Seis atunes coloraos, seis

 

El mío deporte favoritu ye’l golf, prautica que realizo davezu nesa maraviella que ye’l campu municipal del Tragamón, que sosprende, por esa condición de municipal, xunto al de La LLorea, a tou foriatu que lu visita; y tamién poles sos otres carauterísticas pal desendolcu de l’actividá, que son escelentes.

Suelo dir alló delles mañanes ente selmana, y esti branu, como nos caberos, la conversación recayía no seco y duro que s’atopaba’l campu, dalgo qu’unos y otros, achacábemos a la falta de llovíos demientres los meses braniegos, si bien nel pasáu nun asocedía tan de xacíu. Al fenómenu, cabría añader, y esto ye apreciación personal, que yá nun hai roxada nos meses de branu. Yá naide sal pela nueche cola chaquetina puesta, o’l xersey colgáu al llombu, pa prevenir aquella “roxada” incomoda, más fina que l’orpín, pero qu’acababa por moyar la mesa de la terraza, y que tamién llegaba a los praos del Tragamón, que cola so humedá yeren a caltener el verdor demientres l’estivu.

Esti añu, amás de la desapaición d’esi fenómenu, atopámonos col arenal de San Lorenzo zarráu a vegaes pol aportar de carabeles portugueses, con tanta frecuencia que yá’l personal conoz la bandera colorada qu’avisa de la presencia d’esi animal antipáticu. Una frecuencia y cantidá mui superior a la de los años caberos. Ello débese, según los espertos, al calentamientu de les augues del Cantábricu, dalgo que los bañistes constaten al entrar nes otrora fríes de les nueses playes.

Son indicadores d’un cambéu climáticu del que vienen sollertando infinidá d’estudios, munchos de los cualos faen mención a la influyencia que l’aición humana tien tenío n’ello, y que los gráficos d’emisión d’esi gas, el CO2, vienen amosando dende que s’estudien científicamente. Pero l’asuntu nun paez importar al personal, pero, los xixoneses, a lo menos, deberíen preocupase. Yo fáigolo.

Fáigolo porque, amás de les señales mencionaes, esti branu pescaronse seis atunes coloraos en frente de les nueses costes, na zona de Cuideru creyo, con un pesu que va de los 160 a los 220 kg, esto ye, unos animalinos importantes. Y dalgún va dicir ¡albricies¡ vamos poder comelu más frescu y baratu, porque neso de la gastronomía les modes tamién faen estragadures, y equí, ente nós, tenemos munchu snob de la mesa que te da una conferencia sobro les partes d’esi animal en cuantu que te descuides, escaeciendo que’l bichu come xarda, sardina, bocarte, calamares y pulpos, que ye lo qu’alimenta al nuesu bonito del Cantábricu, y que, anque seyan parientes, el so mayor tamañu va facer que’l nuesu se vaya más al norte, poniendo en peligru la costera y faciendo subir el preciu de la ventresca, qu’esti añu va a 45 euros la ración en restaurante. Ye lo qu’hai.

Raúl Suevos

A 18 díes vencíos d’ochobre de 2026

Torna en castellán en repdiv.blogspot.com