L'estáu suicídase en Ceuta

 

Somos un estáu de drechu, y eso ta mui bien, pero tien les sos pegues. Lo primer amuesalo la sentencia del Supremu, na que nun entro, pero doi por fundamentada; según la cuala si un emigrante entra a nado nun puede ser espulsáu en caliente; de lo segundo tenemos imaxe vívida nos 60.000 entraos en dos díes na ciudá de Ceuta ¿Y agora qué?

Agora tamos en dalgo que recuerda espantiblemente a la Marcha Verde, anque a ésta quiciabes la nomen nel futuru como Marcha Moyada, si bien aquella fue programada por Hassan II y ésta nun tien mui nidio, aínda, quién dio fueu a la mecha que produxo esti españiu, dexando a les Redes como carburante de la mesma.

Sicasí, agora, el problema principal, más alló d’amosar, una vegada más, la inoperancia del nuesu gobiernu, atopamonos con un doble problema loxísticu; doble porque la única forma de sacar a esa masa de la ciudá paez la salida voluntaria, dalgo difícil de imaginar pel momentu y que, a min, ocurreseme que necesitaría de dalgún tipu de sacaliñu o incentivu. Vamos ver.

La ciudá tien la so loxística propia pa la so población, amontada nun día nun 50%, y güei ta bloquexada, coles families llocales aserrallaes nes sos cases y en dalgún casu con xente intentando entrar nelles, pero que, más pronto que tarde, van tener que salir a facer una compra nunes tiendes que güei tienen también les sos puertes piesllaes. Problema.

Los 60 mil tamién comen, y descomen, y, a midida que les sos necesidaes biolóxiques crezan, metanes una fola de calor descomanada, por ciertu, ye posible que los ánimos se vayan caldexando, de mou y manera que, como primer pasu, sedría conveniente unviar ellí un Piolín cargáu d’antidisturbios, como aquel de Barcelona, que sofite a les Fuercies de Seguridá na ciudá, y caltenga a raya a los asaltantes del inesistente Muru d’Adriano, demientres eses hores o díes que, faltos de sustentu, los anime a tornar voluntariamente al so país. Nun hai otra solución a curtiu.

Mentanto, equí, namái podemos dedicanos a achisbar cómo’l nuesu gobiernu se va dedicar estos díes a echar balones fuera y culpar a terceros, quiciabes la confabulación xudeu-masónica, o a tomar midíes que nin siquier tienen yá un valir estéticu, como l’espliegue d’un Exércitu que nin tien medios nin competencies pa lidiar nestos asuntos.

Y menos mal que’l nuesu presidente de gobiernu normalizó les rellaciones col nuesu vecín, tres abandonar a los saharauis va un par d’años ensin dar nin a ellos nin a nós media esplicadura. Ye lo qu’hai.

Raúl Suevos

A 31 díes vencíos de xunetu de 2026

Torna en castellán en repdiv.blogspot.com 

Tres vegaes ñegó...como San Pedro

 

Les míes conocencies bíbliques nun me dan pa saber cómo taba l’ambiente políticu y social de Xerusalem va venti sieglos, anque, por lo que mos cuenten los Evanxelios, paez que la cosa taba abondo solmenada. Supongo que tan ferviente como la Xerusalem d’anguaño, au Netanyahu s’esfuercia, según sople’l vientu, por ocupar la mayoría de los papeles que les Sagraes Escritures mos describen, dende’l de Mesíes, hasta’l de Ponciu Pilatu, ensin escaecerr a Caifás pel camín; hasta tien la so banda de zelotes, anque los d’agora nada quieren saber de serviciu militar, más alló de monta-y la bronca nes cais al probe Bibi.

A Xesús, un dolor de tiesta político pal poder entoncenes establecíu, había qu’eliminalu, y con él a los sos collacios, anque, a la hora de la verdá, como los del plan d’estudios vieyu sabemos, el so lugarteniente, sobro’l que diba fundar la so ilesia, nególu hasta tres vegaes na nueche tráxica, como Él predixera. Y a mín, quiciabes pola homonimia ente dambos, -creo que nun hai denguna más- Pedro, viénome la historia a la tiesta cuando ayeri oyí negar, tamién tres vegaes, enfáticamente amás, al nuesu presidente, qu’él tuviera conocencia alguna sobro’l trasiegu de morgazu políticu que les pesquises de la UCO tienen puesto n’evidencia, tocantes los sos allegaos y la tantes vegaes negada fontanera de nome Leire.

Los sumarios, dalgunos con partes secretes, vannos dir allumando, espero, sobro la verdá escondida nes negaciones del nuesu Pedro. L’otru, San Pedro, arrepintióse casi d’arréu, y llogró’l perdón del Mesíes. El d’equí, de notoria alloñanza de los asuntos de la Ilesia, paez guetar otra vía, y quiciabes poro, tiénse entainao a enllenar la so axenda con apaiciones demientres la visita del Papa; quiciabes pensando que’l personal pueda llegar asina, si non a perdonalu, a lo menos a escaecer la situación de podrén a la que la so direición ta llevando al so partíu políticu, el de los cien años de honradeza, y tamién al enteru país, que la so ciudadanía, dáme na ñariz, yá que nun puedo facer encuestes, anda cola moral abondo baxa, aspeutu que deduzo de les cifres de gastu que, nel casu de les families, tán cayendo muncho más de lo que la feliz coyuntura descrita pol nuesu Pedro davezu pudiera abarruntar.

