La Vuelta y la visión d'Asturies

LA VUELTA Y LA VISIÓN D’ASTURIES

La Vuelta vien de face-y a Asturies un regalu publicitariu estraordinariu coles imáxes que mientres tres díes siguíos emitió pa tol país y, ye de suponer, pal estranxeru pentemedies les cadenes deportives. Ello fue posible gracies al bon tiempu que, como una promesa de cambéu climáticu, mos acompañó nesi ralu temporal.

El primer día, viniendo de Santander, la costa asturiana, coles sos sableres, cantiles y un verdor que quiero maxinar que cutiría les retines de los nuesos compatriotes aforfugaos por un branu percalurosu, de quemes escomanaes, banzaos en mínimos ya informaciones de pueblos esperando l’aportar de los camiones aguadores p‘apurrir un pocu d’augua a los sos caños grebos, debió d’impresionar d’una miente fonda, y espero que rendidera, a munchos de los televidentes.

Les imáxes de Xixón, Uviéu, y en xeneral la zona central, esa que nun futuru s'espera que conforme l’Área metropolitana del Principáu, con peligru, según dellos, de cortar el vuelu yá precariu de les ales, amuesen una rexón mui densamente poblada, con bones comunicaciones y, nel casu de Xixón, una redolada xeográfica espectacular; too ello con un paisaxe agrícola entá vivu, anque na so mayoría lo seya como segundu ingresu. Afortunadamente, dende l’helicópteru, ye imposible güeyar les cifres macroeconómiques que mos dan idega d’otra realidá estremada; pero eso, pensando nel turismu, nun vien al casu nesti momentu.

Na segunda xornada pudimos visitar el suroccidente, Tinéu, Cangas y tamién Ibias.Zones nes que les cabeceres del conceyu bracien pa nun fundise definitivamente nel despoblamientu y el fallecimientu económicu tres el pieslle les mines. Nel casu de Cangas, la tresmisión amosomos una villa percuriosa, encaxada ente valles, na que la viticultura heroica intenta caltenese nes manes d’una xeneración entrada n’años y ensin relevu, con unos servicios en escayencia énte la falta de profesionales dispuestos a ser destinaos a talos llugares. Camín d’Ibias el locutor esplayabase nes maraviyes de Muniellos y el Parque de les Fontes del Narcea pero’l paisaxe amosabase güérfanu de paisanaxe; en San Antolín d’Ibias malapenes un par de docenes aplaudíen a los esforciaos de la ruta; más allá, en Seroiro, un pueblu de la fastera sur del valle, antaño puxante, con bones tierres y güertes, ofrecía la mísera visión de siete aplaudidores, tres d’ellos pertenecientes a un helicópteru ellí posáu.

Güei, ente Pravia y Llena, meyores carreteres, pueblos quiciabes más cuidaos -l’averamientu al 

centru vase notando y con ello los ingresos- y pocu ambiente rural nos mesmos. Observense praos pero non ganáu paciendo nellos, na rexón de la lleche nun hai vaques, o meyor dicho, yá nun hai vaques n’estensivu, la granxa ganadera pequeña fue, va, desapaeciendo énte los costes crecientes d’esplotación y el preciu menguante de la lleche; namái a partir d’un bon númberu de cabeces n’intensivu se pue caltener, y eso con munches dificultaes.

Perbaxo d’esos montes y viesques espectaculares que l’helicópteru mos va amosando nun s’algama a talantar el baxomonte, escomanáu, grandiosu, llerciosu, que va ser el responsable de que too ambure en cuantu que se den les condiciones de vientu y temperatura ideales; viesques qu’énte l’abandonu d’años foron colonizando praos y finques y, en dellos casos, aporten hasta’l mesmu llinderu de los pueblos, lo que va facer aínda más dramáticu l’efeutu del fueu. Solo una esplotación integral del monte, a la antigua manera, podría prevenilo pero eso, colos pueblos vacios, o ocupaos per vieyos, ye imposible.

A lo último, quedemos coles percurioses imáxes de  la nuesa tierra ufiertaes pola Vuelta que pue que sirvan p’atraer entá más visitantes de los qu’esti branu, yá n’estáu terminal,mos traxo y pa los que, me paez, nun tenemos les infraestructures afayaices si esi anunciáu cambéu climáticu acaba por 

ponemos de moda.

Raúl Suevos

En Xixón a 9 de septiembre de 2019

Versión en castellán en repdiv.blogspot.com