Monday, July 22, 2019

Una de espíes

UNA DE ESPÍES
Va  unos díes que’l xeneral Sanz Roldán, al cumplir los diez años de dos mandatos sucesivos, cesó nel so cargu de direutor del CNI, Centru Nacional de Intelixencia, y a losos 75 años y dempués d’algamar el máximu emplegu na carrera militar marchó pla so casa col agradecimientu de les altes maxistratures de la nación. Agora la importancia del asuntu paez llindase a ver si’l sucesor ye una sucesora, o non.
Lo que nós llamamos CNI conozse de manera xenérica en cuasi toles naciones de la nuesa redolada como Axencia Nacional de Seguridá, y nun ye insignificante la diferencia porque la intelixencia xenerase a partir de la información y con ella aprovisase seguridáanque nel país de nueso vimos como, a vegaes, nos altos niveles del gobiernu paecía que interesase más la información –interesada- que la intelixencia.
Los servicios de intelixencia n’España nacen a partir del antiguu Serviciu d’información militar controláu daquella pol Estáu Mayor Centraldarréu y a lo llargo d’una evolución que foi de la mano de la propia evolución nacional, créase en 1977 el CESID, el Centru superior d’Información de la Defensa, que pasa a depender del entós recién creáu Ministeriu de Defensa. Son años nos que’l terrorismu etarra atropalo too pero, aínda asina, pal 2001 aporta a la direición el primer civil, un diplomáticu de carrera; un añu dempués naz yá’l CNI nuevu, sofitáu nuna llexislación acordies colos tiempos nuevos.
El 2004 queda pa la historia polos atentaos terroristes nos trenes de cercaníes madrilanos, lo que va dar una victoria sorpresiva nes eleiciones al PSOE y con ello aporta a una xefatura curtia y nefasta  nel Ministeriu de defensa José Bono, que tien tiempu para nomar como cabezaleru del CNI a un individuu del so enfotu que va afondar la institución nel periodu más escuru de la so historia. El fechu de que’l direutor se viere aboquiáu a la dimisión a partir d’informaciones filtraes dende’l propiu serviciu da cuenta gráfica de cuál yera la situación interna. Pa escaecer.
Cola llegada del PP al poder en 2011 produzse un cambéu importante; el CNI dexa’l Ministeriu de Defensa y pasa a depender del de Presidencia, lo que nun debería causar sorpresa tratándose d’un serviciu “nacional” magar la llarga tradición militar de la institución, namái un pero qu’aducir. El cambéu de dependencia suponía qu’aporvir d’intelixencia a los exércitos dexaba de ser una prioridá 
pal CNI, nun periodu en que España esplegaba unidaes per mediu mundu. Somos el país con participación en más misiones europees de tolos miembros de la Xunión.
Nel llau militar, en 2001, crearasel CIFAS, Centru d’intelixencia de les Fuercies armaes, que, amparáu poles mayores capacidaes del CNI, vivía sumíu nuna dulce apigazadura provocada pola falta de plantilla y de presupuestu. Cuando se produz la separación, la seguridá de les tropes, eses qu’esplieguen en misiones esteriores, queda n’entredichu y el CIFAS tien que reinventase, con munches promeses de per medio, pa que les nueses Fuercies nun quedaren en precariu nos países nos 
qu’esplieguen y creo que, magar la escasez de medios, nun se fizo mal.
La fuyida del señor Rajoy y la llegada del gobiernu Sánchez nel 2018 retrotraenos a la antigua situación de dependencia del Ministeriu de defensa, no que paeció más una maniobra interna del propiu gobiernu que daqué meditaoPero’l casu ye que siguimos esplegando unidaes per mediu mundu y el CIFAS nun paez que viere convertise aquelles promeses en realidaes de plantilla y medios.
España necesita un CNI y un CIFAS, el segundu en dependencia funcional del primerupero pa ello ye necesario que la seguridá dexe de ser un asuntu de manexar información y pase a ser un asuntu de seguridá nacional y esto solo se va algamar si too ello pasa a ser una política d’estáu consensuada 
polos grandes partíos, dotándola asina de la necesaria estabilidá y planificación.
Raúl Suevos
En Xixón a 21 de xunetu de 2019


No comments:

Post a Comment