Los turistes ucranianos

 

Ye poco menos qu’imposible nun quedar ablucáu énte les imáxes del desastre de Nepal; dicho asina, Nepal, porque ye alló onde más fuerte tien sío l’impautu de la fola xigantesca producía trés l’esbarrumbamientu d’un glaciar kilómetros valle enrriba, yá na ocupada -polos chinos- nación tibetana.

La mecánica del socedíu conocenla mui bien n’Italia. Ellí, una pantanu, maravia de la inxeniería d’entoncenes, cola presa más alta del mundiu, llevaba un par d’años enllenándose, ensin que se ficieran los estudios xeológicos qu’anguaño son obligatorios nes fasteres de lo que dempués sedría embalse. Una nueche, pa desgracia de los habitantes valle abaxo, que dormíen placetiblemente, una gran fastera esmucióse, provocando una fola enorme que saltó penriba del dique, llevándose per delantre la vida de dos mil persones nes aldees que afaró al so pasu. Yera 1963 y conozse como’l Desastre de la presa del Vajont.

Agora, nos Himalayes, paez que’l procesu tien sío’l mesmu, un glaciar que sesbarrumba sobro un llagu y provoca una fola descomanada qu’avanza valle abaxo acabando con tolo qu’atopa al so pasu. Unos cuantos miles de persones con toa seguridá, anque ye probable que’l númberu exactu nunca llegue a sabese.

L’impactu del desastre pa nós, espectadores pasivos nes nueses cases, tien sío más brutal que notres ocasiones nes que la natura s’amuesa agresiva con nós, pues tres tornaos, furacanes, inundaciones, terremotos, o inclusive volcanes, asistimos a los momentos posteriores casi siempres, aforrándomos l’horror que los protagonistas involuntarios padecen direutamente nos sos cuerpos. Nesti casu tien sío diferente.

La zona ta enllena de turistes, y los propios paisanos, enantes atrasaos, anguaño cuenten con teléfonos magníficos que mos ficieron llegar delles grabaciones nes que podemos güeyar les figurines de docenes de persones fuyendo espavoríes del fragor y ruxir que como una menacia imparable s’avera a ellos. Y asina ye; toos, en segundos, son encloyaos por esa fola colosal y tarrecible.

Ente toles noticies a min tienme sosprendío la que da cuenta de la desapaición de 53 turistes ucranianos; supongo que pertenecientes a la parte acomodada de la sociedá, magar la guerra qu’alló se desarrolla, y magar la sangría constante de vides d’homes y muyeres, civiles y militares, que l’orcu rusu lleva a cabu; unes vides, les d’estos turistes, si a la fin se dan por perdíes, que quiciabes desaprovecharon la oportunidá de lluchar pol so país y dexen el mundiu metanes la banalidá d’un viaxe turísticu a nun se sabe mui bien onde. Ye lo qu’hai.

Raúl Suevos

A 26 díes vencíos d’agostu de 2026

Torna en castellán en repdiv.blogspot.com 

Una crónica estremada

 

Cabe apuntar, de entrada, que’l xentíu na mesma yá daba cuenta del casi enllenu que s’esperaba tres l’apoteosis morantiana del día anterior. Una aglomeración a la que contribuyíen, na Grande, los antitaurinos, sofitaos por dalgunes formaciones polítiques, de escarsa o nula representación parllamentaria, que nestes verbenes atopen un mediu d’espresión, llamativamente nuna ciudá conocía por ser, como dicen los pixos, “pets-friendly”, colos perros como dueños y señores de les nueses cais. Ye lo qu’hai.

Venía yo interesáu en comprobar el paxellu del personal, pues na feria de Sevilla, televisada n’abiertu pola so televisión autonómica, decatemé que los señores llucíen abundantes americanes, dalgunos con corbata al cuellu; y les señores elegantísimes, como si dempués tuvieren “un compromisu”, y too ello col cimbréu casi constante d’un enxame d’abanicos multicolores. Y ye que Sevilla tien una color…

Equí l’asuntu va per otros caminos. Poques americanes, casi denguna, y les dames, arreglaes, más pa lueu dir a una sidrería qu’a un “party”, a lo menos nel tendíu de solombra. Arriba nos palcos quiciabes fuera diferente. Too ello, especialmente nos primeros toros, nos que, anque nun había sol, la humedá facia estragos, con un abaniquéu xeneral, si bien la mayoría yeren de propaganda en cartoncillu. Dempués el “churnu” yá mos perdonó un pocu.