A mín, qué quieren que-yos diga, alérxicu a los xestos de los políticos, pídeme’l cuerpu fiame de los axentes de la UCO, verdaderos apóstoles de la verdá de les pesquises, de les escuches, de los siguimientos, de los análisis documentales y, amás, inalgamaizos al desaliendu. Ye lo qu’hai.

Raúl Suevos

A 6 díes vencíos de xunu de 2026

Torna en castellán en repdiv.blogspot.com 

Méritu versus heriedu

 

Va yá abondo d’años, otra vida, cuando exercía d’estudiante, tevi la fortuna de dir a dar con un llibru de los que marquen una dómina. Estratificación social y desigualdad, de Harold Kerbo, nel que l’autor, al traviés de dellos artículos con diferentes protagonistes, muyeres, negros, minoríes etc, y sociedaes, Xapón, Alemaña, los Estados Xuníos, averanos a la realidá de les sociedaes modernes, preferentemente les occidentales, con una constante nes sos apreciaciones, la importancia del Méritu, como’l sistema que promueve’l progresu de les persones a partir de la capacidá personal y profesional  del individuu; en contraposición al Heriedu, que promueve l’ésitu personal dende la posición de salida que la pertenencia a una determinada familia-y da a esi otru individuu.

Vien esto a cuentu de la eleición del fiu de Xamenei, n’Irán, pa ser el líder másimu de la República Islámica. Un individuu, esti Mojtabá, qu’aporta al poder dende la so posición de fiu de, y la so rellación estrecha con pasdaranes y guardies de la revolución, los amos autenticos del poder, y xestores, xunto al lider ñuevu, que nin siquier tien la condición d’ayatolá, del sistema estensísimu de corrupción qu’agobia’l país, ente otres coses, y que fae que’l susodichu seya conocíu en Londres como un de los grandes propietarios inmobiliarios.

Trump tiénse amosao contrariáu cola eleición; y Netanyahu promete eliminalu lo más llueu, pero, si atendemos a Kerbo, deberíen alegrase, puestu que, según él, la primacía del heriedu sobro’l méritu representa namái la primer fase de lo qu’acaba siendo la decadencia d’una sociedá y principiu de la fin.

Nos EEXX, a lo que se ve, el problema nun ye l’heriedu, o la falta de méritu, sinon el lacayísmu, condición que cumplen los secretarios d’estáu del Cesar yanqui actual; distinguíos toos ellos pola so obediencia bovina a los deseyos del so amu, y que lleva a ver con esmolimientu’l futuru de la qu’hasta agora se contemplaba como faru de les democracies lliberales. Los controles periódicos del sistema, en forma d’eleiciones, quiciabes puedan apangar los daños. Vamos ver.

En casa, n’España, trepamos col cáncer del clientelismu, casi tan dañible como les anteriores dolencies sociales, y que, pocu a pocu, dende’l poder y los partíos, va anubriando les instituciones del estáu, dalgo que pon n’evidencia l’actuación axustada del poder xudicial, ca día más afogáu pol trabayu que-y da la nuesa clas política; o cuerpos con dos sieglos d’antigüedá qu’agora vense aboquiaos a güeyase les costures.

Kerbo piesllaba’l so llibru apareyando méritu con progresu, per un llau, y heriedu con decadencia, pel otru. Ye lo qu’hai.

Raúl Suevos

A 9 díes vencíos de marzu de 2026

Torna en castellán en repdiv.blogspot.com

De la catedral de Friburgu al Burj Khalifa

 

Va dellos años, cuando vivía n’Estrasburgu, solíemos colar hasta Friburgu, bien averao de Suiza. Yera un placer paseyar les sos cais y tomar dalgo na plaza, al pie de la so catedral espectacular. Una catedral gótica d’una sola torre campanariu que, aparte del so valir histórico y artísticu, ye amada fonderamente polos habitantes de la ciudá. Forma parte de la so esencia; namái se-y avera, como institución, la Universidá, qu’acoyera como maestru al fabulosu Max Weber.

Dicen los d’ellí que cuando, a la fin de la Segunda Guerra Mundial, los aliaos decidieron arrasar, esto ye, dexar al ras, les ciudaes alemanes pente medies bombardeos d’área combinaos colos incendiarios -los nazis perdonaron a Roma y París- llegó-y el turnu a Friburgo, con preavisu, como agora faen los israelites en Beirut, la xente subióse a les llombes pa librase de les bombes, y dende ellí contemplaron como too desapaecía baxo l’infiernu aéreu. Too non, la catedral quedó intauta. Un milagru.

