La tiranía acordies con James Madison

 

Fo’l cuartu presidente de los EEXX, tres Washington, Adams y Jefferson, y autor de les diez primeres enmiendes de la Constitución, nes que se defín la Carta de derechos de la ciudadanía, y tamién la pluma que, pente medies la revista “El Federalista”, moldió les idees de los constituyentes na fase de redacción y discutiniu del documentu.

Nesi Federalista, un llibru que compré va yá dellos años nun viaxe inolvidable a México, pues equí nu taba asoleyáu, podemos atopar la so afirmación de que “l’atropamientu de tolos poderes, llexislativu, executivu, y xudicial, nes mesmes manes, representa la definición verdadera de tiranía”, y poro cuidáronse muncho de que dalu de los tres prevaleciera sobro los otros, inclusive promovieron qu’esistiera una cierta confrontación ente ellos. Agora, con Donald Trump, too se tien dío a facer puñetes.

L’ogru anaranxáu tien el so poder presidencial recrecíu tres les sentencies caberes del Supremu, au tien dío allugando dende la so primer presidencia a xueces de la so cuerda personal, y, pa cuelmu, cuenta con mayoría republicana nes dos Cámares, onde los representantes y senadores republicanos nun osen votar en contra pa non sofrir una campaña d’acosu direutu del personaxe y los sos acólitos. Amás, la prensa, históricamente llibre y batallosa énte’l gobiernu, güei atopase en manes de magnates veníos d’otres árees de la economía que tienen como oxetivu principal llevase bien col poder. El resultáu vemoslo anguaño nos moos de Trump, na so persecución dende’l poder a toos aquellos que nun s’inclinen o que foron los sos nemigos políticos, y tamién na menacia incipiente pa guetar un tercer mandatu, saltándose la Constitución. Nada qu’envidiar a Putin o Xi Jinping.

Llegaos equí paez obligao dar un repasu al estáu de la cuestión na nuesa España querida, y lo primer que reparamos ye que la nuesa teóricamente maraviosa Constitución tien más furacos qu’un quesu gruyére, y qu’un gobernante con pocos o dengún escrúpulu puede facer de la so capa un sayu, dicho esto pa evitar una procacidá que ye lo que me pidía’l cuerpu, y gobernámos, o manipulámos, al so antoxu personal. Ye lo qu’hai.

El doctor Sánchez ye inclusive más conducente, na so tiranía, que Donald Trump, pues nin siquier tien necesitao ganar eleiciones pa apoderase del poder, y dende ellí “comprar” al llexislativu, ¿o fo al revés? Pa dempués abigorniar al Constitucional dende una Fiscalía Xeneral de calter delicuencial. La parte de los medios de comunicación tien sío más fácil inclusive que nes Ameriques, pues equí son mendicantes.

Pa James Madison, la nuesa situación, como la de los EEXX, ye de llibru, una tiranía.

Raúl Suevos

A 31 díes vencíos d’agostu de 2025

Torna en castellán en repdiv.blogspot.com

Les barbes de François Bayrou

 

La presidencia segunda d’Emmanuel Macron ta siendo aínda más complicada que la primer, y los fechos canten. Dende’l so entamu, en mayu del 22, yá son cuatro los xefes de gobiernu por él nomaos, ensin que dalu d’ellos algame a caltenese más alló d’unos meses, faciendo que Francia se pareza ca vegada más a la Italia d’enantes; mientes Giorgia Meloni llévamos a recordar a la Francia del xeneral De Gaulle. Ye lo qu’hai.

L’Asamblea francesa ta más dividida que’l nuesu Congresu de diputaos, cola diferencia de que Macron nun ta dispuestu a transaccionar cola oposición a costa de los sos principios –el presidente francés paez tenelos- y les derrotes sucesives na Cámara  llevenlu a nomar gobiernos nuevos na esperanza de dar cola tecla que-y permita acabar el so quinqueniu presidencial ensin convocar eleiciones anticipaes.

El xefe de gobiernu anguaño, como yá-y asocedió al anterior, Barnier, asume que los gastos, mui superiores a los ingresos, son inasumibles. El serviciu de la Delda, esto ye, el pagu anual d’intereses, algamará esti añu los 55.000 millones d’euros, y subiendo –nós 40.000 millones, pero al doctor Sánchez nun paez preocupa-y - lo que tien llevao a Bayrou a proponer unos presupuestos con grandes retayos en subsidios, díes festivos, copagu sanitariu,  y asuntos varios, lo que paez que pon a toa la oposición pie en paré, cola idea de provocar la so cayida, y quiciabes eleiciones.

