De l'operacional y lo estratéxico

 

Maxino que, nel palaciu de La Moncloa, entá deben tar reallugando muebles y cuadros de les paredes tres el terremotu que provocó esi informe de la policía nacional, malditu informe, qu’esbarató tol rellatu que, penriba de toles evidencies, y cola direición inflexible del presidente del gobiernu, tábase desendolcando dende’l día dempués de la visita del susodichu a la mártir, porque lo qu’ellí asocede ye un martirio, ciudá de Ceuta.

L’informe, ampliu y concenziudu, nun señala nin al rei nin al gobiernu de Marruecos, ente otres coses porque nun ye la so misión, pero, tres dar cuenta detallada d’aiciones y omisiones, indica un designiu “operacional y estratéxicu” nes mesmes; y si tenemos en cuenta lo qu’ellí  asocedió, ye fácil decatase que, no operacional, esto ye, na direición de la operación d’asaltu multitudinariu con fases nidies y definíes, namái podría atopase una capacidá organizativa que correspuende a la Direición Xeneral de Seguridá del gobiernu marroquí. Anque naide lo señale.

Sicasí, la operación, enmarcada nuna guerra híbrida, namái tenía como cometíu reconocer y evaluar les nueses defenses, dalgo que ensin dulda llograron. Tres ello ye probable que pescanciaran que, a lo menos no político, tamos más débiles de lo qu’ellos mesmos, probablemente, pensaben. Y nesa guerra aportamos a lo estratéxico, aludío tamién nel informe, un conceutu qu’abarca más tiempu y espacio que’l de les nueses places de soberanía, y que, algamaos hipotéticamente esos oxetivos, pasaría al oxetivu viniente, que nun sedría otru que les islles Canaries.

Esa estratexia coincide plenamente col conceutu del Gran Marruecos, dalgo que Hasan II tenía perfeutamente definíu y que’l so fiu, Mohamed VI, continúa con la parsimonia d’un derviche, y col mesmo fervor islámicu, que pa eso ye l’Amir al muminín, comendador de los creyentes. Y nós ¿Qué’stratexa?

El nuesu Exércitu tien, siempres los tevo, planes de continxencia pa responder a una aición militar sobro les nueses ciudaes, anque, según lo visto, nun esistíen pa esta mena d’operación híbrida, y tampocu hai elementos pa pensar que’l Conseyu Nacional de Seguridá siquier se lo plantexara -Marruecos ye un vecín amable y cooperativu, gobiernu dixit- pero la tensión a la que tá siendo sometía la población ceutí ye inmerecía, y namái una respuesta acordies cola dimensión de la menacia va poder da-yos una esperanza pal futuru, qu’anguaño perdieron.

La disuasión consiste en facer entender a quien te menacia que ca una de les sos aiciones va tener contestación, y qu’ésta va ser más costosa ca vegada.

Raúl Suevos

A 4 díes vencíos de septiembre de 2026

Torna en castellán en repdiv.blogspot.com 

Les vacaciones de Giorgia

 

Nel 96 aporté a Florencia cola mío familia, por razones profesionales y pa pasar ellí tres años. La inmersión na cultura italiana dióme pa decatame de qu’ellí, tantu na televisión como nes revistes o semanarios, lo qu’equí conocemos como cotilleos, y alló como pettegolezzi, nun tien el mesmu sofitu clientelar qu’ente nós. Ye lo qu’hai.

El diccionariu Treccani, ellí mui respetáu, diz que los pettegolezzi, na so versión escrita, son cháchares o insinuaciones malévoles; sobre daquien conocíu, amiesto yo. Y naquellos años, que recuerde, namái la revista Oggi -Hoy- se dedicaba a esta mena de casquería, y aínda trabaya nello anguaño, persiguiendo a les celebridaes.

Esta selmana tiénse descolgao con un reportaxe sobro la señora presidente de gobiernu, Giorgia Meloni, a la que-y tien espublizao un artículu cola so fia de nueve años, dambes en traxe de baño en Cerdeña, au pasaba unos díes, pagándose too, viaxe incluyíu, del so bolsu, con una escolta mínima, y fotografiándose con munchos amiradores, votantes, miembros del so partíu, o lo que fueren, ensin que conste qu’a dalu d’ellos-y guste la fruta, contrariamente a lo que-y asocede al nuesu xefe de gobiernu. Coses.

