Nun sé per ónde entamar. ¿Quiciabes peles puertes de los mío
vecinos que faen paecer esnuda y escarnada la de mío casa? Unu tien llantao unes
tires descomanaes con llazu que la faen semeyar como un paquete de regalu enorme,
como anunciando una especie de centru comercial tres d’ella mesma, o dalgo
asina. Los otros dos cuelguen adornos d’árbol navidiegu, con pinta de tener
aportao a preciu amenorgao dende la China aballadora de Xi Jinping, cola
salvedá de que proponen una mui yanqui Merry Christmas. Casi que me quedo cola
mío puerta afarada, la mesma que nun s’abre cuando los pocos y azogosos neños
de la comunidá vienen a pidir caramelos con ocasión d’esa fiesta importada del
Halloween. Nun me presten les importaciones culturales populares, y menos les
yanquis. Ye lo qu’hai.
A min prestábame la Navidá de la mío infancia. Que nun yera probe
de solemnidá pero sí espurecha en bienes y regalos. Trayía, en cambiu, a lo
menos nel mío barriu popular de La Calzada xixonesa, un montón de vivencies, muncho
más arriquecedores que los caramelos arribaos de los USA; como aquelles
castañueles feches con dos listoncillos de madera, colos que dalgunos algamaben
percusiones dignes d’un conservatoriu. Yo non, yo diba abondo xustu nel asuntu.
Pero con elles axuntábemos el grupín de guaḥes y díbemos a cantar villancicos a
les puertes del vecindariu, con un repertorio del que’l tiempu namái me dexó l’alcordanza
d’aquel: “nel picu d’aquel monte hai un perru cagando, pa los dueños d’esta
casa que nun mos dan aguinaldo”. Pieza que supongo nun cuntaba con más estrofes
pues siemprs salíemos d’estampida tres la primer. Ye lo qu’había.
En Cimavilla, el mío barriu segundu, alcuérdome de l’ansiedá
de la Nochebona, yá mozucu, pues tres la Misa de Gallu, lo de so yera recorrer
en cuadrilla les cases de les moces coetánees, au yéremos gasayaos por unos pais
que, supongo, consideraben más prudente y seguru caltenemos al algame del güeyu
que nun vagando peles cais d’entoncenes. Un vezu que duldo que’l tiempu tenga
caltenío.
Na decoración urbana tampocu m’emociona lo que reparoo. Una
abondanza de lluces y colores de toa mena na que l’ausencia de motivos tocantes
la Navidá-Natividá del Señor, ye’l llugar común na mayoría de ciudaes d’España,
cola esceición, en Xixón, de la Estrellona y el Pesebre lluminosu de San Pedro.
Poro en casa esforciamonos en caltener el Belenín, col amestao de los dos
guardiaciviles dándo-y seguridá al Neñu, un pocu como la UCO fae con toos nós.
Feliz Navidá
Raúl Suevos
A 19 díes vencíos d’avientu de 2025
Torna en castellán en repdiv.blogspot.com
No comments:
Post a Comment