De los toreros cabe apuntar que Talavante y Ortega ficieron lo que pudieron, especialmente colos sos segundos, y quiciabes emburriaos pola faena de Roca Rey al so primer, nel que, como un entendíu me tenía apuntado, “salió a por toes” dempués de la que Morante lio’l día anterior. Y ye qu’ellos dos representen güei la punta de lanza d’esi resurdir de la Fiesta Nacional, y alló onde van arrastren tras d’ellos un bon númberu d’aficionaos, y tamién dalgunos snobs. 

Nesi primer de Roca, nel qu’hasta’l terciu de banderilles foi sobresaliente, vióse dende l’entamu, brindando’l toru al públicu, que quería triunfar. Recibiólu a la verónica pero’l bichu andaba distrayíu, yéndose d’un caballu al otru nesa suerte. Dempués vieno’l platu fuerte, con Roca toreando de rodilles, con pases de frente, per detrás y cruzaos -quiciabes demasiaos- poniendo al tendío, por dalgo ye plaza de segunda, pates arriba. Siguió la faena con mas xestualización rodillera y, col toru yá cansadín, arrimándose hasta tocar el morru cola rodiella, temeridá que namora al tendíu pero que yo, que nun soi especialista, nun acabo de ver nidio.

Falló Roca de primer con un pinchazu, pa fulminar al toru nun segundu intentu y provocar un españíu de pañuelos que-y valieron dos oreyes. Mañana, güei, na novillada, va haber menos xente.

Raúl Suevos

A 17 díes vencíos d’agostu de 2026

Torna en castellán en repdiv.blogspot.com 

La lluz de la fin del mundiu

 

Va yá munchos años, participé como extra nuna peli con Yul Brinner de prota, tamién taba Máximo Ranieri, Samantha Edgar, y un Fernando Rey al que nun llegué a ver. La peli yera “la lluz de la fin del mundiu”, basada nuna novela de Xulio Verne con faru nel títulu, y na que quiciabes pola mío fisonomía escurría, y magar revisar delles vegaes el resultáu fílmicu, nunca algamé a veme. Supongo que la mío competencia al llau de los otros extras, casi toos miembros de la colonia hippie qu’entoncenes bullía na exótica Cadaqués, con pinta de guitarrista de Led Zepellin, Cream, o Credence, dexábame en mal llugar estéticu, y el montador fizo’l restu.

Quédame l’alcordanza d’aquel Cabu Creus, col so faru de mentira y lo que paecía la cubierta d’un barcu pirata, y, sobremanera, la caravana increíble del Brinner, que al so interior accedí gracies al mesmu enchufe que me metió d’aprendiz d’estrella cinematográfica. Qué recuerdos.

Ayeri, nel Muru, viénome aquello a la memoria pues cuando entramos ellí, veinte minutos enantes del momentu cume, yá la lluz yera morridosa, y, a lo menos eso me paeció, el personal, numberosu, nun paecía decatase de la fina faza de lluz que definía l’horizonte marítimu. Llamativo.

Aquella fina llínea de lluz, a midida que l’anochar eclípticu aportaba, primer selemente y lluéu casi de sópito, tamién diba ganando en fuercia, rellume y amplitú, pa camudase a la fin nun curiosu cinturón de lluz horizontal al que, como si fuera un recursu d’un tramoyista invisible, les lluces de les llanchas na zona de la bahía, unos pescando potarros y otros, supongo, como los paseyantes del Muru, intentando presenciar l’espectáculu que la bruma llitoral mos furtiara, daben un toque de verbena braniega inesperáu. Qué coses.

Inorante de la física d’esos fenómenos ñaturales que l’AEMET domina, maxino qu’aquella lluz del horizonte yera la ñatural del atapecer, pues alló, nun sé a cuantos kilómetros, l’eclipse nun debía de tener efeutu, mientes que nel nuesu Arenal de San Lorenzo, la escuridá súbita, realzada pola ausencia de les lluces del paséu, convertía aquella franxa lluminosa en dalgo casi fantasmagóricu, trayéndome’l recuerdu d’aquella peli, que por otra parte, y non culpa mía, nun tevo gran ésitu, magar tener de prota al gloriosu calvu.

La nueche repentina foi recibida por unos aplausos tímidos, non munchos, y el regresu de la lluz nin eso. Supongo que, anque les brumes llitorales tán equí siempres presentes, con tanta anuncia nos díes anteriores, la xente ficierase ilusiones. Ye lo qu’hai.    

Raúl Suevos

A 13 díes vencios d’agostu de 2026

Torna en castellán en repdiv.blogspot.com