Los turistes ucranianos

 

Ye poco menos qu’imposible nun quedar ablucáu énte les imáxes del desastre de Nepal; dicho asina, Nepal, porque ye alló onde más fuerte tien sío l’impautu de la fola xigantesca producía trés l’esbarrumbamientu d’un glaciar kilómetros valle enrriba, yá na ocupada -polos chinos- nación tibetana.

La mecánica del socedíu conocenla mui bien n’Italia. Ellí, una pantanu, maravia de la inxeniería d’entoncenes, cola presa más alta del mundiu, llevaba un par d’años enllenándose, ensin que se ficieran los estudios xeológicos qu’anguaño son obligatorios nes fasteres de lo que dempués sedría embalse. Una nueche, pa desgracia de los habitantes valle abaxo, que dormíen placetiblemente, una gran fastera esmucióse, provocando una fola enorme que saltó penriba del dique, llevándose per delantre la vida de dos mil persones nes aldees que afaró al so pasu. Yera 1963 y conozse como’l Desastre de la presa del Vajont.

Agora, nos Himalayes, paez que’l procesu tien sío’l mesmu, un glaciar que sesbarrumba sobro un llagu y provoca una fola descomanada qu’avanza valle abaxo acabando con tolo qu’atopa al so pasu. Unos cuantos miles de persones con toa seguridá, anque ye probable que’l númberu exactu nunca llegue a sabese.

L’impactu del desastre pa nós, espectadores pasivos nes nueses cases, tien sío más brutal que notres ocasiones nes que la natura s’amuesa agresiva con nós, pues tres tornaos, furacanes, inundaciones, terremotos, o inclusive volcanes, asistimos a los momentos posteriores casi siempres, aforrándomos l’horror que los protagonistas involuntarios padecen direutamente nos sos cuerpos. Nesti casu tien sío diferente.

La zona ta enllena de turistes, y los propios paisanos, enantes atrasaos, anguaño cuenten con teléfonos magníficos que mos ficieron llegar delles grabaciones nes que podemos güeyar les figurines de docenes de persones fuyendo espavoríes del fragor y ruxir que como una menacia imparable s’avera a ellos. Y asina ye; toos, en segundos, son encloyaos por esa fola colosal y tarrecible.

Ente toles noticies a min tienme sosprendío la que da cuenta de la desapaición de 53 turistes ucranianos; supongo que pertenecientes a la parte acomodada de la sociedá, magar la guerra qu’alló se desarrolla, y magar la sangría constante de vides d’homes y muyeres, civiles y militares, que l’orcu rusu lleva a cabu; unes vides, les d’estos turistes, si a la fin se dan por perdíes, que quiciabes desaprovecharon la oportunidá de lluchar pol so país y dexen el mundiu metanes la banalidá d’un viaxe turísticu a nun se sabe mui bien onde. Ye lo qu’hai.

Raúl Suevos

A 26 díes vencíos d’agostu de 2026

Torna en castellán en repdiv.blogspot.com 

Pensamientu grupal nel Kremlin

 

Los sociólogos dan definiciones más o menos ellaboraes pa esi conceutu, el del pensamientu grupal, pero la forma más visual de entendelo ye, quiciabes, la película La Cayía, de 2005, que dalgunos tornen tamién como El fundimientu, na que se retraten los diez díes caberos de Hitler nel so bunker de Berlín, y na que se güeya cómo’l grupu qu’arrodia a un líder, al qu’aportaos a esi puntu se teme como al diañu, anque al entamu fuera idolatráu, nun son a enmenda-y la plana en dala de les decisiones que toma, y, aínda más, nin tan siquier s’atreven a presenta-y la realidá que les informaciones llegaes al centru de poder tán describiendo.

Esi pensamientu grupal suel dase nela rodiada de líderes estraordinariamente fuertes, y a casi toos vustedes vendrá-yos a la tiesta el actual gobiernu yanqui dirixíu per esi ogru naranxáu qu’a toos mos lleva de cabeza. Nela nuesa redolada cabría entrugase hasta qué puntu nel palaciu de la Moncloa nun impera tamién esi pensamientu grupal, pero, sicasí, ye’l señor Putin el que me lleva a meteme nese güertu.

Ellí, nel Kremlin, desendolcase una película que quiciabes namái se xustifique dende esi tipu de pensamientu grupal nel que naide del Estáu mayor s’atreve a dicii-y al xeneral que l’enemigu avanza en tolos frentes, y que les fuercies propies tán casi esgotaes, que la industria y, en xeneral, la economía del país, tán cayendo en picao, y que yá nin siquier les manipulaes encuestes sociolóxiques son a esconder el descensu agudu del apreciu de la ciudadanía pol líder inconmensurable. Ye lo qu’hai.

