La Xota ye una dancia popular que, nes sos estremaes variantes, dase en cuasi toa España y anque nun debe ser tan antigua como se cree, a lo menos Cervantes, que cita munchos bailles nel Quixote, nun la noma, garró tanta fuercia que l’aragonesa tómase por munchos como referente nacional cuando se fala de folklore español.
Dellos estudiosos dicen que nació, va dos sieglos, a partir de coplilles demientres los Sitios de Zaragoza y riu enrriba aportaría a les tierres de Navarra au algamaría gran espardimientu per tol reinu pa ser na Ribera onde se desendolcaría con identidá propia,estremada de l’aragonesa, camudando no que güei se conoz como Xota navarra.
Nesta tierra de nueso ye Navarra la gran pieza que siempres guetó’l nacionalismus eparatista vascu. Cuando trabayé ellí, al aniciu de los 80, Pamplona vivía arrequexada per, ente otros, Mercedes Galdós y los sos secuaces asesinos que finaron cola vida de 17 persones, ente elles un neñu, y poles que pagó con 19 años de prisión, malapenes un añu y pocu per cada vida segada. Entós los oxetivos políticos de les sos pistoles taben nel Exércitu y les FCSE, pero tamién socialistes y populares pagaben el so preciu. Anguaño, dalgunos, paecen querer escaecese. Pa eso de la memoria ye más importante lo de va 80 años.
El PNV lleva intentando ganar tarrén ensin desmayu dende la Transición. Hasta punxo de Lendakari a una mesa camilla navarra como Carlos Garaicoechea; anque’l braserillu prendió-yos les faldes y cuasi arde la casa. Dempués compraron un traxe nuevu y camuflaronse tres d’él como Geroa Bai. Y, al pasu, los partios constitucionalistes, incluyendo la Xunión del pueblu navarru, UPN, diben perdiendo fuelle, tantu que na llexislatura cabera Geroa Bai tien gobernao Navarra y Bildu, la herieda de la terrorista Batasuna, Pamplona.
Nos últimos tiempos el PSOE, varies vegaes cabezaleru del gobiernu navarru, tocare fondu en cuantu a representación y poro María Chivite, xefa del socialismu navarru, tenía pasao l’anterior llexislatura nun ataque engafentáu y continuu a les posiciones nacionalistes de tou tipu, y sobre too, el parar la euskaldunización de Navarra. Había que recuperar el tarrén perdíu mientres años de paños calientes neses mesmes rellaciones, tantu en Navarra como nel País Vascu, u son collaboracionistes
conscientes.
Esta política paez tener funcionao pos nes recién celebraes eleiciones el Partíu socialista navarru llantóse como segunda fuercia, a muncha distancia d’UPN, ganadores de les eleiciones, y eso animó a Chivite a apostar a lo grande. Los sos votos dieron-y la presidencia del Parllamentu navarru a Geroa Bai y agora salta la noticia, previsible, del alcuerdu pa gobernar Navarra colos peneuvistas y los podemitas, y claro, la necesaria astención de los heriedos de Batasuna. Too ello magar les ufiertes de los votos d’UPN a Sánchez pa la so investidura. El PNV pesa más.
Van cuasi cuarenta años, cuando yo aporté a Pamplona, aniciaba la lenta implantación de les ikastoles en Navarra, al entamu nes zones de tradición vascuence, güei en tol territoriu. Esi procesu, el de la implantación del nacionalismu pente medies les aules, el mesmu que se produxo en Cataluña, ta corriendo en Baleares y escomencipia'l camín en Valencia, necesita del mesmu tiempu, cuarenta años, para percorrese a la inversa, y eso siempres y cuando heba voluntá de recorrelo, lo que nun paez que vaya a ocurrir nos cuatro años vinientes en Navarra d’ehí que nun pueda maxiname a los de la Ribera cantando xotes navarres en vascuence, poro, tarrezo que tamos énte l’adiós a les xotes en Navarra.
En Xixón a 5 de xunetu de 2019
Raúl Suevos
repdiv.blogspot.com
No comments:
Post a Comment