Una crónica estremada

 

Cabe apuntar, de entrada, que’l xentíu na mesma yá daba cuenta del casi enllenu que s’esperaba tres l’apoteosis morantiana del día anterior. Una aglomeración a la que contribuyíen, na Grande, los antitaurinos, sofitaos por dalgunes formaciones polítiques, de escarsa o nula representación parllamentaria, que nestes verbenes atopen un mediu d’espresión, llamativamente nuna ciudá conocía por ser, como dicen los pixos, “pets-friendly”, colos perros como dueños y señores de les nueses cais. Ye lo qu’hai.

Venía yo interesáu en comprobar el paxellu del personal, pues na feria de Sevilla, televisada n’abiertu pola so televisión autonómica, decatemé que los señores llucíen abundantes americanes, dalgunos con corbata al cuellu; y les señores elegantísimes, como si dempués tuvieren “un compromisu”, y too ello col cimbréu casi constante d’un enxame d’abanicos multicolores. Y ye que Sevilla tien una color…

Equí l’asuntu va per otros caminos. Poques americanes, casi denguna, y les dames, arreglaes, más pa lueu dir a una sidrería qu’a un “party”, a lo menos nel tendíu de solombra. Arriba nos palcos quiciabes fuera diferente. Too ello, especialmente nos primeros toros, nos que, anque nun había sol, la humedá facia estragos, con un abaniquéu xeneral, si bien la mayoría yeren de propaganda en cartoncillu. Dempués el “churnu” yá mos perdonó un pocu.

De los toreros cabe apuntar que Talavante y Ortega ficieron lo que pudieron, especialmente colos sos segundos, y quiciabes emburriaos pola faena de Roca Rey al so primer, nel que, como un entendíu me tenía apuntado, “salió a por toes” dempués de la que Morante lio’l día anterior. Y ye qu’ellos dos representen güei la punta de lanza d’esi resurdir de la Fiesta Nacional, y alló onde van arrastren tras d’ellos un bon númberu d’aficionaos, y tamién dalgunos snobs. 

Nesi primer de Roca, nel qu’hasta’l terciu de banderilles foi sobresaliente, vióse dende l’entamu, brindando’l toru al públicu, que quería triunfar. Recibiólu a la verónica pero’l bichu andaba distrayíu, yéndose d’un caballu al otru nesa suerte. Dempués vieno’l platu fuerte, con Roca toreando de rodilles, con pases de frente, per detrás y cruzaos -quiciabes demasiaos- poniendo al tendío, por dalgo ye plaza de segunda, pates arriba. Siguió la faena con mas xestualización rodillera y, col toru yá cansadín, arrimándose hasta tocar el morru cola rodiella, temeridá que namora al tendíu pero que yo, que nun soi especialista, nun acabo de ver nidio.

Falló Roca de primer con un pinchazu, pa fulminar al toru nun segundu intentu y provocar un españíu de pañuelos que-y valieron dos oreyes. Mañana, güei, na novillada, va haber menos xente.

Raúl Suevos

A 17 díes vencíos d’agostu de 2026

Torna en castellán en repdiv.blogspot.com 

El Serengeti hispanu

 

Nunca tengo dio alló, nel Serengeti, esa estaya o requexu del Africa ecuatorial, o tropical, o de la sabana ¡qué más da¡ el casu ye qu’hai mil documentales que mos lleven ellí, y a la contemplación de los sos animales, nos que, posiblemente, atopamos amuesa de toles especies del enteru continente africanu. Una pasada.

A min, l’asuntu enganchame dende que siendo guaḥe pude gueyar aquella película con John Wayne de prota, Hatari, que diba de cazadores d’animales pa los zoolóxicos, y a los neños, supongo que tamién a los mayores, encandilábanos coles sos espectaculares imáxenes en technicolor, muncho más curioses que’l blancu y negru de Tarzán, qu’amás yera más escarsu no qu’a bichos se refier.

Nel Serengeti, anque son más bien feúchos, especialmente si los comparamos col nuesu toru de lidia, son los ñus los que primaen. Esos bovinos d’aspeutu desnutríu y cuernos curtios que se pasen la so esistencia pastando y moviéndose, trashumando, ente les estremaes zones de pastoréu d’aquellos llugares.

Son unos bichos estraños, a los que namái paez interesar el forraxe, la pación que diríemos n’Asturies; una actividá que namái abandonen, los machos, na dómina d’apareamientu, momento nel cualu los interesaos dediquense a chocar cuernos y encorrese pela sabana. Tiempu de folixa.

