La xente nun suel dedica-y tiempu
a conceutos o idees que nun tán al algame de lo que representa’l so día a día.
Muncho menos cuando entramos nel dominiu de la guerra; dalgo que, nel casu
español, mos retrotraye a la nuesa guerra incivil, siempres a disposición de
los nuesos políticos como arma de polarización, si bien cuando la traten nun lo
faen nel so aspectu convencional sinon na so rama política, muncho más fácil de
manipular, por definición.
En tiempos recien viémonos asaltaos
por tres guerres esternes nos informativos, la d’Ucrania, lo de Gaza, y lo d’Ormuz.
Toes elles, coles sos caracterisques podríen encuadrase, con matices, nes consideraes,
con independencia de la evolución de los medios de combate, como convencionales.
Pero a la fin de xunetu, esta vegada en casa, enfrentamonoss con un conceutu ñuevu,
la guerra híbrida, que nun gueta la confrontación direuta de calter militar
sinon l’esbaratar les estructures sociales, polítiques y económiques del alversariu
pente medies l’usu de toa mena de medios, con especial dedicación a aquellos
que torguen o enzaquen l’alxudicación de responsabilidá al executor d’eses aiciones.
En Ceuta sofrimos, tamos sofriendo,
un esponente nidio d’esi tipu de guerra, cola emigración, y el so aspeutu
humanitariu, como vector de combate, y con una fin que, desgraciadamente, aínda
ta por definir. Pero, tres aquello, el conceutu nun mos tien abandonao, y agora,
n’Europa, tamos en plenu fragor d’una batalla hibrida qu’algama oxetivos impensaos,
como los frigoríferos de delles caenes d’alimentación, o la rotura de cables somarinos
pente medies l’arrastre d’ancles a cargu de navíos desconocíos, y, pa medrana
de ciudadanos y gobiernos, les menacies de bomba que los nuesos protocolos mos
obliguen a tomar en serio y actuar en consecuencia, coles pérdigues de tiempu y
recursos qu’eso representa. Guerra hibrida.
Y el casu ye que tenemos armes pa
retrucar. Nela fastera cibernética, n’España, ya creamos en 2013 el Mandu de Ciberdefensa,
con calter defensivu; que nel 2020 creció pa convertise nel Mandu conxuntu del
Ciberespaciu, con calter preventivu, defensivu, y tamién ofensivu. Esto ye, qu’España,
y doy, sicasí, qu’Europa y los nuesos socios tamién, cuenta con medios pa retrucar
a esos ataques, que la so autoría ye bien conocía pero que naide, nin equí nin
en Bruseles, s’atreve a nomar. Y una vegada más, vamos comprobar que la
disuasión, como política, nun sirve de nada sinon s’acompaña d’una rempuesta
acordies col ataque recibío.
Rusia ye intratable, el so nivel
d’inhumanidá amuésanoslo tolos díes n’Ucrania, y si Europa nun retruca va siguir
amontando el nivel de los sos ataques. Ye lo qu’hai.
Raúl Suevos
A 7 díes vencíos de pallares
de 2026
No comments:
Post a Comment