El día yera unu más de tantos otros llaborables. Los pasaizos del metru de la gran ciudá taben a esa hora tan atestaos como cabía abarruntar. La xente diba a lo de so ensin parase a güeyar más alló de la pantalla de los sos móviles o de lo que los sos particulares preocupaciones llevaben a les sos ocupaes tiestes; pero ella, por aquelles cuestiones pa les que casi nunca s’atopen rempuestes, allevantó la tiesta del suelu, onde normalmente fixaba la so vista, y le mirólu a la cara.
“Soi islamista, qué caraxo güeyes”, y actu seguíu raxó-y la cara énte la mirada atónita del personal que, como asocede nestes ocasiones, compartimentóse ente los que s’entainaron a aidar, los que llamarón a la policía, y los que pasaron olímpicamente del asuntu y siguieron el so camín.
Unos minutos más tarde, cola descripción de los que telefonarón, el tipu fo deteníu a unos doscientos metros de la boca del metru. Mui averao del Duomu de Milán, pues d’esta ciudá falamos, anque los fechos perfeutamente pudieran tener asocedío en Madrid, o’n Barcelona; tamién en Paris, o’n Londres; ensin escaecer Berlín. Ye una situación, desgraciadamente demasiao frecuente.
Cabe añidir, cuéntamoslo too’l Corriere de la Sera, el más importante periódicu d’Italia, que’l tipu, arxelín irregular de 27 años, fuera deteníu la tarde enantes, tres reventar dellos coches, y puestu en llibertá por un xuez. Y tamién cabe agregar que la moza a la que desfiguró yera una marroquí de veintipocos años. Y el rellatu zarrsse coles manifestaciones d’un notoriu políticu italianu agradeciendo, con sorna, al xuez pola so dilixencia del día anterior. Tou un exerciciu de demagoxa’l del políticu.
Y ye que, ensin conocer con fondura la llei italiana, toi bien seguru qu’esi xuez nun fizo otra qu’aplicar escrupulosamente la llei que los políticos aprueban nes Cámares de Roma, y, posiblemente, él mesmu, tenga participao na aprobadura de munches d’ellas. Ye lo qu’hai.
El casu ye que tamos énte un ciclu d’eleiciones ñuevu n’Europa. N’Italia van ser l’añu viniente, y equí, anque nun-y apeteza al nuesu presidente de gobiernu, tamién; y too ye valido p’arañar votos, con particular atención a la problemática migratoria, pa la que naide paez atopar una solución conducente. Una que tenga en cuenta la necesidá de brazos, a lo menos mientes la tasa de fertilidá europea se caltenga nel pozu anguaño, y, al mesmu tiempu, el control de los qu’entren, en cantidá y calidá.
Mentanto convien que sepamos separtar el polvu, demagóxicu, de la paya, la demografía.
Raúl Suevos
A 10 díes vencíos de xunetu de 2026
Torna en castellán en repdiv.blogspot.com
No comments:
Post a Comment