El restu del tiempu nada los saca dela so xera principal, el movimientu, que nun para anque tean metanes un riu y cocodrilos xigantescos se los quieran merendar; ellos a lo de so, avanzar a por praos ñuevos. Tampocu s’alteren, más alló d’unos segundos, cuando los lleones algamen a atrapar a un colega. Dan-y un güeyazu al asuntu y siguen pastando. Son los ñus el meyor exemplu que la naturaleza mos da de lo que pue ser una sociedá moderna. Como la de nueso.

Equí, nel nuesu Serengeti patriu, son dellos los respigos que tenemos sofrío nesta migración/llexislatura cabera, anque vienenme al tecláu, en mou rápidu, La Palma, l’apagón, la Dana, los trenes d'Adamuz los fueos estremaos, Zapatero, y también los plasmos na frontera ceutí, con especial mención, polo recien y lo mortífero, al de va unos díes. Y si vustedes repasen la repercusión política d’esos asocedíos, van reparar, tres facer memoria, que nada tien acontecío. Les encuestes mos dicen que l’efeutu nuna posible votación sedría mínimu, de cuenta que, recordando a los ñus, véome obligáu a pensar que nós, los españoles, tenemos un ciertu parentescu con esos bovinos africanos, cola diferencia qu’aquellos procreen en continuu, colo que reponen les baxes, y equí nin eso. Aquí, tres l’asaltu de las fieres, vamos pidir otra ración de gambes.

Raúl Suevos

A 5 díes vencíos d’agostu de 2026

Torna en castellán en repdiv.blogspot.com 

Cola nel Bibio

 

Venía yo per esa avenida que, con sentíu únicu y varios carriles, comunica la parte alta de la ciudá cola Guía y, de xaciu, la guapa plaza de toros de Xixón. Como quiera que diba ensin prieses, pude parame xusto enantes de llegar al Codema y reviciar, con pena pol so estáu d’abandonu, de la finca de dos plantes n’estilu racionalista qu’ellí resiste, con un xardín que va camudándose en selva, y una terraza que ye duldoso que naide la utilice, pues el so espaciu visual ta copáu pelos edificios altos qu’agora l’afueguen. Pastu pa construcciones ñueves paez el so más que probable futuru. Ye lo qu’hai, supongo.

Ellí, por aquello del sol, que yá pegaba, camudé d’acera y siguí’l mío camín haza’l cosu taurín, a ca pasu más contentu pues paecía que nun había personal na contorna de la taquilla, lo que me prometía un trámite rápidu, pero, unos minutos dempués, yá superao l’hospital de Begoña, y averandome a la esquina cola Carretera de la Costa, entamo a columbrar que sí, qu’hai cola, pero haza l’otru llau, y, un pocu más alló, afayo qu’ésta dobla en dirección al norte, como si quisieren rodiar l’edificiu.

Una cola tremenda, con personal muñíu de silles plegables qu’indiquen una profesionalidá qu’a min quédame mui llonxana, anque nun sabría dicir si por iñerizu a les coles, tendencia al dolor d’espalda, o simple falta d’abondu amor a la fiesta taurina como pa encarar delles hores ellí, de pie, ensin siquier tener la certidume de, a la fin, algamar les entraes qu’unu gueta, pues el tendío de solombra nun ye infinitu y unu yá no tien edá pa resistir nos tendíos asoleyaos si, como paez indicar lo que llevamos de branu, sal una bona tarde no climáticu.

Tres menos d’un minutu de pensalo, tomé la decisión de colar y marchéme cavildando en direición al Muru. Nun había ellí dala sonadiella, na cola, al contrario de cuando los antitaurinos se manifiesten. Nun se veía dengún aspeutu personal llamativu, al contrario de los que quieren la muerte del toru de lidia, ente los qu’aprecio tolos branos aspeutos variopintos, dalgunos d’ellos pa provocar un sustu si unu se los tropieza al doblar una esquina. Yera aquella una cola de xente sele, con apariencia d’espresar la so opinión pente medies los aplausos, los ohh de sospresa, o los pitos, llegáu’l casu, ente dalgún lance de disgustu. Yeren toos ellos xente d’apariencia mui normal que, cola so presencia ellí, y dempués enllenando la plaza, llancen un gritu d’amor a la Fiesta Nacional. Y que dure.

Raúl Suevos

A 4 díes vencíos d’agostu de 2026

Torna en castellán en repdiv.blogspot.com