Los ucranianos nun namái detuvieron la invasión, tienen reinventao’l campu de batalla convencional, qu’agora, en tol mundu, namái necesitamos güeyar pal Llibanu, Iran, o’l Sahel yihadista, desarrollase colos parámetros de la guerra de drones, qu’ellos, los homes y muyeres de Zelensky, tienen llevao a cotes inimaxinables va nmái dellos meses. Y Vladimir paez l’únicu en nun querer enterase.

Dicen que’l sátrapa del Kremlin ta la gueta de chocar con dalgún de los países bálticos, provocando con ello a la OTAN, pa d’esa forma tener xustificación pa una movilización xeneral, el so recursu caberu, anque non una solución, pues, sí o sí, nel fondu él sabe que, al mou moscovita, si dexa’l palaciu del poder, como otros, namaí-y quedaría la cayía dede una ventana alta.

El pensamientu grupal ye lo que tien, que nun tien salida bona, nin en Moscú nin en dala parte.

Raúl Suevos

A 11 días vencíos de xunetu de 2026

Torna en castellán en repdiv.blogspot.com 

L'Afrika Korps ñuevu

 

De xemes en cuando lléguenmos noticies d’esi asonsañu modernu de lo que fo’l mandu del Mariscal Rommel nel norte d’Africa. Aquelles unidaes, nes que tamién esplegaben fuercies italianes que se comportaron, en contra de lo amosao pela cinematografía yanqui, heroicamente, dexaron escrites páxines almirables nel arte de la guerra, especialmente cuando la falta de suministros alemana al traviés del Mediterráneu, y la llegada masiva del llau aliáu per Suez, obligó al mariscal a replegase ordenadamente sobro los avances algamaos con anterioridá.

Los rusos de Putin, que saben muncho de guerra híbrida y dominiu cognitivu, aprovecharon el tirón del nome d’aquella fuercia y crearon, va yá dellos años, y sofitándose en compañíes de mercenarios, lo que se conoz como Russian Afrika Korps; seduciendo a les xuntes militares que gobiernen los países del Sahel y llogrando que la misión MINUSMA, de la ONU, y la EUTM Mali, europea, apadrinaes per Francia y nes qu’España participaba, tuvieran que retirase nel 2023.  

La consecuencia d’aquella retirada fo la ocupación de les ciudaes del norte de Mali, Kidal, Tombuctú y Gao, peles fuercies de la xunta militar maliense col sofitu de los mercenarios rusos de Wagner, anque siempres en mou asediu peles fuercies combinaes de los tuaregs del Frente del Azawad y de los yihadistes del JNIM. Un asediu que tien dío refuerciándose na mesma midía que’l sofitu rusu, qu’abondo tien colo de so n’Ucrania, tien dío debilitándose, como amuesen los guelpes sucesivos recibíos poles sos fuercies a manes de los tuaregs nel pasáu recien.

El guelpe penúltimu tien llegao cola toma de Kidal peles fuercies combinaes independentistes y yihadistes, con salida a escape de los rusos, que dexaron solos y abandonaos a los soldaos malienses de la Xunta. Y atques a otres ciudaes onde, al paecer, morriera'l ministru de defensa del país. Una retirada, la d’estos rusos, de difícil igualadura a aquella de Rommel. Ye lo qu’hai.

Queden agora, nel territoriu que los independentistes nomen Azawad y la zeografía política Norte de Mali, les otres dos ciudaes históriques, Gao, la capital del territoriu, y Tombuctú, la de los misterios y protagonista d’histories novelesques, dambes baxo presión dende’l mesmu momentu da la salida de MINUSMA y, posiblemente, a puntu de ser abandonaes,  o rendíes, peles fuercies gubernamentales, lo que va abrir un melón políticu de consecuencies descomanaes en tol Sahel, y tamién pa la imaxe rusa que güei representa Vladimir Putín, yá de por sí dañada a tolos niveles.

L’Afrika Korps yera otra cosa, yera más seria.

Raúl Suevos

A 27 díes vencíos d’abril de 2026

Torna en castellán en repdiv.blogspot.com

Ataque a Irán, la hora d'Ucrania

 

Entramos na segunda selmana del ataque a la república islámica d’Irán y con ello frentes y aiciones ñuevos paecen abrise nel paisax bélicu que tenemos per delantre, y ello, más alló de los sobresaltos que’l mandatariu yanqui ye a xenerar ca vegada que da una rueda de prensa o fala con dalgún periodista.

Nel aspeutu esclusivamente técnicu del combate aéreu, tres la primer folada afaradora, con supresión de los líderes principales del país, tamos asistiendo al bombardeu sistemáticu de los arsenales misilísticos iraníes, y de les sos plataformes llanzadores, dalgo que se mide nel descensu del númberu de vectores que lleguen a Israel, y que taría llevando a los ayatolás al usu de silos llanzadores, muncho más protexíos y alimentaos dende arsenales en bunker fonderos, una reacción que, probablemente, va llevar a los yanquis al usu de la táctica que yá emplegaron en las montañas de Tora Bora contra Al-Qaida, y que agora, amás, contaría cola tarrecible GBU-43/B, la MOAB, conocía como la madre de toles bombes.

