De l'operacional y lo estratéxico

 

Maxino que, nel palaciu de La Moncloa, entá deben tar reallugando muebles y cuadros de les paredes tres el terremotu que provocó esi informe de la policía nacional, malditu informe, qu’esbarató tol rellatu que, penriba de toles evidencies, y cola direición inflexible del presidente del gobiernu, tábase desendolcando dende’l día dempués de la visita del susodichu a la mártir, porque lo qu’ellí asocede ye un martirio, ciudá de Ceuta.

L’informe, ampliu y concenziudu, nun señala nin al rei nin al gobiernu de Marruecos, ente otres coses porque nun ye la so misión, pero, tres dar cuenta detallada d’aiciones y omisiones, indica un designiu “operacional y estratéxicu” nes mesmes; y si tenemos en cuenta lo qu’ellí  asocedió, ye fácil decatase que, no operacional, esto ye, na direición de la operación d’asaltu multitudinariu con fases nidies y definíes, namái podría atopase una capacidá organizativa que correspuende a la Direición Xeneral de Seguridá del gobiernu marroquí. Anque naide lo señale.

Sicasí, la operación, enmarcada nuna guerra híbrida, namái tenía como cometíu reconocer y evaluar les nueses defenses, dalgo que ensin dulda llograron. Tres ello ye probable que pescanciaran que, a lo menos no político, tamos más débiles de lo qu’ellos mesmos, probablemente, pensaben. Y nesa guerra aportamos a lo estratéxico, aludío tamién nel informe, un conceutu qu’abarca más tiempu y espacio que’l de les nueses places de soberanía, y que, algamaos hipotéticamente esos oxetivos, pasaría al oxetivu viniente, que nun sedría otru que les islles Canaries.

Esa estratexia coincide plenamente col conceutu del Gran Marruecos, dalgo que Hasan II tenía perfeutamente definíu y que’l so fiu, Mohamed VI, continúa con la parsimonia d’un derviche, y col mesmo fervor islámicu, que pa eso ye l’Amir al muminín, comendador de los creyentes. Y nós ¿Qué’stratexa?

El nuesu Exércitu tien, siempres los tevo, planes de continxencia pa responder a una aición militar sobro les nueses ciudaes, anque, según lo visto, nun esistíen pa esta mena d’operación híbrida, y tampocu hai elementos pa pensar que’l Conseyu Nacional de Seguridá siquier se lo plantexara -Marruecos ye un vecín amable y cooperativu, gobiernu dixit- pero la tensión a la que tá siendo sometía la población ceutí ye inmerecía, y namái una respuesta acordies cola dimensión de la menacia va poder da-yos una esperanza pal futuru, qu’anguaño perdieron.

La disuasión consiste en facer entender a quien te menacia que ca una de les sos aiciones va tener contestación, y qu’ésta va ser más costosa ca vegada.

Raúl Suevos

A 4 díes vencíos de septiembre de 2026

Torna en castellán en repdiv.blogspot.com 

Los marielitos de Ceuta

 

Alló pel añu 2012, volaba yo dende Nueva York a L’Habana, aprovechando una d’eses grietes que’l Bloquéu pernomáu, non tan herméticu como dicen, tien tenío siempres. Al mío llau sentóse un xigante d’ébanu que d’entrada daba mieu. Dempués escubrí que yera un cachu pan, de centenu supongo, que llevaba una vida na ciudá de los rascacielos, con esposa y fíos yá nacíos yanquis, pero qu’aportara a aquel requexu aprovechando la ventana de 1980 nel puertu del Mariel.

Aquello entamó cola ocupación de la embaxada del Perú en L’Habana por parte d’unos cientos de cubanos fartucos de Fidel, y l’afirmación, impulsiva y non meditada, del presidente norteamericanu Bill Clinton, en cuantu que diba acoyer a tolos que llegaren, dalgo que’l cuciu Fidel aprovechó pa unviá-y, dende’l puertu de Mariel, a una hora de L’Habana, unos ciento veinte mil cubanos; ente los que metió delincuentes lliberaos de les cárceles pal casu, enfermos psiquiátricos y toa mena de casos particulares; tamién milenta de mozos, lo meyor del país, qu’aprovecharon esa ventana d’oportunidá pa colar de la cárcel na que se camudara Cuba. Ente ellos el mío collaciu d’asientu, que tornaba al país per primer vegada, cargáu de tou tipu de regalos pa la familia, munchos de los cualos sedríen requisaos nel aeropuertu habaneru.

