Siempres que tengo oportunidá, de la mano de dalguna reposición en caenes secundaries, aprovecho pa tornar a güeyar a Heston y la Loren faciendo de Rodrigo y Ximena. Préstame’l Cid, y, magar ello, nun puedo evitar entrugame que tendría fecho’l Ridley Scott de los tiempos de Gladiator con esta llambionada en forma de guion que representa la vida del Campeador.
Una vida envuelta en papel de mitu, adornao con celofán d’epopeya, que, na so mayor parte, llégamos pente medies el Mio Cid, d’autor esconocíu y con base nel romanceru popular, dicen, y nel que, nel pasaxe de Santa Gadea, les Xures, ponen en boca del Cid una imaxe deplorable de los asturianos: “Que te maten asturianos, que nun seyan castellanos”, y ello magar l’orixe tresmontanu de la so dama.
La Carisa y la Mesta, difíciles víes loxístiques históriques del país, per onde entraron romanos y sarracenos, siempres mos tienen dexao apartaos de les sees del poder; au s’aflivanen los traxes del rellatu, y asina mos va, aínda anguaño.
Agora Christopher Nolan, otru gran artista del celuloide, recuerden Dunkerque, Oppenheimer, o Memento, ente otres, atrévese cola Odisea, la Biblia de la Grecia antigua, el referente básicu de la Paideia, el sistema estructural sobro’l que se construyía aquella cultura, y, como’l Cid, y magar Homero, d’autoría desconocía pa munchos de los infinitos investigadores d’aquellos, los nuesos padres intelectuales, que dicen que se trata d’un colectivu, más que d’un autor único. Dicen.
La obra, un peliculón, comenten los críticos, da pa opiniones estremaes: Que desfigura la historia, escaeciendo quien eso afirma que ye ficción; que la parafernalia bélica nun s’axusta a los cánones; qu’Elena tendría que ser rubia, escaeciendo las rellaciones amplísimes y contrastaes de los pueblos mediterráneos, que yá entoncenes algamaben l’altu Nilo; pero no que toos paecen coincidir ye na monumentalidá del espectáculu cinematográficu, dalgo que, nel mío casu, ye atractivu abondo como pa esperar unos díes pa dempués, ensin aglomeraciones, poder reviciar d’un repartu que, lideráu pol siempres solvente Matt Damon, promete un par d’hores de disfrute. Vamos ver.
La segunda parte, como asocedió nun va muncho col bodriu napoleónicu robláu por Scott, atopamosla nel interés qu’estes grandes películes suelen despertar y que arrastren a la llectura de la obra na que se basen, nesti casu la Odisea, que los que peinamos canes esfrutamos pero que nos currículos caberos tien desapaecío, xunto con otres pieces inmortales de la lliteratura. Bienveníu seya Nolan. Ye lo qu’hai.
Raúl Suevos
A 19 díes vencíos de xunetu de 2026
Torna en castellán en repdiv.blogspot.com
No comments:
Post a Comment