Ye equí cuando me vien a la tiesta aquello de “cuando vieres les barbes del to vecín tayar, pon les tuyes a remoyar”. Y ye que Francia, con un estáu hipertrofiáu y en dellos aspeutos desfasáu, pero muncho más rica que la nuesa querida España, vese empobinada a camudar ruta, o a lo menos eso cree Bayrou, y equí siguimos endeldándomos cola allegría d’un ricu nuevu; al paecer porque’l nuesu PIB, un indicador rellativu que nun amuesa la realidá de la vida del ciudadanu d’a pie. Naide paez ser consciente de que la Delda, esa que ca día sigue amontando escomanadamente,  vamos tener que pagala en dalgún momentu, y que, si nun salen les cuentes, arriesgamonos a acabar como los griegos tres los fastos de la Olimpiada, con diez años de midíes d’aforru a tolos niveles, dende la educación a la sanidá, pasando, de xacíu, poles pensiones y los impuestos.

Nun sé cómo va acabar Bayrou, pero lo cierto ye que los franceses, sicasí, nun van poder dicir que nun taben avisaos, y esta vegada nun van  poder acudir a la su “grandeur”, nesta ocasión van tener que ponese les piles. Y más val que nós tamién.

Raúl Suevos

A 30 díes d’agostu de 2025

Torna en castellán en repdiv.blogspot.com

La UME de Javier Milei

 

Javier Milei, el presidente llibertariu, que non lliberal, d’Arxentina, tamién tien visto la necesidá de cuntar con una ferramienta estatal que pueda facer frente a les continxencies o catástrofes que pudiera tener qu’afrontar la nación austral, y pa ello, según cuenten los noticiarios, tien creao l’AFE, Axencia Federal d’Emerxencies; un organismu que, dependiente del ministeriu de Seguridá Nacional, vase encarregar de “centralizar la planificación, coordinación y execución de l’asistencia énte catástrofes naturales”, que a la so fin, nel decretu que da fe de la so nacencia, repárase  que l’únicu movimientu militar que se produz ye’l pasu de determinaos medios –los hidroaviones- y en determinaes circunstancies al control operativu d’esi muérganu nuevu.

Y ye que la UME de nueso, d’éxitu ensin oldéu a nivel internacional, pa la que s’esgoten los eloxos y aponderamientos recibíos de toes partes, nun acaba de ser “copiada” por dalu país de ciertu nivel, y cabe entrugase por qué. Y, anque pueda resultar chocante, quiciabes seya pol so calter militar, pues eso ye lo que la fai estremada a casi tolos sistemes de rempuesta énte catástrofes que funcionen ne la nuesa redolada, entendiendo esto por Occidente y sistemes de gobiernu de democracia representativa. A saber por qué.

Y ye que lo d’usar militares pa estes xeres ye un chollu. Pero una ganga d’estes carauterístiques, en países “comme il faut”, nun ye susceptible de ser emplegao como equí se fae, esto ye, ensin horarios en casu d’intervención, con retenes obligatorios o disponibilidá obligada en casu de sollertes, con guardies múltiples y otru ensin fin de torgues qu’afeuten a la vida del personal d’esta unidá de forma recurrente.

A doña Margarita Robles enllenase-y la boca cuando fala de la “so” UME, y nun ye pa menos, pues dende que’l señor Zapatero decidió, manu militari, la so creación, de forma tan radical como la retirada d’Iraq, la UME nun tien fecho más que collechar l’almiración y el cariñu de les poblaciones onde les circunstancies la tienen obligao a esplegar, lo que facilita la impresionante guía de la titular de Defensa; casi tanto como l’espliegue del nuesu Exércitu en misiones, de Paaazz, esteriores, anque ello seya a costa d’allargar los tiempos d’estes operaciones y recortar los permisos que’l personal venía esfrutando en tiempos pasaos. Too pola pasta, que dalgunos señalaben con sorna, anque nesti casu seya a costa de la salú física y mental de los nuesos militares.

La UME, anguaño intocable, debió ser, como n’Arxentina, una construcción civil, basada nesa Protección Civil que yá taba ehí, como la Guardia Civil, que tamién. Ye lo qu’hai.

Raúl Suevos

A 23 díes vencíos de marzu de 2025

Torna en castellán en repdiv.blogspot.com 

Apoteosis interrupta

 

Fo una Selmana grande pa los anales, por duración ya eventos, dalgunos, como la Feria de muestres, d’ésitu aseguráu, otres, como Fuegos o conciertos, más al azar del tiempu y los humores del públicu. Sicasí, nos díes previos, la Feria taurina, colos sos carteles y el puxu recobráu tres la clausura incamentable del gobiernu concexil anterior, paecía destinada a dar, otra vegada, la campanada.

Nella, la participación del profeta del toru, o mesíes pa dalgunos, esi Morante de la Puebla, qu’esti añu abasna multitues tres de sí, como aquel galiléu, anque ensin facer milagros, si bien digan que’l so toréu tenga dalgo de místicu y relixosu, sunponía’l cuelmu d’un trabayu aballador de los xestores  la plaza, yá que, al tirón induldable del sevillanu, xuntaben a un Roca Rey que fo’l acicate de la fiesta estos años caberos, y xunto a ellos, un Ortega que, a puntu de ser devoráu pol papel cuché tres la so escapada énte l’altar, que non énte’l toru, tien sabío hilvanar un par de temporaes que lu alluguen ente lo más granao del escalafón.

