Tres ello ye probable que pescanciaran que, a lo menos no político, tamos más débiles de lo qu’ellos mesmos, probablemente, pensaben. Y nesa guerra aportamos a lo estratéxico, aludío tamién nel informe, un conceutu qu’abarca más tiempu y espacio que’l de les nueses places de soberanía, y que, algamaos hipotéticamente esos oxetivos, pasaría al oxetivu viniente, que nun sedría otru que les islles Canaries.

Esa estratexia coincide plenamente col conceutu del Gran Marruecos, dalgo que Hasan II tenía perfeutamente definíu y que’l so fiu, Mohamed VI, continúa con la parsimonia d’un derviche, y col mesmo fervor islámicu, que pa eso ye l’Amir al muminín, comendador de los creyentes. Y nós ¿Qué’stratexa?

El nuesu Exércitu tien, siempres los tevo, planes de continxencia pa responder a una aición militar sobro les nueses ciudaes, anque, según lo visto, nun esistíen pa esta mena d’operación híbrida, y tampocu hai elementos pa pensar que’l Conseyu Nacional de Seguridá siquier se lo plantexara -Marruecos ye un vecín amable y cooperativu, gobiernu dixit- pero la tensión a la que tá siendo sometía la población ceutí ye inmerecía, y namái una respuesta acordies cola dimensión de la menacia va poder da-yos una esperanza pal futuru, qu’anguaño perdieron.

La disuasión consiste en facer entender a quien te menacia que ca una de les sos aiciones va tener contestación, y qu’ésta va ser más costosa ca vegada.

Raúl Suevos

A 4 díes vencíos de septiembre de 2026

Torna en castellán en repdiv.blogspot.com 

Los marielitos de Ceuta

 

Alló pel añu 2012, volaba yo dende Nueva York a L’Habana, aprovechando una d’eses grietes que’l Bloquéu pernomáu, non tan herméticu como dicen, tien tenío siempres. Al mío llau sentóse un xigante d’ébanu que d’entrada daba mieu. Dempués escubrí que yera un cachu pan, de centenu supongo, que llevaba una vida na ciudá de los rascacielos, con esposa y fíos yá nacíos yanquis, pero qu’aportara a aquel requexu aprovechando la ventana de 1980 nel puertu del Mariel.

Aquello entamó cola ocupación de la embaxada del Perú en L’Habana por parte d’unos cientos de cubanos fartucos de Fidel, y l’afirmación, impulsiva y non meditada, del presidente norteamericanu Bill Clinton, en cuantu que diba acoyer a tolos que llegaren, dalgo que’l cuciu Fidel aprovechó pa unviá-y, dende’l puertu de Mariel, a una hora de L’Habana, unos ciento veinte mil cubanos; ente los que metió delincuentes lliberaos de les cárceles pal casu, enfermos psiquiátricos y toa mena de casos particulares; tamién milenta de mozos, lo meyor del país, qu’aprovecharon esa ventana d’oportunidá pa colar de la cárcel na que se camudara Cuba. Ente ellos el mío collaciu d’asientu, que tornaba al país per primer vegada, cargáu de tou tipu de regalos pa la familia, munchos de los cualos sedríen requisaos nel aeropuertu habaneru.

Cola salida d’esa xente, que Brian de Palma retrata maxistralmente en Scarface, con un Al Pacino espectacular y una Michelle Pfeifer perguapa, Fidel pudo cantar llínea, pues desentemangábase d’un montón de dolores de tiesta, pero, a renglón seguíu, cuando les remeses d’esos “gusanos” aniciaron a llegar a la islla, ye posible que glayara ¡Bingo¡ pues esi rublu, el de les remeses esteriores, ye quiciabes el más importante del país dende que los soviéticos, de la mano de Gorbachov, abandonaron la islla bonita.