Cola salida d’esa xente, que Brian de Palma retrata maxistralmente en Scarface, con un Al Pacino espectacular y una Michelle Pfeifer perguapa, Fidel pudo cantar llínea, pues desentemangábase d’un montón de dolores de tiesta, pero, a renglón seguíu, cuando les remeses d’esos “gusanos” aniciaron a llegar a la islla, ye posible que glayara ¡Bingo¡ pues esi rublu, el de les remeses esteriores, ye quiciabes el más importante del país dende que los soviéticos, de la mano de Gorbachov, abandonaron la islla bonita.

Si agora mos paramos un momentín a pensar sobro la batalla de guerra híbrida que Marruecos acaba de desendolcar, y gananos, en Ceuta, van ver vustedes múltiples paralelismos, especialmente no de les remeses esteriores, conceuto que la IA me diz que supón el 7.5% del PIB marroquí anguaño, y tamién en cuantu que, ente los recalcitrantes qu’aínda siguen en Ceuta, cabe la posibilidá de qu’haya un númberu importante de los lliberaos de les cárceles marroquís con ocasión de la fiesta del Tronu, tamién que, ente los demás, los mozos contrarios al sistema políticu del país, monarquía constitucional, non parllamentaria, una mayoría fueren futuros xeneradores de problemes, especialmente los rifeños, siempres contrarios al xugu del sultán.

Equí, n’España, casi too s’enfoca dende’l prisma gobiernu/oposición, pero esta invasión, conceutu militar, alloñáu del tradicional problema migratoriu y humanitariu, déxamos nuna posición de precariedá énte los nuesos socios europeos, que ven con preocupación descomanada cómo España se convierte nun panal de rica miel pa la emigración irregular, y puerta falsa, a continuación, pa los sos países. Ye lo qu’hai.

Raúl Suevos

A 20 díes vencíos d’agostu de 2026

Torna en castellán en repdiv.blogspot.com 

Zona Miesta Contraria

 

Tevi la oportunidá de tornar a güeyar una peli española de guerra, Zona Hostil, que me paez de lo meyor que se tien fecho per estos pagos magar el presupuestu estrinxíu col que cuntaba naquel 2017, y supongo qu’en parte gracies al trabayu del asesor técnicu puestu pol MINISDEF, Pepe Allúe, un puntal de les Fuercies aeromóviles del Exércitu.

La historia va d’un helicópteru español que mediu s’escoña n’una evacuación sanitaria, y, como somos probes, en llugar de mete-y una carga esplosiva pa torgar que l’enemigu se lu apropie, móntase una operación d’evacuación del aparatu y de los evacuaos que alló se quedaron, too ello a cargu d’una sección del Terciu, que ye lo que m’interesa nesta divagación.

El teniente al mandu, que ve aportar la nueche y lo crudo qu’aquello se va poner, suélta-yos la so arenga a los sos propios, los lexías, y, como nun podía ser d’otra miente, les pónlos a recitar el Credu lexonariu, quedando-y al direutor una escena cuadrada y posiblemente la de más fuecia de tola peli, na qu’abonden les escenes fuertes. Recomiéndoyosla.

Tornando a l’arenga, diz la RAE que ye un “discursu pronunciáu pa enardecer slos ánimos de los oyentes”, y añado yo que casi siempres rellacionamos el conceutu col mundiu militar, y ehí, nesi mundiu, y na fastera averada a la nuesa españolísima Ceuta, soltó’l xeneral Prim la so pernomada arenga enantes de cargar escontra los moros na batalla de los Castillejos, que tán averaos pero nun son los mesmos vecinos de la nuesa ciudá.

Aquella arenga, y lo que siguió, valió-y a Prim el marquesá del mesmu nome, pero agora tamos notros tiempos y nun va haber un Fortuny que pinte oleos cola avalancha ceutí. Tampocu voluntarios catalanes montando castellets p’asaltar la muralla de Tetuán, la Blanca. Agora tamos nuna guerra híbrida, na qu’hai menos cargues a la bayoneta y sí marches zombis, o paecío, pero puede que más efectives a mediu plazo.

 Nesta guerra híbrida son los ciudadanos ceutíes, tamién los de Melilla, los que formen la nuesa vanguardia, y lo cierto ye que van cola moral baxa, perbaxa, tantu que dalgunos falen de vender y venise a la península. Y nun cuesta muncho comprendelos, pues les vanguardies, pa cumplir bien la so función, necesiten sentise respaldaes pol gruesu del exércitu, que nesti casu somos nós, y necesiten que dalguien los arengue, dalguien como’l Rei, que recibió -nun-y dexaron otra- al presidente ceutí en Marivent.

El Rei parlamentariu necesita’l refrendu del gobiernu, ésti nun-y lu va dar, pero espero que’l viniente tome nota.

Raúl Suevos

A 9 díes vencíos d’agostu de 2026

Torna en castellán en repdiv.blogspot.com