La UME y la ineficiencia del Estáu

LA UME Y LA INEFICIENCIA DEL ESTÁU

Mientres les parolaes ente’l gobiernu y los representantes d’ETA pa la lliquidación de la mesma, paez ser, un políticu manifestaba, en rellación cola dificultá pa controlar –que caún maxine la fonderada del verbu controlar- a la Guardia Civil, qu’ésta namái obedecía al Duque d’Ahumada. Ensin dulda la meyor de les allabancies que se-y puen facer a la Benemérita, pero ye na Cartilla del Guardia Civil, de la pluma del Duque y asoleyada en 1846,  u s’atopa’l particular códigu bushido que guía dende entós a tolos sos miembros.

N'ún de los primeros artículos d’esti reglamentu pue lleese que “va procurar ser siempres un pronósticu feliz pal aflixíu,…; el que tenía la so casa presa les llames, considere’l fueu apagáu; el que güeyaba’l  so fiu arrastráu pola corriente les augues, lu crea salváu;…”; y asina sigue asocediendo, como esta selmana cabera, con quemes en Galicia y bestiales llenes nel Sureste d’España. Ellí taben los guardies dende’l primer momentu, colos medios precarios de los Puestos rurales y más tarde cola sofisticación de les sos Especialidades centrales. Pero toos col mesmu espíritu, el marcáu na Cartilla, el socorru al aflixíu, lo qu’anguaño se conoz como Protección Civil en toles sos variantes.

La UME, la Unidá Militar d’Emerxencies, naz muncho más apocayá, malpenes 15 años, como resultáu de la decisión del presidente Zapatero énte les crítiques pola inoperancia del estáu mientres una nevada terrible que dexó miles de persones bloquiaes na nieve. L’estáu autonómico balerare de competencies y capacidaes al gobiernu español que nun podía permitise’l luxu de perder imaxe, y de pasu votos. Había que facer daqué.

La solución encamentóse-y al Ministeriu de Defensa, siempres obediente, siempres dispuestu, anque la operación-y costare enormes recursos humanos y económicos y anque una fuercia policial de calter militar como la Guardia Civil naciere pa ello.¿Quiciabes pa nun violentar el sentimientu de delles autonomíes con competencies policiales?

L’Exércitu, esti exércitu modernu y profesional col que cuenta España, púnxose a la xera y a la vista ta que’l resultáu ye más que meritoriu. La UME, xunto coles Misiones de Paz, representen los pilares nos que se basa la mui positiva imaxe con que cuenten les nueses Fuercies Armaes énte la opinión pública y hasta altos mandos que al entamu nun lo veíen nidio güei apadrinen la so creación.

La UME sigue xorreciendo en medios y capacidaes, tamién n’especialidaes, ente otres les 

bacteriolóxiques, sobro les que la crisis del Ébola yá sollertó va dellos años, y en so favor tamién trabaya’l Cambéu climáticu que va facer que nun futuru próximu, yá ta equí, mos veamos enfrentaos con mayor frecuencia y virulencia a tou tipu de calamidaes que van poner a prueba les capacidaes del estáu. Anque no que más crez ye n’eficiencia. A la vista ta.

Con too, a min quédame un taste d’amargor cuando me recuerdo d’aquello de “zapateru a los tos zapatos”. L’Exércitu ta pa sofitar les instituciones del estáu en casu de necesidá y siempres que’l gobiernu lo ordene, pero’l so oxetivu principal ye y tien de siguir siendo la Defensa, con mayúscules, y a min paezme que la esitosa creación de la UME nun fue más qu’una amuesa de la ineficiencia del estáu en rellación col sistema autonómicu, que lu obligó a vistir un santu nuevu cuando yá tenía otru que llevaba más de cien años faciendo milagros.

Raúl Suevos

Coronel d’Infantería (R)

En Xixón a 16 de septiembre de 2019

Versión en castellán en repdiv.blogspot.com