De l'operacional y lo estratéxico

 

Maxino que, nel palaciu de La Moncloa, entá deben tar reallugando muebles y cuadros de les paredes tres el terremotu que provocó esi informe de la policía nacional, malditu informe, qu’esbarató tol rellatu que, penriba de toles evidencies, y cola direición inflexible del presidente del gobiernu, tábase desendolcando dende’l día dempués de la visita del susodichu a la mártir, porque lo qu’ellí asocede ye un martirio, ciudá de Ceuta.

L’informe, ampliu y concenziudu, nun señala nin al rei nin al gobiernu de Marruecos, ente otres coses porque nun ye la so misión, pero, tres dar cuenta detallada d’aiciones y omisiones, indica un designiu “operacional y estratéxicu” nes mesmes; y si tenemos en cuenta lo qu’ellí  asocedió, ye fácil decatase que, no operacional, esto ye, na direición de la operación d’asaltu multitudinariu con fases nidies y definíes, namái podría atopase una capacidá organizativa que correspuende a la Direición Xeneral de Seguridá del gobiernu marroquí. Anque naide lo señale.

Sicasí, la operación, enmarcada nuna guerra híbrida, namái tenía como cometíu reconocer y evaluar les nueses defenses, dalgo que ensin dulda llograron. Tres ello ye probable que pescanciaran que, a lo menos no político, tamos más débiles de lo qu’ellos mesmos, probablemente, pensaben. Y nesa guerra aportamos a lo estratéxico, aludío tamién nel informe, un conceutu qu’abarca más tiempu y espacio que’l de les nueses places de soberanía, y que, algamaos hipotéticamente esos oxetivos, pasaría al oxetivu viniente, que nun sedría otru que les islles Canaries.

Esa estratexia coincide plenamente col conceutu del Gran Marruecos, dalgo que Hasan II tenía perfeutamente definíu y que’l so fiu, Mohamed VI, continúa con la parsimonia d’un derviche, y col mesmo fervor islámicu, que pa eso ye l’Amir al muminín, comendador de los creyentes. Y nós ¿Qué’stratexa?

El nuesu Exércitu tien, siempres los tevo, planes de continxencia pa responder a una aición militar sobro les nueses ciudaes, anque, según lo visto, nun esistíen pa esta mena d’operación híbrida, y tampocu hai elementos pa pensar que’l Conseyu Nacional de Seguridá siquier se lo plantexara -Marruecos ye un vecín amable y cooperativu, gobiernu dixit- pero la tensión a la que tá siendo sometía la población ceutí ye inmerecía, y namái una respuesta acordies cola dimensión de la menacia va poder da-yos una esperanza pal futuru, qu’anguaño perdieron.

La disuasión consiste en facer entender a quien te menacia que ca una de les sos aiciones va tener contestación, y qu’ésta va ser más costosa ca vegada.

Raúl Suevos

A 4 díes vencíos de septiembre de 2026

Torna en castellán en repdiv.blogspot.com 

Los marielitos de Ceuta

 

Alló pel añu 2012, volaba yo dende Nueva York a L’Habana, aprovechando una d’eses grietes que’l Bloquéu pernomáu, non tan herméticu como dicen, tien tenío siempres. Al mío llau sentóse un xigante d’ébanu que d’entrada daba mieu. Dempués escubrí que yera un cachu pan, de centenu supongo, que llevaba una vida na ciudá de los rascacielos, con esposa y fíos yá nacíos yanquis, pero qu’aportara a aquel requexu aprovechando la ventana de 1980 nel puertu del Mariel.

Aquello entamó cola ocupación de la embaxada del Perú en L’Habana por parte d’unos cientos de cubanos fartucos de Fidel, y l’afirmación, impulsiva y non meditada, del presidente norteamericanu Bill Clinton, en cuantu que diba acoyer a tolos que llegaren, dalgo que’l cuciu Fidel aprovechó pa unviá-y, dende’l puertu de Mariel, a una hora de L’Habana, unos ciento veinte mil cubanos; ente los que metió delincuentes lliberaos de les cárceles pal casu, enfermos psiquiátricos y toa mena de casos particulares; tamién milenta de mozos, lo meyor del país, qu’aprovecharon esa ventana d’oportunidá pa colar de la cárcel na que se camudara Cuba. Ente ellos el mío collaciu d’asientu, que tornaba al país per primer vegada, cargáu de tou tipu de regalos pa la familia, munchos de los cualos sedríen requisaos nel aeropuertu habaneru.

