Na mío xeneración la historia patria tratábase abondo y una
de les figures que mos resaltaben como exemplar yera la de Guzmán el Buenu, por
aquello de sacrificar al so fíu enantes qu’entregar la plaza de Tarifa a los nemigos
del so rei. Anque paeza mentira, la del coronel Moscardó, defensor del Alcázar
de Toledo demientres la Guerra incivil, y col so fíu fusiláu en pareyes
ciscostancies polos asediadores, nun yera tan aireada nel currículu escolar del
denostáu franquismu. Ye lo qu’hai.
El casu ye que Guzmán el Buenu representaba especialmente los
valires de llealtá, honor, valentía y sacrificiu, toos ellos d’importancia
especial pa los rectores d’España naquella dómina, y nun incluyo’l patriotismu,
sí nel casu de Moscardó, por aquello de que’l de Tarifa yera al rei a quien xuraba
llealtá y non a la Patria.
Nel mío pequeñu mundiu infantil xixonés nun se diba tan lloñe
no de los valires, pero sí los había, y, especialmente pa mío madre; teníase
que curialos dende l’aniciu, poro, a ella preocupaba-y que yo me descarriara y
me convirtiera nun pequeñu atorrante, vistes les amistaes coetáneas de les que
me facia acompañar; pa nada del so gustu. Ella quería otra cosa pa mín, y l’espeyu
nel que debía güeyame yera Pepín el buenu. Un neñu tan buenu que nun rompía un
platu nin queriendo. Pero yo, nada, aportunaba na sienda caleyera pa disgustu y
preocupación materna.
Na vida suel asoceder asina, nun sabemos o nun atinamos a la
hora d’escoyer les nueses compañíes, y, cuando se trata de persones normales,
la cuestión nun tien trescendencia más alló de la redolada del individuu. Non
asina cuando en llugar de persones falamos de personaxes, como ye’l casu d’un
presidente de gobiernu, como ye’l nuesu casu.
El doctor Sánchez acaba de tornar d’una cume d’Europa cola
Comunidá d’estaos latino-americanos y caribeños, un tinglao montáu pol difuntu
Chávez, na dómina del maná petrolíferu venezuelanu, pa dexar fora a los Estaos
Xuníos y Canadá. Una cume au, xunto a él, los dignatarios más importantes yeren
Lula y Petro, dos líderes significaos de la esquierda bolivariana, abondo lloñe
dambos de les corrientes de poder que fluyen anguaño n’Europa y al norte del
riu Grande. Amistaes peligroses, en ciertu mou y nel momentu actual. Quiciabes
meyor fuera tener quedao en casa.
Mientes, el Rei, siguiendo les instrucciones del gobiernu,
como ye la so obligación, viaxa a China, notra amuesa innecesaria del fechu
diferencial español nesti momentu de tensiones globales, escaeciendo que
siempres ye bono tener un Pepín el buenu como referente.
Raúl Suevos
A 10 díes vencíos de pallares de 2025
No comments:
Post a Comment