Nun había talu. El bombardeu d’entoncenes nun cuntaba con GPS nin satélites, y los aviadores necesitaben una referencia sobro’l tarrén. L’aguya de la catedral yera perfeuta, poro too desapaecía al so alredor, anque nun había milagru. Yera la téunica de bombardeu d’aquella dómina.

Estos díes ye otra la téunica qu’impera, tantu pa bombardeos, como pa misiles, como pa drones, y anque los que más reciben son los iranís, estos tamién respuenden, incluyendo a los sos vecinos del Golfu, como Dubái, que tien recibío envites estremaos, anque la so aguya principal, el Burj Khalifa resiste impertérritu, y eso que dalguna bola al respeuto tien probao a dicir lo contrario.

Los iranís intentáronlo, y ye posible qu’insistan, pero’l gran edificiu paez intocable, y ye que’l so valir nun ye relixosu, como la catedral, pero sí d’imaxe, poro en Dubái echen el restu, y dicen que, nel conxuntu del Golfu, nos dos díes primeros d’ataques tiénense llanzao más misiles Patriot, 2.5 millones de dólares la unidá, que nos cuatro años de invasión n’Ucrania ¿Será per perres? ¿Será por Trump?

Detrás de les guerres, toes, hai motivaciones económiques, siempres, anque se pueden esconder tres rellatos de toa mena que les xustifiquen y que, col pasu del tiempu, los estudiosos suelen afayanos a la xente del común. En tou casu, les perres nun son eternes, y los arsenales tampocu, y esi edificiu maxestuosu y espodáu va siguir siendo una atracción pa los drones y misiles mientes el conflictu perdure. Per otra parte, baxo’l Burj, nun sé si hai terraces, pero atrévome a aventurar que nun habrá cerveza. Ye lo qu’hai.

Raúl Suevos

A 8 díes vencíos de marzu de 2026

Torna en castellán en repdiv.blogspot.com

¿Tien Trump una estratexa?

 

Son tiempos complicaos los que vivimos últimamente. Pa los que sufren sobro’l tarrén les consecuencies de dalgunes decisiones polítiques son inclusive sangrinos, mortales. Y too ello lleva yá un tiempu desendolcándose; quiciabes dende que Fukuyama decretó la fin de la historia, tres la cayida del Muru, porque, dende entoncenes, la inestabilidá nun tien fecho sinon amontar, y el titán ñuevu, el sustitutu de la URSS, China, tien venío pa dar una inquietú ñueva a lo que paecía que diba ser la Pax Americana.

Esi esporpolle chinu, en tolos órdenes, esmolez nos EEXX, tantu que, yá dende la presidencia Obama, 2009-17, la so estratexa y doctrina de defensa tien dío basculando haza’l Llonxanu Oriente; más despacio quiciabes de lo que quisieran, puestu que la Rusia de Putin -lléase ocupación de Crimea ya invasión posterior d’Ucrania- obligaben a caltener un esfuerciu importante sobro Europa. Amás, el Próximu Oriente, en inestabilidá perpetua, imponía un esfuerciu doble con espliegues nel Golfu y sofitu sostenío a Israel, el so xendarme. Y entoncenes aportó Donald Trump.

L’ogru anaranxáu paecía tenelo nidio, y magar los abandonos sonaos de los sos llugartenientes nel so primer gobierno, sacó alantre los Alcuerdos d’Abraham en 2020, dalgo que suponía l’aliniación de munchos países sunitas con Israel y l’arrequexamientu d’Irán, nemigu declaráu dende la Toma de los rehenes, y los sos satélites chiites. Una revolución que lliberaría munches fuercies y medios de los EEXX.

El 7 d’ochobre de 2023 too saltó pelos aíres na frontera de Gaza cola direición iraní, y dempués, per recien, toos sabemos lo que pasó ellí, col sofitu de Biden siguío de Trump. Un Trump que na so presidencia segunda paez dispuestu a baltar los ídolos del templu internacional con un desmadre de decisiones unillaterales, fondamentalmente la xuba indiscriminada d’aranceles, y tamién aiciones de combate, como l’apresamientu de Maduro en Caracas.

Agora llega’l turnu d’Irán, xustificada por Washington como guerra preventiva énte’l peligru nuclear de los ayatolás, y aceutada por gran parte de la opinión pública pola violencia bederre y sangrina que lleven imponiendo al so pueblu dende l’aportar al poder de Jomeini. Pero quiciabes nun ye, magar el valumbu, una salida atolondrada de Trump, quiciabes namái ye parte d’una estratexa.

La neutralización d’Irán, con cambéu de la estructura del poder, o simplemente col accesu d’unos dirixentes más mansulines, al mou venezuelanu, diba suponer el control del petróleu y gas del país, como en Caracas, que yá nun diría haza China, la esmolición auténtica, y, con Israel y Arabia Saudi actuando de delegaos, los EEXX podríen dedicar tol esfuerciu al Lloxanu Oriente.

Raúl Suevos

A 5 díes de marzu de 2026

Torna en castellán en repdiv.blogspot.com