Cola salida d’esa xente, que Brian de Palma retrata maxistralmente en Scarface, con un Al Pacino espectacular y una Michelle Pfeifer perguapa, Fidel pudo cantar llínea, pues desentemangábase d’un montón de dolores de tiesta, pero, a renglón seguíu, cuando les remeses d’esos “gusanos” aniciaron a llegar a la islla, ye posible que glayara ¡Bingo¡ pues esi rublu, el de les remeses esteriores, ye quiciabes el más importante del país dende que los soviéticos, de la mano de Gorbachov, abandonaron la islla bonita.

Si agora mos paramos un momentín a pensar sobro la batalla de guerra híbrida que Marruecos acaba de desendolcar, y gananos, en Ceuta, van ver vustedes múltiples paralelismos, especialmente no de les remeses esteriores, conceuto que la IA me diz que supón el 7.5% del PIB marroquí anguaño, y tamién en cuantu que, ente los recalcitrantes qu’aínda siguen en Ceuta, cabe la posibilidá de qu’haya un númberu importante de los lliberaos de les cárceles marroquís con ocasión de la fiesta del Tronu, tamién que, ente los demás, los mozos contrarios al sistema políticu del país, monarquía constitucional, non parllamentaria, una mayoría fueren futuros xeneradores de problemes, especialmente los rifeños, siempres contrarios al xugu del sultán.

Equí, n’España, casi too s’enfoca dende’l prisma gobiernu/oposición, pero esta invasión, conceutu militar, alloñáu del tradicional problema migratoriu y humanitariu, déxamos nuna posición de precariedá énte los nuesos socios europeos, que ven con preocupación descomanada cómo España se convierte nun panal de rica miel pa la emigración irregular, y puerta falsa, a continuación, pa los sos países. Ye lo qu’hai.

Raúl Suevos

A 20 díes vencíos d’agostu de 2026

Torna en castellán en repdiv.blogspot.com 

Les vacaciones de Giorgia

 

Nel 96 aporté a Florencia cola mío familia, por razones profesionales y pa pasar ellí tres años. La inmersión na cultura italiana dióme pa decatame de qu’ellí, tantu na televisión como nes revistes o semanarios, lo qu’equí conocemos como cotilleos, y alló como pettegolezzi, nun tien el mesmu sofitu clientelar qu’ente nós. Ye lo qu’hai.

El diccionariu Treccani, ellí mui respetáu, diz que los pettegolezzi, na so versión escrita, son cháchares o insinuaciones malévoles; sobre daquien conocíu, amiesto yo. Y naquellos años, que recuerde, namái la revista Oggi -Hoy- se dedicaba a esta mena de casquería, y aínda trabaya nello anguaño, persiguiendo a les celebridaes.

Esta selmana tiénse descolgao con un reportaxe sobro la señora presidente de gobiernu, Giorgia Meloni, a la que-y tien espublizao un artículu cola so fia de nueve años, dambes en traxe de baño en Cerdeña, au pasaba unos díes, pagándose too, viaxe incluyíu, del so bolsu, con una escolta mínima, y fotografiándose con munchos amiradores, votantes, miembros del so partíu, o lo que fueren, ensin que conste qu’a dalu d’ellos-y guste la fruta, contrariamente a lo que-y asocede al nuesu xefe de gobiernu. Coses.

Nun paez que les munches opiniones llanzaes en riedes, de toa mena, vayan camudar l’enfoque personal  y políticu de la señora Meloni, pero, induldablemente, y coincidiendo col informe políticu del so ministru del interior, nel que da cuenta de la reducción descomanada del númberu d’inmigrantes llegaos per mar, y l’amontar del 100% del númberu d’expulsiones demientres esti semestre, fae que, colo asocedío en Ceuta y l’aserrallamientu del señor Sánchez n’una luxosa mansión del Patrimoniu nacional, al que lleguen invitaos estreamao, familiares y non, toos ellos “protexíos” por más de doscientos policíes, a unu-y vengan les ganes de facer comparances, que, dicen, son siempres odioses, pero nes que’l nuesu gobiernu nun queda mui bien parao.

Meloni gobierna con un tripartitu, que fae que’l so gobiernu se desenvuelva n’equilibriu inestable, como Sánchez, pero gobierna, y, caltien el so país como un sociu fiable n’Europa, qu’agora, gracies a la regularización masiva de Sánchez, concita’l sofitu de gobiernos europeos de tol espectru políticu, como Dinamarca o Suecia, mientes que nós, lenta pero inexorablemente, paez que vamos camín de convertinos nun solitariu  que puede acabar n’apestáu.

Giorgia paez saber ónde va, y Sánchez tamién, pero diría yo qu’ésti con un perecorríu muncho más curtiu, marcáu poles eleiciones xenerales vinientes.

Raúl Suevos

A 15 díes vencíos d’agostu de 2026

Torna en castellán en repdiv.blogspot.com