Asolape serondiegu

 

Con esto del cambéu climáticu, el refraneru, y el repositoriu de dichos sobro’l tiempu, vásenos quedando desvalíu énte las situaciones nueves ya imprevistes que la meteoroloxía mos aporta. Y ello por más que los téunicos mos vayan obligando a asumir denominaciones nueves, como esa Dana qu’enantes conocíemos como Gota fría, y que, tres lo de Valencia, vános quedar grabao pa a lo menos una xeneración.

L’aportación cabera, que yo sepa, tien sío esi Huracán mediterráneu, col que medio aterrorizaron a los habitantes de la zona costera de Tarragona y Castellón la selmana pasada, mientes equí, nes Asturies, siguíemos en clave braniega, ensin importanos que, supuestamente, el branín de San Miguel, tuviera cumpliendo col calendariu. Yá nun sirve, el tiempu va a la so bola, y, supongo, el branín de San Martín, el de payares, tampocu va tener un res especial que señalar. Vamos ver.

Güei’l personal, pocu, va espavoríu peles cais de Xixón. Nun se ve un taxi cola so lucecina verde, toos tán ocupaos; y ye que ta cayendo lo que nun ta nos escritos, y asina va siguir tol día, según el pronósticu, lo que mos da llugar, nes tertulies pal discutiniu sobro si a esi chaparrón impetuosu correspuende-y el nome de “bastiazu” o “tambascada”, problemática tan fondera como la que se puede producir sobre si esta sidra tien más “espalme” qu’aquella otra.

Ayeri, sicasí, el Muru llucía esplendidu, con bona temperatura, un sol qu’acariciaba, y munchos pasiantes, tamién dellos corredores, reviciando’l regalu de la naturaleza, casi como si intuyeran, o tuvieran al tantu, lo que güei s’averaba. Y ellí abaxo, nel arenal, el colectivu canín, en númberu lóxicamente inferior al que se ve los fines de selmana, esfrutando del so recién recuperáu territoriu playeru, compartiéndolu con unos pocos bañistes quel so númberu amontaba na Escalerona, onde dalgunos entraben al augua mientes otros yá taben na fase de secao. Tamién unos pocos surfistes reviciaben d’unes foles pequeñes, regulares y previsibles, ideales, creyo, pa los qu’empecipien na actividá. Nada abarruntaba un asolape serondiegu tan de sópitu.

El casu ye que, con too y con eso, los d’equí tamos avezaos a estes variaciones meteorolóxiques, ye lo que tien el Cantábricu, y sabemos que l’asuntu da namái pa veinticuatro hores, o pocu más, non como’l tema de fondu, el que mos va abrasar esta serenda con una campaña eleutoral, que yá enantes d’entamar, danos elementos pa pensar que, una vegada más, los nuesos políticos van batir marques anteriores tocantes la baxeza de los sos comentarios y, lo que ye peor, les sos acciones, como esi penúltimu coneyu que’l doctor Sánchez tien sacao na Diputación permanente pa vendenos una preocupación pola vivienda que n’ocho años nun tenemos visto. Ye lo qu’hai.

Raúl Suevos

A 7 díes vencíos d’ochobre de 2026

Torna en castellán en repdiv.blogspot.com