Lo más paecío que tenemos al humor inglés n’España atopamoslo en Galicia; quiciabs por aquello de que, con un gallegu, dicen, nunca se sabe si va o si vien. Nós, vecinos dende va yá munchos sieglos, primeros peregrinos históricos per esi Camín Primitivu qu’agora paez ganar la fama que siempres debió corresponde-y, nunca acabamos de garralos del tou, y eso que, nel mandu de la nación lleven ya unos cuantos representantes; pero aínda asina casi siempres mos sorprenden. Como don Mariano.
Güei tien tornao a facelo. Con razón, porque, interesadamente creo, ayeri dieron-y unos cuantos palos, munchos d’ellos interesaos, como esa excusatio non petita del presidente Sánchez al primer ministru francés. Y ye que la socarronería del más famoso rexistrador de la propiedá ye proverbial, y, visto lo visto, paez perenable.
El casu ye que la so referencia a los oríxenes de los miembros de la seleición francesa paez haber llevantao folaes d’indignación en munchos requexos d’España y Francia, en dambos países aparentemente interesaos. Y ello porque ellí, en Francia, tocamos el multiculturalismu, conceutu sociolóxicu y políticu que paez desentonar naquel país cola realidá de ca día. Dalgo que los barrios de les grandes ciudaes, ellí conocíos como banlieus, señalen de forma cotidiana, y si non, entruguen-y vustedes a los aficionaos del Real Madrid que visitaron el Stade de France na final de la Copa d’Europa de 2022.
El futbol profesional, como enantes y anguaño lo foi, en Francia, la Lexón estranxera, ye un preséu de promoción social, con un percorríu muncho más cortiu y rentable en casu d’ésitu nel primer supuestu, y, desgraciadamente, magar el llamativu color de piel de la seleición francesa, nun algama a nasconder el fracasu d’esi multiculturalismu, y ello magar l’amiestu racial que tamién observamos nes grades de los estadios. Ye lo qu’hai.
Esta divagación vienme mientes güeyo na televisión, como tolos branos, el Tour de Francia, con namái un corredor de raza negra nel pelotón ¿va ser porque una bicicleta ye más cara qu’un balón? Y, sobremanera, con unes cunetes y aceres enllenes de público a rebosar; un público, el de la Francia de provincies, absolutamente blanquín y con pinta de franceses de los de tola vida; y claro, éntrame la congoxa de pensar que quiciabes, el racismu del que s’acusa estos díes al señor Rajoy nun representa más que’l fracaso de dalgunos países, nesti casu Francia, y en un futuru viniente quiciabes España, pa facer frente a la evolución de les sociedaes modernes, les propies, ca vegada más avieyaes, y les ayenes, presionaes por problemas estremaos.
Raúl Suevos
A 15 díes vencíos de xunetu de 2026
Torna en castellán en repdiv.blogspot.com
No comments:
Post a Comment