El tirón yera talu que la plaza vendióse práuticamente entera, y tres el sofocón que supunxo la coḥida de Morante, malapenes hebo devoluciones, algamándose los 9000 espectadores. Esto ye, que, como diría aquel vieyu dúo cómicu, la plaza taba abarrotá, pa disgustu d’antitaurinos y animalistes, y tamién de dalgunos aficionaos, que se quedaben ensin esi duelu, pa mín fantasía de cronistes interesaos, ente’l de la Puebla y el peruano. Ye lo qu’hai.

El bibio llucía rescamplante, y la puerta grande  abrióse a la fin pa esi Ortega, a priori la cenicienta del cartél, ensin que Roca o’l sustitutu Fortes, pudieran facer un res pa averase al triunfu del primer. El frontal de la nuesa coqueta plaza resplandía coles tres banderes baxo un cielu arroxáu poles quemes, eses que tantu-y cuesta a la señora alcaldesa llantar nel nuesu balcón braniegu, la Escalerona. Y dientro, nel bullir del públicu notábase la presencia de munchu arribista d’última hora, pues los gritos estentóreos, a destiempu y repetíos nun son más qu’una amuesa d’incivismu dende l’anonimatu del tendío; especialmente cuando se referencien na fruta y el presidente del gobiernu.

A mín, qu’esti añu nun llevé habanu por prudencia, chocóme’l comentariu d’un fumador a mio costáu, qu’ente gin-tonic y puru mascullaba dalgo asina como “cuanta verdá tien”, refiriéndose a Ortega, y a mín, nun siendo espertu nesas fondures, sonóme a como cuando te dicen que la sidra nun espalma bien ¿y qué? Pues eso

Raúl Suevos

A 17 díes vencíos d’agostu de 2025

Torna en castellán en repdiv.blogspot.com

Dende los Sudetes al Donbass

 

En setiembre de 1938 robláronse aquellos alcuerdos vergoñosos nos que l’Alemania de Hitler apoderábase de la rexón checoslovaca de los Sudetes, con una gran población d’orixe alemán, y el “negociu” liderábalu Chamberlain, el xefe de gobiernu británicu, aínda imperiu per aquel entoncenes, y acompañábenlu, na so xenuflesión énte Adolph, Francia ya Italia. Tampocu cuntaba un res la España d’aquel periodu.

Hitler xuró que nun tenía más mambís territorial, pues en marzu yá se llevara a cabu l’Anschluss, la xunión supuestamente pacífica con Austria,  y los europeos colaron satisfechos pa casa. Los checoslovacos, que nun fueran invitaos al aconceyamientu, a diferencia de Zelensky, perdieron les costoses defenses, al estilu de la Llínea Maginot francesa, que llevaben años construyendo, y que, col so exércitu d’un millón d’homes y preparadísimu, podían tener frenao a la Wehrmacht alemana.

En marzu del 39 les tropas hitlerianes entraron y socuparon Checoslovaquia ensin malapenes resistencia en dos díes. Nun había defensa posible ensin la so llínea defensiva. Y el magníficu exércitu foi purgáu y dempués incorporáu al alemán, que’l primer de setiembre del 39 invadía Polonia. Dos días dempués enteamábase oficialmente la Segunda Guerra Mundial.

Nel Donbass Ucrania tien, aparte les sos mayores riqueces xeológiques, la so fortaleza defensiva, construyida costosamente dende la invasión encubierta rusa del 2014. Ellí, a base de trincheres fonderes, fortines y ciudaes fortificaes, los heroicos combatientes ucranianos tienen parao a les hordes ruses, causando-yos más d’un millón de baxes de combate nos casi tres años de guerra. Más allá d’esta llínea namái queden llanures, casi imposibles de defender, como asocedía en Checoslovaquia. Nun se tien de ceder esta llínea.

La situación actual ye semeyante al 38, con un Trump nel papel de Chamberlain, y los líderes europeos, como entoncenes, de comparses. Y otra vegada hai un personax tarrecible, nesti casu Putin, qu’ofrez garantíes de paz, dempués de innumberables incumplimientos, col Memorándum de Budapest en primer llugar. Y otra vegada’l riesgu que cuerre Europa ye’l de vese comprometía a mediu o curtiu plazu, tan curtiu como Putin, al que presiona la so edá, recupere la economía del so país y les fuercies del so exércitu.

Si nel 38 se descubrió que Chamberlain yera un farfán, que dimitiría meses dempués, agora tenemos a un Trump que ye, posiblemente, el peor presidente de los Estaos Xuníos, dalgo que, dende la Primer Guerra Mundial, afeuta direutamente al restu del mundiu, y a Europa particularmente. Y ente esta situación a los europeos, a los nuesos líderes, namái mos cabe facer bloque nel sofitu ensin quiebra a Ucrania. Non más Sudetes.

Raúl Suevos

A 19 díes vencíos d’agostu de 2025

Traducción en castellán en repdiv.blogspot.com