Supongo yo que, visto lo qu’asocede
nel mundiu dende que Donald Trump se tien puesto a facer méritos pal Nóbel de
la Paz, el Paradisu neste casu debiera ser la cayida de los rexímenes au la tremenda
tecnoloxía bélica yanqui intervien, y l’apaición subsiguiente d’un sistema
democráticu. Anque cuesta muncho aportar a tala conclusión y, amás, paez un exerciciu
mental absolutamente baldíu.
El sieglu XX, anque pa esti tema
entame en 1898, tien sío una constante de intervenciones yanquis per tol mundiu
y, en xeneral, ellí onde punxeron perres, y les botes de los marines, la cosa tien
medio furrulao. Cuba y Filipines foron los ensayos primeros, anque a gran
escala vímoslo col plan grandiosu del xeneral Marshall pa Europa, y el regueru
de Bases militares que semaron nel continente, o’l casu xaponés, a cargu del
Fénix americanu, Douglas MacArthur, qu’aínda caltien una base descomanada n’Okinawa.
En tiempos más modernos tenemos l’asuntu bosniacu, solucionao militarmente colos
bombardeos de la OTAN, pero un casu fallíu como sistema políticu. O’l Kosovo, onde,
anque caltienen Camp Bondsteel, tampocu paez que la situación meyore.
Iraq y Afganistán, más recien, foron
exemplu paradigmáticu de lo pocu que val l’ésitu militar, y güei aquello ye un
quilombo sangrín al que s’amesta una Siria dirixía por un vieyu miembro del
ISIS y na que los yanquis acaben d’abandonar los sos vieyos aliaos kurdos. En
Gaza, tres dexar les manes llibres a Netanyahu, asistimos agora a una parodia
inmobiliaria que naide ye a maxinar cómo puede acabar.
El casu venezuelanu, pagao en
sangre por unes docenes d’asesores cubanos, danos cuenta de la doctrina ñueva.
Nada de botes, namái presión sobro’l gobiernu heriede, al que se-y dexa facer
siempres y cuando controle’l petróleu, que yá nun cola pa China. ¿Va ser esa la
cuita que verdaderamente importa?
Agora, n’Irán, descabezada pente
medies bombardexos quirúrxicos dirixíos pola IA de Anthropic, magar la rotura
de contratu, preténdese lo mesmo, escaeciendo que ye un réxime teocráticu camudao
en dictadura asesina, que convierte la posibilidá de levantamientu popular, tres
les recientes decenes de miles d’asesinaos, nuna quimera completa. ¿Quiciabes
un tratu ñuevu? ¿Nada d’enriquecimientu d’uraniu nin de petróleu pa China?
Güei les bolses cayen con estruedu,
fulminaes polos valires aéreos, a los que nun compensen los de la IA y los de
Defensa. Los milenta turistes bloquexaos nos aeropuertos van dir saliendo, y nos
Estaos Mayores entruguense pa cuantos díes lleguen los arsenales de los
ayatolás, y los de Trump. Ye lo qu’hai.
Raúl Suevos
A 2 díes vencíos de
marzu de 2026
No comments:
Post a Comment