Programa progresista pal país de Ḥauḥa

PROGRAMA PROGRESISTA PAL PAÍS DE Ḥauḥa

Ye Ḥauḥa una rexón del centru del Perú na que, mientres la dómina de la so pertenencia a España, les coses de la economía marchaben tan bien que llegó a dicise que nos sos regatos fluyía lleche en llugar d’augua y los sos árboles daben buñuelos como frutos ñaturales; tanta yera la so sonadía que na metrópoli acuñóse la frase de esto ye Ḥauḥa pa describir una situación de bayura estrema.

Vien lo cabero a cuentu les 300 midides/propuesta del señor Sánchez –eludo arremente falar de partíu o gobiernu puesto que la personalidá del presidente tapa’l rellumu de tolo demás- y que, llenu d’esperanza, tuve el valir de lleer. Fícilo con tantu detenimientu que, al rematar, les midides crecieren hasta 370. Si la eficacia de les mesmes creciere na mesma proporción y rapidez taríemos yá más averaos de paecemos a Ḥauḥa.

Enantes de siguir tengo de señalar qu’a min eso del progresismu siempres me dio muncho que pensar porque n’Academia militar siempres m’enseñaron que se progresa p’algamar unos oxetivos y nel mundu de la política cuando se fala de progresismu namái caben dos opciones, o nun se definen los oxetivos o son tantos qu'ún piérdese a la hora de priorizalos o simplemente clasificalos. Pue qu’esti seya’l casu.

Amás, si mos autocalificamos como progresistes ¿Qué pasa colos demás? Obviamente tienen que ser reaccionarios, o a lo menos inmovilistes. Con un xuegu simple d'axetivos yá llogramos descalificar a los oponentes de nueso. La esquierda lleva xugando a ser progresista dende los tiempos en que Rousseau inventó la voluntá xeneral y ella, la esquierda, propónse como única calificada pa interpretar esa voluntá xeneral. Sacantes cuando hai varies esquierdes, que nel so casu la llucha por esa interpretación, agora llámenla rellatu, pue allegar a niveles épicos de navayeu. Pue qu’esti seya’l casu.

El casu ye, tornando a les midides, que n’elles atopamos un cuelmu de bones intenciones y propuestes, cuasi meravioses, que van haza un, tamién meraviosu, estáu de bienestar al que mos arriesgamos a nun aportar si a) nun se lu sofita nel so viniente intentu de formación de gobiernu, b) 

nun se lu vota nes eleiciones vinientes, casu de fallar la opción a).

Les midides, en xeneral, promueven los subsidios más o menos encubiertos, afalen los sindicatos, potencien el SMI, recorten la reforma llaboral agora a valir, reparten chuches a mandrecha y, más, a 

manzorga. Va a haber hasta internet a preciu módicu en Marentes, pueblu caberu d’Ibias enantes d’algamar la provincia de Llugo; falen, anque pocu pa nun asustar, de fiscalidá y dediquen-y, ¡cómo non! un capítulu a la memoria histórica, agora memoria democrática, na que la momia de Franco apaez como, esta vegada sí, oxetivu preferente.

A min, que nun soi economista, paezme que too eso debe costar un güevu, ¡perdón! un reñón, y víenme la ocurrencia que los cuartos pa financialo vengan d’unos mayores ingresos del estáu, vía una mayor actividá económica desendolcada por unos empresarios de los que nun se fala en tol documentu, porque nun quiero pensar que seya vía unos impuestos de los que, como yá indiqué, pásase cuasi de raspión.

Queda otra posibilidá pa perfacer tan meravioses midides y ye qu’éstes se financien vía delda, camín esti nel que los gobiernos caberos paecen especializaos, tantu que, una vegada endeudaos los nuesos fíos, podemos aniciar a endeldar los nuesos nietos. Amás agora’l dineru ta baratu. Aprovechemos, que los nietos nun voten.

Finalmente, la edá fáime recordar que la situación asemeyase enforma a la de la llegada del primer gobiernu Rajoy, con un programa meraviosu que la crisis –aquella que Zapatero refugaba- obligó, o 

eso dixo él, magar tener mayoría absoluta, a dexar de llau al entamu pa llueu escaecer dafechu. Pue qu’esti seya’l casu.  

Raúl Suevos

En Xixón a 5 de septiembre de 2019

Versión en castellán en repdiv.blogspot.com