Si agora mos paramos un momentín a pensar sobro la batalla de guerra híbrida que Marruecos acaba de desendolcar, y gananos, en Ceuta, van ver vustedes múltiples paralelismos, especialmente no de les remeses esteriores, conceuto que la IA me diz que supón el 7.5% del PIB marroquí anguaño, y tamién en cuantu que, ente los recalcitrantes qu’aínda siguen en Ceuta, cabe la posibilidá de qu’haya un númberu importante de los lliberaos de les cárceles marroquís con ocasión de la fiesta del Tronu, tamién que, ente los demás, los mozos contrarios al sistema políticu del país, monarquía constitucional, non parllamentaria, una mayoría fueren futuros xeneradores de problemes, especialmente los rifeños, siempres contrarios al xugu del sultán.

Equí, n’España, casi too s’enfoca dende’l prisma gobiernu/oposición, pero esta invasión, conceutu militar, alloñáu del tradicional problema migratoriu y humanitariu, déxamos nuna posición de precariedá énte los nuesos socios europeos, que ven con preocupación descomanada cómo España se convierte nun panal de rica miel pa la emigración irregular, y puerta falsa, a continuación, pa los sos países. Ye lo qu’hai.

Raúl Suevos

A 20 díes vencíos d’agostu de 2026

Torna en castellán en repdiv.blogspot.com 

Una crónica estremada

 

Cabe apuntar, de entrada, que’l xentíu na mesma yá daba cuenta del casi enllenu que s’esperaba tres l’apoteosis morantiana del día anterior. Una aglomeración a la que contribuyíen, na Grande, los antitaurinos, sofitaos por dalgunes formaciones polítiques, de escarsa o nula representación parllamentaria, que nestes verbenes atopen un mediu d’espresión, llamativamente nuna ciudá conocía por ser, como dicen los pixos, “pets-friendly”, colos perros como dueños y señores de les nueses cais. Ye lo qu’hai.

Venía yo interesáu en comprobar el paxellu del personal, pues na feria de Sevilla, televisada n’abiertu pola so televisión autonómica, decatemé que los señores llucíen abundantes americanes, dalgunos con corbata al cuellu; y les señores elegantísimes, como si dempués tuvieren “un compromisu”, y too ello col cimbréu casi constante d’un enxame d’abanicos multicolores. Y ye que Sevilla tien una color…

Equí l’asuntu va per otros caminos. Poques americanes, casi denguna, y les dames, arreglaes, más pa lueu dir a una sidrería qu’a un “party”, a lo menos nel tendíu de solombra. Arriba nos palcos quiciabes fuera diferente. Too ello, especialmente nos primeros toros, nos que, anque nun había sol, la humedá facia estragos, con un abaniquéu xeneral, si bien la mayoría yeren de propaganda en cartoncillu. Dempués el “churnu” yá mos perdonó un pocu.

De los toreros cabe apuntar que Talavante y Ortega ficieron lo que pudieron, especialmente colos sos segundos, y quiciabes emburriaos pola faena de Roca Rey al so primer, nel que, como un entendíu me tenía apuntado, “salió a por toes” dempués de la que Morante lio’l día anterior. Y ye qu’ellos dos representen güei la punta de lanza d’esi resurdir de la Fiesta Nacional, y alló onde van arrastren tras d’ellos un bon númberu d’aficionaos, y tamién dalgunos snobs. 

Nesi primer de Roca, nel qu’hasta’l terciu de banderilles foi sobresaliente, vióse dende l’entamu, brindando’l toru al públicu, que quería triunfar. Recibiólu a la verónica pero’l bichu andaba distrayíu, yéndose d’un caballu al otru nesa suerte. Dempués vieno’l platu fuerte, con Roca toreando de rodilles, con pases de frente, per detrás y cruzaos -quiciabes demasiaos- poniendo al tendío, por dalgo ye plaza de segunda, pates arriba. Siguió la faena con mas xestualización rodillera y, col toru yá cansadín, arrimándose hasta tocar el morru cola rodiella, temeridá que namora al tendíu pero que yo, que nun soi especialista, nun acabo de ver nidio.

Falló Roca de primer con un pinchazu, pa fulminar al toru nun segundu intentu y provocar un españíu de pañuelos que-y valieron dos oreyes. Mañana, güei, na novillada, va haber menos xente.

Raúl Suevos

A 17 díes vencíos d’agostu de 2026

Torna en castellán en repdiv.blogspot.com