Nun paez que les munches opiniones llanzaes en riedes, de toa mena, vayan camudar l’enfoque personal  y políticu de la señora Meloni, pero, induldablemente, y coincidiendo col informe políticu del so ministru del interior, nel que da cuenta de la reducción descomanada del númberu d’inmigrantes llegaos per mar, y l’amontar del 100% del númberu d’expulsiones demientres esti semestre, fae que, colo asocedío en Ceuta y l’aserrallamientu del señor Sánchez n’una luxosa mansión del Patrimoniu nacional, al que lleguen invitaos estreamao, familiares y non, toos ellos “protexíos” por más de doscientos policíes, a unu-y vengan les ganes de facer comparances, que, dicen, son siempres odioses, pero nes que’l nuesu gobiernu nun queda mui bien parao.

Meloni gobierna con un tripartitu, que fae que’l so gobiernu se desenvuelva n’equilibriu inestable, como Sánchez, pero gobierna, y, caltien el so país como un sociu fiable n’Europa, qu’agora, gracies a la regularización masiva de Sánchez, concita’l sofitu de gobiernos europeos de tol espectru políticu, como Dinamarca o Suecia, mientes que nós, lenta pero inexorablemente, paez que vamos camín de convertinos nun solitariu  que puede acabar n’apestáu.

Giorgia paez saber ónde va, y Sánchez tamién, pero diría yo qu’ésti con un perecorríu muncho más curtiu, marcáu poles eleiciones xenerales vinientes.

Raúl Suevos

A 15 díes vencíos d’agostu de 2026

Torna en castellán en repdiv.blogspot.com 

De Pantelería a Ceuta, pasando per Nueva York

 

La crisis de Ceuta, resuelta, aparentemente, pol nuesu presidente de gobiernu con una visita rescamplu de 105 minutos a la ciudá, nun dexa de xenerar desasosiegu nos nuesos socios europeos, unos más qu’otros,  pero, na see de los “caballas” el problema nun tien desapaecío y, cuéntenme, amigos d’ellí, que yá hai quien se planteya convertise en desplazáu políticu, un pocu como aquellos 200 mil vascos, de los que casi naide fala, que tuvieron que dexar la so tierra pola presión de los ñuevos gudaris, dicho esto con tonu sarcásticu.

Pantelería ye una islla pequeña, de 84 km cuadraos, Formentera tiene 82 creyo, que s’atopa metanes ente Túnez y Sicilia. Ta a menos de 70 km d’África y a dalgo más de 100 km d’Italia, lo que fae que les mafies de la emigración dende’l Magreb la usen davezu como oxetivu de los sos manexos, en dalgunos casos cola cooperación, nun sé si interesada, de ONG,s, como la española Open Arms, brazos abiertos, que nel pasáu, particularmente al entamu del gobiernu Meloni n’Italia, tuvieronla duro col gobiernu d’aquel país, con una actitú abondo desagradable per parte del nuesu gobiernu, de raigañu políticu nidiamente opuestu al que güei y entoncenes rixe en Roma. Ye lo qu’hai.

La señora Meloni, de calter resueltu no político, non tanto no económico, reaccionó a aquellos problemes cola apertura de centros de detención n’Albania, que foron refugaos en dos vegaes pola xudicatura italiana, ensin que naide falara de Lawfare, y respondíos con sendes modificaciones de la llei. Anguaño ye Europa la qu’acaparana la so política migratoria y adopta’l conceutu de centros de detención de Meloni.

Mentanto, el gobiernu de nueso, ensin consultar nin avisar a naide n’Europa, decreta una regularización exprés d’inmigrantes irregulares que nun paez tener sío recibida con alegranza nel restu d’Europa, pero que, con ayuda del espeyismu del nuesu PIB, el nuesu gobiernu tien tentao vender como dalgo positivu, ayudao ensin dulda pol ésitu de la nuesa selección nacional, vencedora incontestable nel mundial de futbol. Pero too s’acaba.

Les escenes de Ceuta, que recordaben terriblemente a aquella “Guerra mundial Z” protagonizada por Brad Pitt, tienen tornao la nuesa imaxe país al so llugar ñatural, esto ye, un trampantoxu pintáu por un gobiernu ensin idees y que güei namái piensa na supervivencia personal del so presidente, al que dalgunos socios europeos, entamando per Italia, quiciabes cobrándose cuentes pendientes, señalen como apestáu cola sospensión temporal del espaciu Schengen.

Lo de Ceuta, dexa a Pantelería como anécdota, y a nós como güérfanos políticos.

Raúl Suevos

A 1 día vencío d’agostu de 2026

Torna en castellán en repdiv.blogspot.com