Pero Irán nun se queda quietu. Ellos son los padres de los Sahed, los drones que tantu dañu tienen causao n’Ucrania y que los rusos meyoraron. Son baratos, mui baratos en comparación colos Patriot que los balten, y yá tán faciendo estragos nos países del Golfu; inclusive n’Azerbaiyán, pa sorpresa de munchos, pues trátase d’un país chiita y la zona fronteriza, pegada a Armenia, tien lloríes separatistes.

Ye una fase ñueva, flexible y con sorpreses, con sofitu de Rusia con drones y China con componentes pa Irán, y con Ucrania unviando asesores a los países del Golfu y, posiblemente, interceptores de drones d’última xeneración, de los que se tienen convertío en númberu unu mundial, tantu en diseñu como en fabricación nes sos fabriques soterránees. Un capital industrial y bélicu qu’agora, col frente del Golfu recién abiertu, puede da-y una capacidá de palanca sobro Washington nun momentu nel que n’Ucrania paez achisbase una posibilidá de cambéu de los equilibrios tres cuatro años de guerra, y ye que Rusia, económicamente, ta nun puntu que podría facer peligrar toa la so estratexa, más alló del so fracasu militar rescamplante.   

Esos drones ucranianos y el so “saber facer” pueden ser la moneda de cambéu que renueve’l fluxu de suministros militares a los homes y muyeres de Zelensky , que tantu lo necesiten y que, por razones que namái él sabe, Donald Trump  vieno retayando dende l’entamu de la so segunda presidencia. Son les sorpreses de les guerres, aniciaes por políticos que, munches vegaes, nun saben cómo poner fin, y acaben dando llugar a situaciones impensaes, desagradables pa unos y benignes pa otros.

Raúl Suevos

A 6 díes vencíos de marzu de 2026

Torna en castellán en repdiv.blogspot.com

El runfíu de la muerte na Olimpiada

 

Nun son los Xuegos d’hibiernu un eventu que se siga mayoritariamente n’España, o eso creo. Lo de nueso, dende siempres, ye’l futbol, con munchos practicantes y munchos más siguidores dende grades y pantalles. Los deportes d’hibiernu, nes sos modalidades estremaes, y magar selmanes blanques escolares y semeyantes, nun xeneren, nin de lloñe, les mesmes adhesiones, nin a nivel d’atletes nin tampocu de siguidores. Nun sé si nello tien muncho que ver, supongo que sí, que la nieve se reduz a zones y llugares nes que la población arralez de forma notoria ya imparable. Ye lo qu’hai.

Nes tresmisiones d’esta Olimpiada, nos Alpes italianos y en llugares paradisiacos, como nes anteriores, asistimos a diversos avanzos téunicos, y un de los más notorios, ensin dulda, ye la imaxe que mos aporten los drones, capaces de siguir al esquiador dende bien averao y a la mesma velocidá qu’él avanza fastera abaxo, dándonos asina una sensación de participación como enantes nunca se güeyara, lo cualo, a lo menos dende’l puntu de vista del espectador, ye d’agradecer y valorar.

Esi efeuto, el de los drones, nun ye más, a lo fondero, qu’un resultáu de los avanzos téunicos de la dómina, que facen que falgo que nun va muncho paecía una innovación perteneciente casi al mundu de la ciencia ficción, agora atoparemoslu en aspeutos múltiples de la vida cotidiana, y con espectatives crecientes en cuantu al so desarrollu y amplitú, en cantidá y tamién en calidá.

Neses imaxes del descensu perveloz de los esquiadores hai un detalle que ye posible qu’a munchos telespectadores se-yos tenga pasao inalvertío, ye’l runfíu del dron. Un ruiu, como’l d’un mosquitu xigante, qu’acompaña la imaxe, y que, nos campos de batalla ucranianos, au esos aparatos, los drones, desendolquense yá por millones, tiénense convertío, especialmente pal soldáu d’infantería, nel mensaxeru de la muerte. Una muerte mui difícil, casi imposible, d’esquivar, como mos amuesen esos vídeos abondosos que lleguen dend’ellí. Una muerte que cuenta con un heraldu en forma de runfíu, el mesmu qu’oyemos nel nuesu sillón mientes reviciamos de les imaxes olímpiques.

Nun hai dala diferencia nel soníu, y posiblemente, inclusive, los mesmos drones usaos nos Alpes italianos seyan tamién emplegaos nel frente ucranianu, pues tamos falando de lo que se conoz como tecnoloxíes de doble usu, esto ye, civil y militar. Asina que cuando escuchen el runfíu, anque namái seya por un momentu, piensen nel sufríu, y en muchos casos heroicu, soldáu d’infantería.

Raúl Suevos

A 15 díes vencíos de febreru de 2026

Torna en castellán en repdiv.blogspot.com