Ayeri l’ogru naranxáu de Washington tornó a damos una de les de so. Va un mes anunció midíes mui dures escontra los productos petrolíferos rusos, dalgo que, en conxunción colos ataques ucranianos a les refineríes, podría obligar al dictador del Kremlin a parase a pensar sobro la conveniencia de parar la guerra. Pero ayeri, Trump, coló pal otru llau de lo anunciao.
Ayeri decidió Trump que-y convenía mercar Diesel a los rusos, p’asina baxar el preciu d’esti combustible, que’l so preciu -peraltu pa lo averao nos EE.XX- fae que les previsiones nes eleiciones de metanes llexislatura, que van tener llugar el 3 de pallares viniente, seyan mui sombrizes pa los sos candidatos. Eso ye lo único que-y interesa. Los muertos ucranianos, de categoría inferior a los de Gaza pa los medios de comunicación, nun cuenten nesta ecuación, que supera la concepción realista de les rellaciones internacionales.
Nesta teoría, les rellaciones ente estaos rixense pola supervivencia y tamién la supremacía del propiu estáu, penriba de consideraciones morales y lleis o normes del drechu internacional. Y Trump va muncho más alló; a él namái-y interesa la so prevalencia personal, y llévalo amosando a lo llargo de toa una vida. Nun son los EE.XX, nun s’enquivoquen, ye él, el so interés personal, y el de la so familia, que, dambos, tán faciendose d’oru aprovechando la so presidencia.
Esti movimiento caberu ¿caberu? Vien impuestu poles males previsiones en casa, que, en casu de perder la mayoría nel Congresu, mas que probable, y nel Senáu, tamién posible, dexaríenlu mui maniatáu pa llevar a cabu les sos polítiques, por llamales d’algún mou. Y el tiempu corre inexorable, como equí, en casa.
En Bruseles la reacción tien sío inmediata, prometiendo continuar nel sofitu a Ucrania, pero, personalmente, nun tengo nidio que se tengan enterao de que tamos énte “un cambéu de dómina, non una dómina de cambeos” -díxolo’l Papa Lleón, non yo. Y tampocu de que les tres claves de la tapa dorada d’Europa: Enerxía barata de Rusia, mercáu cautivu en China, y seguridá a coste cero del patrón yanqui, acabáronse, les tres a un tiempu, y dala d’elles con posibilidaes de tornar atrás. Ye lo qu’hai.
Güei Trump torna a danos una guantada, ensin avisar, como toles anteriores, y nel futuru próximu vienen eleiciones en munchos países, entamando pel nuesu, con partíos estremaos que, xustificándose nel “apaciguamiento”, o simplemente nesa doctrina realista, promueven l’abandonu d’Ucrania, que sedría el de toa Europa. Nun se fíen.
Nun hai dengún camín fácil pa avanzar metanes esta tormenta, y l’únicu paraguas que podría funcionar ye l’européu. Más Europa. Estaos Xuníos Federales d’Europa.
Raúl Suevos
A 11 díes vencíos d’ochobre de 2026
Torna en castellán en repdiv.blogspot.com
No comments:
Post a Comment